Jesaiase 45 - Labrador Inuttitut Heritage Bible

Korassemik. Israêlitit piulijauningannik.

¹ Imak oᴋarpoᴋ Nâlegaᴋ mingoartaminut Korassemut; tâmna tiguvara tallerpiagut, nallojut sãlagijomavlugit tâpsoma sângane attanersuillo saviksoangit pêromavlugit, upkuat upkuertaurᴋovlugit tâpsoma sângane, upkuaᴋsuillo parngnanairtaujungnairᴋovlugit:

² Uvanga sivunikkut ingergajomârpunga, mannẽtut manniksarlugit, upkuallo kannujaujut serᴋomitsomârpakka pallangairutillo kikiangojut naviklugit.

³ Pivianartoᴋsuillo angiarijaujut ivlernartoᴋsuillo ijersimajut tunijomârpakka illingnut, tukkisilerᴋovlutit, uvanga Nâlegaujunga, Israêlib Gûdinga, attikkut ᴋairᴋogapkit.

⁴ Kivgara Jâko pitjutigivlugo, Israêlelo anerijara pitjutigivlugo attikkut ᴋairᴋovagit atserarlutillo, illitarᴋserᴋârtinak uvamnik.

⁵ Uvanga Nâlegauvunga, assimniglo Nâlagaᴋangilaᴋ, assimniglo Gûdeᴋangilaᴋ. Uvanga ᴋetteruserpagit, illitarᴋserᴋârtinak uvamnik,

⁶ Seᴋinerub nuivianit nippivianut missigilerᴋovlugit, assimnik pijoᴋatsangimat. Uvanga Nâlegauvunga, assimnik Nâlegaᴋangilaᴋ.

⁷ Kaumajomik pingortitsivunga tâᴋtoᴋarᴋojivlungalo; pilloringnermik tunidjivunga ᴋanoetoᴋarᴋojivlungalo. Uvanga Nâlegaujunga tamakkoninga tamainik piniartunga.

⁸ Kilait, kussileritse pângat, nuvujanillo idluarnermik ᴋorlortoᴋarle! Nuna aitarle, piulijaujutiksamik annititsivlune, idluarsartaujutiksamiglo nuilertitsivlune. Uvanga Nâlegaujunga tamanna pingortipara.

⁹ Kappianarmêk akkerartortoᴋ pingortitiminut, machainaᴋ machait ivjomit pijut illangat. Machaᴋ machaliortiminut oᴋaralloarᴋâ imâk: Sumik sullivêt? — sanajallõnêt pivlutit oᴋarᴋâ: Aggaᴋangilaᴋ tâmna?

¹⁰ Kappianarmêk atâtaminut oᴋartoᴋ: Sôᴋ kinguvâksarsiorᴋêt? anânaminullo: Sôᴋ ernivêt?

¹¹ Imâk oᴋarpoᴋ Nâlegaᴋ, ivlernartitoᴋ Israêlikkune, pingortitingat: Pijomârtuksat uvamnut aperᴋutigisigik, ᴋitorngakkalo aggamalo sanajangit perᴋosigik uvamnut!

¹² Uvanga nuna sanavara, uvangalo inuit nunamẽtut pingortipakka, uvanga aggamnut ᴋilak issivipara, pitanginullo illũnamasianginut Nâlegauvunga.

¹³ Uvanga taimna ᴋairᴋovara idluartomik, apᴋutiksangillo tamaita manniksarpakka. Taimna iglugasaksoalioromârpoᴋ pimnik, inuᴋotimniglo parngnanairsortaujunik annirᴋojijomârpoᴋ, akkiliusiat pilliusiallõnêt pitjutiginagit, oᴋarpoᴋ ᴋilangmiugasaksuit Nâlegangat.

¹⁴ Nâlegaᴋ oᴋarpoᴋ imâk: Egiptenemiut kattersortangit Etiopiamiullo perᴋutigijangit inuillo takkijut Sabamiut tikkitsomârput illingnut, perᴋutigijomârpattillo, taipkoalo malligomârpâtit; ᴋellaumgujanut ᴋellaᴋsortauvlutik ᴋaijomârput, pâmakterlutiglo sângne tuksiarvigijomârpâtit: Gûde illingnẽtuinarpoᴋ, tâpsomalo assianik Gûdeᴋangilaᴋ.

¹⁵ Illa, igvit Gûdeovotit ijertortoᴋ, Israêlib Gûdigijanga, piuliklerteojotit.

¹⁶ Gûdingoaliortut illũnatik sillasiortuksauvut kangusuktuksauvlutiglo, illũnamatsiatik illerasuktuksauvut.

¹⁷ Israêlele piulijaujomârpoᴋ Nâlekamut, piulijauviksaᴋartitauvlune issoᴋarniangitomik. Kangusuktitauniatsangilase mittautauniatsanaselo nâksaungitomut aglât.

¹⁸ Imâk oᴋarpoᴋ Nâlegaᴋ, ᴋilangmik pingortitsijoᴋ, Gûdeojoᴋ, nunamik sanajoᴋ âᴋiksorlugolo tunganelivlugolo; — tamannalo pingortilungilâ inuᴋartailivlugo, inuᴋarᴋovlugole âᴋiksorpâ — : Uvanga Nâlegauvunga assimniglo Nâlegaᴋangilaᴋ.

¹⁹ Sagvangitome oᴋalungilanga, nunab inningine târtune; Jâkob kinguvânginut oᴋalungitunga: Kennersinga sullinase! Uvanga Nâlegaujunga idluartunik oᴋauseᴋarpunga, nallâgôrtunik nallunaijaivunga.

²⁰ Amiakôjose nallojunit, kattimaleritse tamaungaᴋatigêkluselo! Sillaiput akjartortut Gûdingoaᴋotimingnik ᴋejungnik, tuksiartut Gûdemut ikajorungnangitomut.

²¹ Oᴋâlatitse, tamaungarluselo ᴋaggimioleritse! Kia itsaᴋsoarnit tamanna tussartautipaûk ᴋaujijautillugolo sivornganenit? Uvanga Nâlegaujunga tamanna pinialungitarâ? Assimniglo Gûdeᴋangilaᴋ, idluartôjomik piuliklerteojomiglo Gûdeᴋangilaᴋ assimnik.

²² Sâgialeritse uvamnut, piulijaujomârpose tagva, sillaᴋsoarmiôjose tamapse; uvanga Gûdeogama, assimniglo Gûdeᴋangimat.

²³ Angermarikpunga nangminimnik taivlunga, oᴋauserlo annivoᴋ ᴋannimnit nallâgôrtomit; tamanna soᴋᴋoserniatsangilaᴋ imaitok: Sêrᴋut illũnamatsiatik sêrᴋortorvigijaksarivânga, oᴋallo illũnamatsiatik angervigijaksarivânga.

²⁴ Oᴋartuksauvullo pivlunga: Nâlekame kissiane idluarsainermik pitsartunermiglo pitaᴋarpoᴋ. Tâpsomungalo tikkitsomârput, illũnatiglo tâpsominga ômisuktut kangusuktitaksauvut.

²⁵ Nâlekamut Israêlib kinguvângit illũnatik idluarsititaujomârput, tâmnalo nertôtigijomârpât.