Jesaiase 41 - Labrador Inuttitut Heritage Bible

Nâlekab Gûdetôninganik.

¹ Nippangerdlutik ᴋikkertat uvamnut pilit, inugasaᴋsuillo nukkitârlit! Tamaunga ᴋailit tagva oᴋauseᴋarlutiglo; erᴋartortigêlilauᴋta!

² Kia pângat ᴋairᴋovaûk idluarnermik naipitsẽnartoᴋ, arvertalreangat nane? Kia nallojut pijaurᴋovagît, attanersuit sãlagijaurᴋovlugit tâpsomunga? Saviksoangata illingatipait pujortut, pittiksingata illingatipait sanniktitut tiktaujutitut.

³ Unangmigamigillo, ingergavoᴋ ᴋanoetoᴋarane apᴋome pissugvigingitamine sivorngagut.

⁴ Kia tamanna piniarᴋaûk nãmaksitillugolo? Kairᴋojijub kinguvârênik (nunaᴋsûb) pigiarninganit. Uvanga Nâlegaᴋ tâmnauvunga, sivorliojunga kingordlernelo tâmnatsainaᴋ.

⁵ Kikkertat takogamitsuk, erᴋsilerput, nunaᴋsûb kiglingit sajukpilukput, ᴋaglivlutik aggerput.

⁶ Ikajortigêkput oᴋarlutik attunit inûᴋatiminut: Aksut!

⁷ Inungoamik sanasôᴋ manigoivoᴋ goldelerijomik, maniksaijoᴋ ujaratsiakut manigoivoᴋ katjuktomik katjugvingme, oᴋarlunelo kusseᴋsiamut nippititaumajoᴋ pivlugo: tamanna nãmakpoᴋ — kikkianullo atsungerpât, aulataujungnarᴋonago.

⁸ Igville Israêle kivgara, Jâko anerijara, Abrahab nagliktima kinguvânga,

⁹ Nunaᴋsûb issuanit ailauᴋpagit, ᴋairᴋovlutit kiglinginit, oᴋarvigivlutillo imâk: kivgarivagit, anerigapkit nachoginak.

¹⁰ Sivoraniarnak, uvanga illagigamga; nangiarniarnak, uvanga Gûdigigamga. Pitsartutipagit ikajorlutillo, illa serngnigivagit tallerpimnut idluarsaijomut.

¹¹ Ahâk, mittautaujomârput kangusuktitauvlutiglo ômigijitit illũnatik, suksaujungnairtitaujomârput nungutauvlutiglo illingnut akkerartortut.

¹² Kenneromârpattit, nagvârnagillo inuit akkerartortut illingnut, suksaujungnairtitaujomârput nungutauvlutiglo inuit sorsuktut illingnut.

¹³ Uvanga Nâlegaugama Gûdit, tallerpikkut illingnik tigusijoᴋ oᴋarvigivlutillo: Sivoraniarnak, uvanga ikajorpagit.

¹⁴ Sivoraniarnak, Jâko ᴋopergôjotit, Israêlikkut kattimgajose! Uvanga ikajorpagit, oᴋarpoᴋ Nâlegaᴋ. Ivlernartitoᴋ Israêlikkune piulijigivat.

¹⁵ Ahâk, ᴋamutîktut serᴋalitsijûktut, ipiktûktut, nutâktut, maggungnik kênalîktut illingatitsomârpagit. Kaᴋᴋat tukkarlugit serᴋomitsomârpattit ᴋaᴋᴋârulaillo serᴋalimajutitut illingatillugit.

¹⁶ Siamartitsomârpattit, anoremullo tiktaujomârput aᴋunamullo pêrtauvlutik. Igville Nâlegaᴋ iggiaᴋomijarvigijomârpat, ivlernartitorlo Israêlikkune nertôtigijomârpat.

¹⁷ Ajulertut ajoᴋsartullo imermik ᴋennerasuarput, peᴋangilarle, oᴋangit ᴋẽlerput imerosungnarmat, tâpkoa uvanga Nâlegaujunga tussaromavakka, uvanga Israêlib Gûdinga ᴋemagomangilakka.

¹⁸ Kôksoarnik angmartitsijomavunga ᴋaᴋᴋârulangne merᴋoᴋangitune puilavingniglo naᴋsarne; puilaveᴋajuitoᴋ tassingortitsomavara, nunalo pannertoᴋ puilavingortitsomavara imermik.

¹⁹ Zêderinik akâtsianiglo mirteniglo napârtuniglo orᴋsulingnik saᴋᴋertitsijomavunga sunaᴋangitome; zipressenik platâneniglo bukseniglo illiorᴋaijomavunga attautsekut napârtoᴋangitome.

²⁰ Takuksaurᴋovlugo illitarijaurᴋovlugolo, mallugijaurᴋovlugo tukkisijaurᴋovlugolo, Nâlekab aggangit tamakkoninga piniarmatta, ivlernartitorlo Israêlikkune tamakkoninga pingortitsingmat.

²¹ Attê, erᴋartuijutiksase ᴋaisigik, oᴋarpoᴋ Nâlegaᴋ; pitjutigijase saᴋᴋertisigik, oᴋarpoᴋ Jâkkokut attaningat.

²² Kaileritse, nallojungnairtilluta pijomârtuksanik. Sivorngane (nallautainerilauᴋtapsingnik) oᴋautitigut, ᴋanoᴋ illingangmatta, õmamiutarijomârpavut tagva tukkisivlugillo, nallautsimangâta. Ubvalo pijomârtuksanik tussartitigut.

²³ Mattoma kingorngane pijomârtuksat oᴋautigisigik uvaptingnut, tukkisijomârpogut tagva, Gûdeogapse. Illa, piniaritse ajungitomik piungitomiglõnêt, takkôtilluta sôngonersaujomautijomârpogut tagva. —

²⁴ Ahâk, suksaungitomik pivose, piniarniselo pujôvut, illipsingnik anerosuktoᴋ ôminartoᴋsôvoᴋ.

²⁵ Avangat ᴋairᴋojivunga, tikkiporlo seᴋinerub nuivianit attimnik opigosuktoᴋ. Attanerutsit tikkipait machaᴋtut illingatillugit, machaliortitut tukkartortotut machamik.

²⁶ Kia nallonarungnairtikaûk pigiarninganit? Kaujijomârpavut tagva. Kialo (nallonarungnairtikaûk), pilerᴋârtinago? Oᴋaromârpogut tagva: nallautsivoᴋ. Kissianele nallonarungnairtitsijoᴋangilaᴋ, tussartitsijoᴋangilaᴋ, tussartoᴋangilaᴋ oᴋausipsingnik.

²⁷ Uvanga sivorliovlunga Zionemut oᴋarpunga: Ahâk, tagga! Jerusalemullo tussarnertunik oᴋâlajuksanik tunidjivunga.

²⁸ Nautsertorama inuᴋangilaᴋ, ᴋaujijoᴋangilarlo taipkoa (Gûdingoat) akkornganne apersortaujungnartomik kiojungnartomiglo.

²⁹ Ahâk, illũnatik attornalungilat, piniarningillo suksaungilat, Gûdingoangit pujortut-idlutik piotsangilat.