Jesaiase 40 - Labrador Inuttitut Heritage Bible

Piulijauviksamik nutâmik.

¹ Manigolersigik, manigolersigik inuᴋotikka, oᴋarpoᴋ Gûdise.

² Kiblingnartunik oᴋauseᴋaritse Jerusaleme oᴋâlavigivlugo, kippalôninga sorairmat, idluitulliningit issumagijaujungnairmatta, maggôlimmajomik (sugiartaunermik) pingmat Nâlekab agganginit idluitullinine pivlugit.

³ Nipliajoᴋarpoᴋ: Inuᴋajuitome Nâlekab apᴋutiksanga âᴋiksorsiuk, naternamelo apᴋosinersoaᴋ maniksarsiuk Gûdiptingnut.

⁴ Kôrᴋut illũnatik kibviarlit, ᴋaᴋᴋat ᴋaᴋᴋârulaillo naᴋiglilerlit, mannẽtut manniksilit, imnat naternangolerlit.

⁵ Nâlekab ânanaunersoanga saᴋᴋertitaujomârmat, uviniggillo illûnamasiatik takojomârpât; Nâlekab ᴋanninga oᴋarmat.

⁶ Okoᴋsê, oᴋartoᴋarpoᴋ: Oᴋâlagit! Kiojoᴋarivoᴋ: Kanoᴋ oᴋâlajuksauvêk? Imâk: Uviniggit illũnatik iviksukatitut-iput pinarnarningallo nuvugulaktut-ipoᴋ natername.

⁷ Iviksukat pannilerput. nuvugulaillo ᴋunorlerput Nâlekab anerningata suppormagit. Illa, inuit iviksukatitut-iput.

⁸ Iviksukat pannilerput, nuvugulaillo ᴋunorlerput, Gûdible oᴋausinga issoᴋangitomut itsomârpoᴋ.

⁹ Zione, tussarnertunik oᴋâlajuksaujotit, majorarit ᴋaᴋᴋamut poᴋtojomut; Jerusaleme, tussarnertunik oᴋâlajuksaujotit, nippeᴋarit sôngojomik, nipliadlarit sivoranaglo; Jûdab iglugasaksoangit oᴋâlavigikit: Ahâk, tagga Gûdise!

¹⁰ Ahâk, Nâlegaᴋ Gûde pitsartujoᴋsôvlune aggerpoᴋ, tallingalo ajugauvoᴋ. Ahâk, akkiliutiksaminik najorteᴋarpoᴋ, akkijutingalo sânganẽpoᴋ.

¹¹ Mianersijotut kattimajoᴋotine mianerivait. Saugârait kattitipait tallerminut sârdliarlugillo, saukkallo amâmaktitsijut tassiutsiarpait.

¹² Kia imaᴋsuit ôktorᴋagît, ittimaminut ᴋalluvlugit? ᴋilak issakterlugo aggangminut, nunaᴋsûb ivjungit ôktûtemut pitillugit, ᴋaᴋᴋat ôktorlugit oᴋumailutanut ᴋaᴋᴋârulaillo kiktitautîngnut?

¹³ Kina Nâlekab anerninganik aulatsivâ? Kialo attanertuijotut ajoᴋertorᴋaûk?

¹⁴ Kina appersorᴋaûk, sillatunermik tunnitjiviojomavlune? Kimullo ajoᴋertortauvâ idluarsaijub apᴋutiksanganik, kimullo ajoᴋertortauvâ illisimanermik, kialo ajoᴋertorᴋaûk sillatujub apᴋutiksanganik?

¹⁵ Ahâk, nallojut unurningit issumagijauvut tâpsomunga kuttetut imertautemit kussertotut, sannikulluktut kiktitautîngnẽtotut. Ahâk, ᴋikkertat sannikutitut pêrpait.

¹⁶ Libanone amigaluarpoᴋ ikkoalautiksamut, nergjutingillo amigaluarput tunergutiksamut ôtaksamut.

¹⁷ Nallojut illunamasiatik sunaungitotut-iput sângane, mingnerôvut aglât sunaungitomit piungitôvlutiglo.

¹⁸ Kinamik tagva Gûde adseᴋartitsomavisiûk? Sumiglo adsiojuksamik tâpsomunga sanajomavisê?

¹⁹ Sanasôᴋ inungoamik kovisivoᴋ, goldelerijub ᴋallineᴋartipâ goldemik, ᴋelaumgujârsungniglo silbereojunik pitatserlugo.

²⁰ Aklunermut tunergutiksaᴋatsiangitub ᴋejuk auᴋangangitoᴋ anerivâ, inungoaliorte illisimajoᴋ ᴋeneriartorpâ, inungoamik soᴋosiniangitomik sanarᴋovlugo.

²¹ Kaujingilasê? tussangilasê? kiglinganit oᴋaudjaungilasê? nunaᴋsûb tungaveᴋartitauninganik (kinamut) tukkisilungilasê?

²² Tâmnauvoᴋ nunaᴋsûb angmalokitâb ᴋollâne inneᴋartoᴋ. Inungit piglertaujârtutitut illingavut (takpiksomunga). Kilangmik issivitaksatut issivitsivoᴋ tassiterlugo tuppersoatut, inûb iglogijaksangatut.

²³ Nertortaujunik piojungnairtitsijoᴋ, attanerit nunamẽtut suksaujungnairtillugit.

²⁴ Illijautainatuinartillugit ivjomut, karngasortautainatuinartillugit, napârtungata amângit siamalitainatuinartillugit ivjomut suppolerêrpait; pannilerput tagva, anorersoamut tiktauvlutik sanniktitut.

²⁵ Kinamik adseᴋartitsomavisingâ, adsigivlugo perᴋovlunga? oᴋarpoᴋ ivlernartitoᴋ.

²⁶ Arloritse takovluselo! Kina makkoninga pingortitsivâ? annititsijoᴋ unurninginik kittillugit attingillo taivlugit, ajugaᴋangitoᴋsôngmat pitsartujoᴋsôvlunelo; saᴋᴋijângitoᴋangilaᴋ attautsemiglõnêt.

²⁷ Jâkokkut illipse, sôᴋ oᴋarᴋisê, illipselo Israêlikkut, sôᴋ oᴋarᴋisê: Apᴋutivut ijersimavoᴋ Nâlekamut, idluarsartaujutiksavullo kamagijaungilaᴋ Gûdemut?

²⁸ Kaujimangilasê, tussalungilasê, Nâlegaᴋ Gûdeongmat issoᴋangitoᴋ, sillaᴋsûb kiglinginik pingortitsijoᴋ? Merngortoranelo nukkeᴋarungnailungilaᴋ, sillatuninga inornarpoᴋ.

²⁹ Merngortortoᴋ nukkeᴋartipâ ajulertublo nukkinga angijorortipâ.

³⁰ Nukappiat merngortoralloarput nukkeᴋarungnairlutiglo, inôsuktullo aᴋpallertudlaralloarput,

³¹ Kissianele Nâlekamik tatteᴋartut pitsartunermik nutâmik tunitjiviovut, nektoraliktitut tingilerput esaromingnut, akpangerput nukkeᴋarungnaitsanatik, arvertarput merngortorungnaratik.