Jesaiase 44 - Labrador Inuttitut Heritage Bible

Gûdingoat piunginingannik.

¹ Manale tussalerit, kivgara Jâko, Israêlelo anerijara.

² Imâk oᴋarpoᴋ Nâlegaᴋ pingortitit, anânavit timinganit pairijit, ikajortit: Sivoraniarnak, kivgara Jâko, Jessuru (Israêle) anerijara.

³ Imermik kovisijomârama imeruktomut kôngniglo pannertomut; anernera kovijomârpara ᴋitorngarnut saimarsautigalo kinguvângnut.

⁴ Iviksukallo akkornganne peroromârput sôrlo ukpigait kôt sinningine.

⁵ Illangat oᴋaromârpok: Nâlekab pigivânga; aipangalo Jâkob attinganik nertordleromârpoᴋ; pingajuaglo aggangminut aglaklune perᴋutautitsomârpoᴋ Nalekamut, Israêliblo attinganik atserartaujomârpoᴋ.

⁶ Imâk oᴋarpoᴋ Nâlegaᴋ, Israêlib attaninga piulijingalo, ᴋilangmiugasaksuit Nâlegangat: Uvanga sivorliovunga, uvangalo kingorliovunga, assimniglo Gûdeᴋangilaᴋ.

⁷ Kinalo uvaptut oᴋâlavâ (oᴋautituinalinga ᴋaujitillungalo!) taimangat, itsaᴋsoame inuit pingortigapkit? Pijomârtuksallo nalliutuksallo ᴋaujijautitaulit taipkonunga.

⁸ Sivoraniarase erᴋsiniaraselo! Sivorngane tamattominga ᴋaujitilungilapsê tussartilluselo? Illipse kigligiudsijôvose. Assimnik Gûdeᴋarᴋâ? Kairtoᴋangilaᴋ, assimnik ᴋaujilungitunga.

⁹ Gûdingoanik sanavaktut illũnamatsiatik piungitoᴋsôvut, pinnârijangillo suksaungilat, kigligiudsijullo (ikajortiksangit) takolugatiglo missigingilat, kangusuktitaurᴋovlugit.

¹⁰ Kina Gûdeliorᴋâ, Gûdingoamik sanavlune attoraksaungitomik?

¹¹ Ahâk, illagijangit illũnatik kangusuktuksauvut, tamakkoninga sanajut inutuinauvut. Taipkoa illũnatik kattimalerlutik saᴋᴋeralloarunik, kakkilârtuksauvut kangusuktuksaularmiglo.

¹² Sabviorte kikiangniumik kẽnaksaivoᴋ, sullijaksaᴋarpoᴋ nussugvingme, ujaratsiamullo Gûdingoaliorpoᴋ, tallime nukkinganut sanavlugo. Kâlerpoᴋtauᴋ nukkeᴋarungnairlunelo, imingikune sangêlerpoᴋ.

¹³ Kejulerijoᴋ noᴋaᴋservallaumik attorpoᴋ, titterautikut nallunaikuserlugo Gûdingoaliorpoᴋ savingmut, ôktorlugo angmalokitausiutikut, angutib tautua adsilivlugo, inûb ânanauninga adsilivlugo, iglome inneᴋarᴋovlugo.

¹⁴ Napârtut kippijartoromavlugit (inûb) napârtut sittijoᴋsuit aigillo anerivait nallunaikuserlugillo napârtut tagvanẽtut akkornganne. Napârtoarsungmik illijivoᴋ ivjomut, tâmnalo sillalungmut perortitauvoᴋ.

¹⁵ Taimna ikkomaksauvoᴋ inungmut. Illanganik attorlune kitjaᴋejârpoᴋ, amma illanganik ikkitsivlune ᴋaᴋᴋôjaliorpoᴋ, amma illanganik Gûdingoaliorpoᴋ tuksiarvigivlugolo, adsingoaliorpoᴋ sêrᴋortorvigivlugolo.

¹⁶ Abvakunga ikkomamut nungupâ; abvakunga attorpâ nerᴋe igavlugo nerriniarlune, nerᴋelo jarralugo aᴋeartorniarlune; kitjaᴋejârlunelo oᴋarpoᴋ: Kuvê, kitjaᴋejârama, ikkoma takogapko.

¹⁷ Amiakunganiglo Gûdingoaliorpoᴋ Gûdingoaᴋotigijomavlugo, sêrᴋortorvigivlugolo pâmaktervigivâ, tuksiarvigivlugolo nipliavigivâ: Piulilaungminga, igvit Gûdigigapkit.

¹⁸ Tukkisinatik missigingilat, takpẽtitaugamik, ijingit takorᴋonnagit õmatingillo tukkiserᴋonnagit.

¹⁹ Tamannale õmamiutaringilât, illisimaneᴋaratiglo sillatuneᴋangilat, imâk issumaᴋarlutik: Abvakunga ikkomamut nungupara, aumanginelo ᴋaᴋᴋôjaliorpunga, nerᴋemiglo jarrasivlunga nerrivlungalo, mãnalo amiakovininga maᴋojungnartungortitaksarivigô, napârtoviniub ᴋejungata sângane sêrᴋortorniarlunga?

²⁰ Argjat (tiktaujut) tigunasuarpait, õmatingata uivêrijaumajub tammartipâ, tarnine piulivlugo sapperpâ, imâglo issumaᴋangilaᴋ: Tallerpiga uivêrinartunik sullijaksaᴋangilâᴋ?

²¹ Tamattominga erᴋailerit, Jâko Israêlelo, kivgarigapkit. Uvanga pingortipagit kivgaulerᴋovlutit uvamnut; Israêle, puigorniarnanga!

²² Idluitullinitit pêjarpakka nuvujatut (tiktautillugit) ajortullinitillo pujortut. Sâviginga, piuligapkit.

²³ Kilait, nertordleritse, Nâlegaᴋ tamattominga piniarmat! nunaᴋsûb inningit akpasiktut, nipliadlaritse! ᴋaᴋᴋat, iggiaᴋomijaritse napârtoliksuit napârtullo tagvanẽtut tamaita illagivlugit, Nâlekab Jâkokkut piulingmagit Nâlegaujotôvlune Israêleme.

²⁴ Nâlegaᴋ piulijit, pairijit anânavit timinganit oᴋarpoᴋ imâk: Uvanga Nâlegauvunga, tamainik piniartunga; kissima ᴋilak issivipara nunamiglo nerrototitsivunga, ikajorteᴋarnanga.

²⁵ Nallautainerdluktut nallunaikutanginik nungutitsijunga, pijomârtuksaniglo oᴋarpaktut illisimaitillugit, sillatojuniglo uttertitsijunga, sillatuningat sillainartillugo.

²⁶ Kivgamale oᴋausinginik nallautsititsijunga, tillijamalo kajusimautigijanginik nãmaksititsijunga, Jerusalemullo oᴋartunga: Inuᴋalerit! Jûdablo iglugasaksoanginut: Igloᴋaleritse! asserorsimajuniglo tagvane âᴋiksoivunga.

²⁷ Imarbiksûb ittininganut oᴋartunga: Ipteriligit! ingergarnerillo pannilertungortitsomavakka.

²⁸ Korassemut oᴋartunga: Tâmna pairᴋsijungortipara, pijomajaralo tamât nãmasititaksarivâ, Jerusalemut oᴋarᴋovlugo: Igluᴋalerit! Kattimaviksûblo tungaviksangit illijaulit!