Jesaiase 42 - Labrador Inuttitut Heritage Bible

Nâlekab kivganganik.

¹ Ahak, tagga kivgara serngnigijara, anerijara, tarnima kuviagijanga. Anernera tunivara tâpsomunga, erᴋartuijutiksanik âtsijomârpoᴋ nallojunut.

² Tâmna ᴋuᴋudlaromângilaᴋ ᴋaigarsuganelo, nippingalo tussaksaujomângilaᴋ igloᴋsuit akkornganne.

³ Iviksoaᴋ suvlolik napvaujimajoᴋ serᴋomitsomângilâ, mannerlo ᴋammilertoᴋ ᴋammitsomânginivâ, erᴋartuijutiksat nãmaksititsomârpait nallâgut.

⁴ Sangêleromângilaᴋ ajuleromânginivoᴋ, nãmaksititserᴋârane erᴋartuijutiksanik nuname, ᴋikkertamiullo mallitsialerᴋârtinagit ajoᴋertûsinginik.

⁵ Imâk oᴋarpoᴋ Gûde Nâlegaᴋ, ᴋilangmik pingortitsijoᴋ tassiterijorlo, nunamik issivitsijoᴋ perortunginiglo, inungnut ᴋânganẽtunut inôtsemik tunidjijoᴋ, anernermiglo tunidjijoᴋ arvertartunut tagvane:

⁶ Uvanga Nâlegaujunga ᴋairᴋovagit, idluartomik illiorlunga, aggatit tiguvakka, sapputivagit, angerutigijaujotut illingatipagit inungnut, ᴋaumaksaijuksatut nallojunut.

⁷ Uititserᴋovlutit tautungitut ijinginik, annititserᴋovlutillo parngnanairsortaujunik parngnanairsimavingmit, târmiuniglo iglomit parngnanairsimajomit.

⁸ Uvanga Nâlegaᴋ, tagva attera; nertornarnera tunijomangitara assimnut opinarneralõnêt Gûdingoarnut.

⁹ Ahâk, oᴋautigilauᴋtakka sivorngagut nallautsivut, pijomârtuksanik oᴋâlavunga, pilerᴋârtinagit tussartaurᴋovakka illipsingnut.

¹⁰ Imgerumik nutâmik imgeritse Nâlekamut; opigisiuk nunaᴋsûb kiglinginit, illipse imarbiksiortose imaᴋsûb illuanẽtullo, ᴋikkertat nunaᴋartullo tâpkonane.

¹¹ Nipliadlarlit naternat iglugasaksoangillo iglugasaillo, Kêdarikkut innigijangit; imname nunaᴋartut nertordlerlit; ᴋaᴋᴋat ᴋânginit nipliadlartoᴋarle!

¹² Tâpkoa Nâlegaᴋ opigilitsuk nertornarningalo oᴋautigivlugo ᴋikkertane!

¹³ Nâlegaᴋ annijomârpoᴋ sangijoᴋsoatut, sorsuktuksatut illungertoromârpoᴋ, nipleromârpoᴋ nipperᴋortojomik, ajugaujomârpoᴋ akkerartortiminut.

¹⁴ Nippangeralloarpunga sivikitomiungitoᴋ, nippeᴋarnanga ᴋikkarlungalo. Mãnale ernisuktotut nipliadlarpunga anersaumivlunga âlavlungalo.

¹⁵ Kaᴋᴋat ᴋaᴋᴋârulaillo asseroromavakka, iviksukallo ᴋânginẽtut pannilertitsomavakka; kôksuit ᴋikkertangortitsomavakka tassillo imeᴋarungnairtillugit.

¹⁶ Tautungitulle ingergatitsomavakka apᴋutikut illisimangitangatigut, apᴋosinikut illisimangitangatigut tassioromavakka; tâᴋsoaᴋ ᴋaumajungortitsomavara sângine mannẽtullo manniksarlugit. Taimak piniarvigijomavakka ᴋemangniarnagillo.

¹⁷ Kingumut aijuksauvut tagva kangusuktitauvlutik Gûdeungitunik tatteᴋartut, Gûdingoanullo oᴋartut imâk: illipse Gûdigivapse.

¹⁸ Tussilartose, tussaritse! tautungitoselo, uitaleritse takovluselo!

¹⁹ Kina kivgaptut tautungitôvâ? Kinalo tussilartôvâ tillijaptut airᴋojaptut? Kina Nâlekab illannârijangatut tautungitôvâ? kinalo kivgangatut tautungitôvâ?

²⁰ Unuktut takogalloarlugit erᴋaumalungilattit, siutîkik angmaralloartillugik tussalungilatit.

²¹ Idluarnine pivlugo Nâlegaᴋ kajusilerpoᴋ, perᴋojat angijôtillugit ivlernartillugillo.

²² Ukkoale inugiarput tigliktaumajut, aᴋsârnigaujut, ᴋairosungnẽput ᴋellaᴋsortauvlutik, ijersimavut parngnanairsimavingne. Aᴋsârnigauvut piuliklerteᴋaratiglo, tigujauvut oᴋartoᴋangilarlo: Uttertikit!

²³ Kia akkonapsingne tamanna tussarᴋaûk, kamagitsiarlugo nâleklugolo kingorngane?

²⁴ Kia Jâkokkut tunivagît aᴋsârnigautillugit Israêlitillo arᴋtaijunut? Nâlegaᴋ idluitullivigijavut taimailiulungilâᴋ? Tâpsomale apᴋutingine arvertaromangilat, perᴋojangillo nâlalungilait.

²⁵ Taimaimat ningautsine erᴋsinartoᴋsoaᴋ kovivâ taipkonunga unatadlarnersoarlo; avatâtigut ikkoalagalloarpuk, kissianele tamanna tukkisingilât, ikkitsigalloarpuk, kissianele tamanna õmamiutaringilât.