Jesaiase 43 - Labrador Inuttitut Heritage Bible

Gûdib inuᴋotingita nâpkigijauningannik.

¹ Manale, imâk oᴋarpoᴋ Nâlegaᴋ, pingortitit, Jâko, sanajit, Israêle: Sivoraniarnak, piuligapkit, attit taivlugo ᴋairᴋogapkit, perᴋutigigapkit.

² Imaᴋsoarnik ikâruvit, illaginiarpagit, kôksoarniglo (ikâruvit) ippititauniangilatit taipkonunga; ikkomakut ingergaguvit, õtauniangilatit ikkoaladlarninganullo ikkitauniangilatit.

³ Uvanga Nâlegaugama Gûdit, ivlernartitoᴋ Israêlikkune, piulijit. Egiptene Etiopialo Sebalo akkiliutigivlugit tunivakka pivlutit.

⁴ Erdlingnartoᴋsôgavit ijîmnut ivlernadlarlutillo, uvangalo nagligigapkit, taimaimat inuit tunivakka pivlutit inugasaᴋsuillo tarnit pivlugo.

⁵ Sivoraniarnak, illagigapkit! Kinguvârijarnik ᴋaitsivunga seᴋinerub nuivianit nippivianillo kattersorlugit.

⁶ Apsomunga oᴋarpunga: Kaikit! aksomungalo: Agviarniarnak! Ernikka tamaungartilersigik ungasiktomit panikkalo sillaᴋsûb issuanit,

⁷ Illũnaita attimnik taijaumajut, pingortitakka nertortaujutiksamnut, âᴋiksortakka, sanajakka.

⁸ Annilit inuit tautungitut ijeᴋaralloartut, tussângitullo siuteᴋaralloartut.

⁹ Nallojut illunamasiatik kattilerlit, nunaᴋatigêksuillo attautsemut pilit! Kina taipkoa akkornganne taimaitomik nallautaijungnarᴋâ? Tussartilitigut oᴋautigijamingnik sivorngagut; kigligiudsijuksat saᴋᴋertiligit idluarsartaujomavlutik. Tagva tussaromârput oᴋarlutiglo: Taimailingavoᴋ nallâgut.

¹⁰ Illipse kigligiudsijôvose pivlunga, oᴋarpoᴋ Nâlegaᴋ, kivgaralo anerijara, ᴋaujilerᴋovluse okperᴋovluselo uvamnut tukkisilerᴋovluselo, uvangaugama. Sivunipkut Gûdeojomik pijoᴋangilaᴋ, kingunipkullo pijoᴋaromânginivoᴋ.

¹¹ Uvanga, uvanga Nâlegauvunga, assimnik piuliklerteᴋangilaᴋ.

¹² Uvanga nallautaivunga piuliklerlungalo ᴋaujijautitsivlungalo, assimniglo Gûdeᴋangilaᴋ akkonapsingne. Illipse kigligiudsijôvose pivlunga, oᴋarpoᴋ Nâlegaᴋ, uvanga Gûdeogama.

¹³ Mãnanittauᴋ uvanga tâmnauvunga, aggamnillo piuliklerteᴋangilaᴋ. Piniaruma, kia agviaromarᴋângâ?

¹⁴ Nâlegaᴋ piulijise, ivlernartitoᴋ Israêlikkune oᴋarpoᴋ imâk: Pivluse aijoᴋarᴋojivunga Bâbelemut, illũnaitalo ᴋemâtillugit attersârtitsomârpakka (kôngmut) Kaldêarillo umiaᴋsoanginut allianartunut.

¹⁵ Uvanga Nâlegauvunga, ivlernartitoᴋ akkonapsingne, Israêlemik pingortitsijoᴋ, attanise.

¹⁶ Imâk oᴋarpoᴋ Nâlegaᴋ, apᴋosineliortoᴋ imarbingme imaᴋsoarnelo iktullijâdlartune apᴋutiksaliortoᴋ,

¹⁷ Kamutiniglo horsiniglo sorsuktuksaᴋsoarniglo pitsartuneliksoarniglo annerᴋojijoᴋ, inariartortillugit makkinermiglo ajulertillugit ᴋammilugillo, sôrlo manneᴋ ᴋammingmat:

¹⁸ Pijoᴋartut itsaᴋ erᴋaumajungnairsigik, ᴋângersimajullo kamagijungnairsigiᴋ!

¹⁹ Ahâk, nutâmik sanajomavunga; mãna nuilerpoᴋ. Missigingipisiûk? Illa apᴋosinelioromârpunga inuᴋajuitome imeᴋajuitorlo kôᴋartillugo.

²⁰ Naternab ômajungita nertoromârpanga, terrianiangajullo staraussillo, sunaᴋajuitoᴋ imeᴋartigupko, imeᴋajuitoᴋ kôᴋartillugo, inuᴋotikka anerijakka imertitsomavlugit.

²¹ Inuit tâpkoa âᴋiksorpakka uvamnut, nertornadlarnera oᴋautigijaksarivât.

²² Igville, Jâko, tuksiarvigilungilarma, illungertorlungilatit (tuksiarvigivlunga), Israêle.

²³ Kaitsilungilatit uvamnut saukkanik tunergutingnik õtaksanik, tunergutingnullo toᴋotaksanut nertorlungilarma; pagvisâlungilagit, tunergutit nerᴋiksat (pijomavlugit), siorniortilungilagit, (kutsoᴋ) tippitsiariksautiksaᴋ (pijomavlugo.)

²⁴ Kênaujanut iviksuit tippitsiariktut pissiarilungilattit uvamnut, tunergutivillo õtaksat orᴋsungannik nãmaksitilungilarma; imâgle: idluinernut pagvisârparma, idluitullinernullo siorniortiparma.

²⁵ Uvanga, uvanga idluinitit pêjarpakka uvanga pivlunga, idluitullinitillo issumagijungnairpakka.

²⁶ Erᴋaitinga! erᴋartortigêlauᴋta! oᴋalerit idluarsarasuarlutit!

²⁷ Sivorlerijavit sivorlerpângat idluitullilerêrpoᴋ, ajoᴋertortivillo tunnupânga.

²⁸ Tamanna pivlugo angajoᴋaujut ivsornaitovingme ivlernarungnairtipakka, Jâkokkut ôminartillugit Israêlikkullo mittautaunartillugit.