Jesaiase 38 - Labrador Inuttitut Heritage Bible

Hiskia ᴋanimadlarpoᴋ.

¹ Nalliutome taipsomane Hiskia ᴋanimasermut tokonartomut tikkitauvoᴋ. Nallautaijublo Jesaiasib Amosib erningata tikkipâ oᴋautilâllo: Imâk Nâlegaᴋ oᴋarpoᴋ: Igloᴋotit oppalungaijaruk, toᴋoniaravit inôjungnairniarlutillo.

² Tagva Hiskiab kênane sâtipâ iglub ᴋarmanganut, Nâlegarlo tuᴋsiarvigivâ,

³ Oᴋarlunelo: Erᴋailaurittôᴋ, Nâlegaᴋ, sângne arvertalaurama nellâgôrlunga, ômatipkullo illuengarlunga, nãmagijarniglo piniarlunga! Hiskialo ᴋugviudlalerpoᴋ.

⁴ Nâlekablo oᴋausinga Jesaiasemut pivoᴋ oᴋarlunelo:

⁵ Hiskiamut oᴋariartorit: Imâk oᴋarpoᴋ Nâlegaᴋ, atâtagilauᴋtavit Dâvidib Gûdinga: Tuksiarnit tussarpara, ᴋugvitillo takovakka. Ahâk, inôserilauᴋtarnut illautitsijomavunga jârinik 15 nik sulle.

⁶ Piulijomavagillo Assiriamiut attaningata agganginit iglugasaksuillo tamakkoa, serngnigijomavakkalo iglugasaksuit tamakkoa.

⁷ Tamannalo nallunaikutaksarivat Nâlekamit, Nâlegaᴋ oᴋautsine malliklugit taimailiorniarmat.

⁸ Ahâk, tachaᴋ majutine aᴋarᴋâlauᴋtoᴋ Ahasib majutingine ammut seᴋinikut uttertitsomavara kingumut majutinik tallimaujortunik.

⁹ Tamadja Hiskiab Jûdakkut attaningata aglalauᴋtangit, ᴋanimarᴋârlune âᴋiktaungmat ᴋanimaserminit.

¹⁰ Oᴋarpunga: Uvluksama unurningit ᴋetteratuinarmatta, ingergajariaᴋalerêrpunga anernerit inningata itterviksoanginut, aᴋsârtauniarlunga jârima simnikunginik.

¹¹ Oᴋarivunga: Nâlegaᴋ takojungnairniarpara, illa Nâlegaᴋ inôjut nunanganne. Inuit tautugungnairniarpakka, anernerit inningannẽtut akkorngannẽniarama.

¹² Igluga aulatauvoᴋ nûtitauvlune uvamnit mianersijub tuppingatut. Anorâksaliortitut inôsimnik immusivunga, (Nâlekable) kiktorarpânga pergaivingmit. Uvlorme unnulerᴋârtinago nungutiparma.

¹³ Issumavunga: ᴋaulerᴋârtinago saunikka tamaita serᴋominiarpait loevetut. Uvlorme unnulerᴋârtinago nungutiparma.

¹⁴ Alavunga tullugârsutut, akpingevaksoatut; taubetut anersaumivunga; ijîkka sangẽdlarlutik ârlorpuk: Nâlegaᴋ, ãniadlarpunga, inûlilaungminga!

¹⁵ Kanoᴋ oᴋartuksauvêk? Angervigivânga, taimaglo piniarpoᴋ. Jârine tamaine inôtillunga uvloᴋsiorlunga majoraromavunga kattimaviksoamut tarnima kiksarutigilauᴋtanga pivlugo.

¹⁶ Nâlegaᴋ, tamakkoa inôjutigivait inuit, tarnimalo tamakkoa tamaita inôjutigivait. Nakkoᴋsitillunga inôtilaunga!

¹⁷ Ahâk, kappiasungnerilauᴋtara illingavoᴋ idluarᴋutiksamnut. Igvit tarniga erᴋilugo piulivat ittersâlungmit asserortauvingmit. Idluinikka tamaita tunnungnut egipattit.

¹⁸ Anernerit inningannẽtut nertorlungilâtit, toᴋungajullo opigingilâtit; ittersâlungmut attersârtut nertornarnit nerriugilungilât.

¹⁹ Inôjut, illa inôjut nertorpâtit, sôrlo uvanga pigama uvlome. Atâtab nertornarnit ᴋaujijautilârpâ ᴋitorngaminut.

²⁰ Nâlekab piulijartorpânga, taimaimat tuksiarutsinik imgeromavogut Nâlekab iglungane uvlut tamaita inôtilluta.

²¹ Jesaiaselo oᴋarpoᴋ: Faiginik makpasimajunik attulit, illivlugit mangiptatut soggormut, nakkornersauniarpoᴋ tagva.

²² Hiskiale oᴋarpoᴋ: Suna nallunaikutaksarivigô, majorartuksaumangârma Nalekab iglunganut?