Jesaiase 37 - Labrador Inuttitut Heritage Bible

Sanherib sãlagijauninganik.

¹ Attaneruble Hiskiab tamakkoa tussaramigit, annorâne allikpait pôksajaniglo ulliᴋarlune Nâlekab iglunganut itterpoᴋ.

² Eliakilo iglome angajoᴋaunerôjoᴋ Sêbnalo aglakpaktoᴋ ajoᴋertuijullo angajudlit tillivait nallautaijomut Jesaiasemut, Amosib erninganut, pôksajanik ulliᴋartillugit.

³ Tâpsomungalo oᴋarput: Hiskia imâk oᴋarpoᴋ: Uvloᴋ tamanna uvlôvoᴋ kappiasugvik, sugiartauvik mittautigijauvik. (Imâglo illingavoᴋ sôrlo): nutaᴋᴋat pâmut aporalloarmatta, erninermut nukkiksaᴋangilaᴋ.

⁴ Nâlegaᴋ Gûdit tussarniangikune Rabsakib oᴋausinginik illũnainik, tillijaumajub angajoᴋâminut, Assiriamiut attaningannut, Gûdemik ômajomik mittauteᴋalerᴋovlugo. Imaᴋâ sugiarniarpâ oᴋautsit pivlugit Nâlekab Gûdivit tussartangit. Tagva igvit amiakôjut, ᴋemaktaujut sulle tuksiarutigilaukit.

⁵ Attaneruble Hiskiab kivgangit Jesaiasemut tikkingmatta,

⁶ Jesaiasib tagva oᴋautivait: Angajoᴋâse oᴋautisiuk: Imâk oᴋarpoᴋ Nâlegaᴋ: Sivorajuksaungilatit oᴋautsit tussartatit pivlugit, Assiriamiut attaningata kivgangita attortangit mittautigivlunga.

⁷ Ahâk, anernelukamik tunidsivigijomavara, tussaumajamiglo tussarune, utterniarpoᴋ nunaminut, saviksoamullo toᴋotaurᴋojomavara nunangane.

⁸ Rabsakelo uttilerame, Assiriamiut attaningat naipipâ sorsuktoᴋ Libnamut, Laggisemit aularsimajoᴋ tussarlugo.

⁹ Tagva Tirhaka, Etiopiamiut attaningat pivlugo tussarpoᴋ oᴋartomik imâk: Ahâk, aularpoᴋ sorsugvigijartorlutit. Tamattominga tussarame, tilliklerpoᴋ amma aijuksanik Hiskiamut imâk oᴋarᴋojivlune:

¹⁰ Imâk Hiskia Jûdakkut attaningat oᴋautisiuk: Uivêrijautailitit Gûdeᴋotingnut tattigijarnut oᴋarlutit: Jerusaleme tunijauniangilaᴋ Assiriamiut attaningata agganginut.

¹¹ Ahâk, tussarpotit Assiriamiut attaningata piniarninginik nunanut illũnainut, ᴋanoᴋ nungutingmagit; igvillo piulijaujuksaunajarᴋêt?

¹² Inûᴋatigêksuit sivorlerijama asserorsimajangit piulijaumavât Gûdeᴋotimingnut imaitut: Gôsanemiullo Hâranemiullo Rêtsefimiullo Edeniblo kinguvângit Tellassaremẽtut?

¹³ Hâmatemiut attaningat naûk? Arpâdemiullo attaningat, iglugasaksuillo Sefarfaimik attelît Henablo Ivablo attaningit naûk?

¹⁴ Hiskiablo aglait tamakkoa tiguvait tillijaujut agganginit atuarpaillo, majorarlunelo Nâlekab iglunganut issivipait Nâlekab sânganut.

¹⁵ Hiskialo tuksiarpoᴋ Nâlekamut oᴋarlune:

¹⁶ Nâlegaᴋ, ᴋilangmiugasaksuit Nâlegangat, Israêlib Gûdinga, Kêrubit ᴋollãne iksivajotit, igvit kissivit Gûdeovotit nuname attaniovingnut tamainut; igvit ᴋilangmik nunamiglo pingortitsilauᴋpotit.

¹⁷ Nâlegaᴋ, siutîkik manikik tussarlutillo; Nâlegaᴋ, ijîkik uitilaukik takkolutillo; Sanheriblo oᴋausingit tamaita tussalaukit tillikliutijangit, Gûde ômajoᴋ mittautigijomavlugo.

¹⁸ Nallautsivoᴋ, Nâlegaᴋ: Assiriamiut attaningita asserorpait attaniovît tamaita nunangillo.

¹⁹ Gûdingillo egipait ikkomamut, Gûdeongimatta taipkoa, inuille aggangita sanajangit, ᴋejungovlutik ujarauvlutiglo; taipkoa nungutipait.

²⁰ Mãnale, Nâlegaᴋ Gûdivut, piulilauᴋtigut agganginit, attaniovît nunamẽtut illũnamatsiatik illitarsilerᴋovlugit, igvit kissivit Gûdetôgavit.

²¹ Tagva Jesaiase, Amosib erninga tilliklerpoᴋ Hiskiamut oᴋaudjaurᴋolâllo: Imâk oᴋarpoᴋ Nalegaᴋ, Israêlib Gûdinga: Tuksiarvigigamga Sanheri, Assiriamiut attaningat pivlugo,

²² Tagva Nâlekab oᴋausingit taimna pivlugo imaiput: Uigasûb Zionib panningata nachogivâtit mittautigivlutillo, Jerusalemib panningata illeᴋettamârutigivâtit.

²³ Kina mittautigiviûk oᴋarnerlûtigivlugolo? kinamut nippeᴋadlarᴋêt? Arlorpotit, ivlernartitoᴋ Israêlikkune akkerartorlugo.

²⁴ Kivgakkut Nâlegaᴋ mittautigivat oᴋarlutillo: Kammuteᴋarlunga unuktovaksoarnik majorarpunga ᴋaᴋᴋat ᴋânginut, Libanonib issuanut, zêdereᴋotingillo poᴋtojut zipresseᴋotingillo anerimajut nakkapakka, tikkipara ᴋângata issua perorsêvialo napârtolik.

²⁵ Uvanga imeᴋsiorlunga imerpunga, ittikamalo allûgingnut Egiptenib kôksoangit illũnaita ipteriliktipakka.

²⁶ Tussalaungilatît, uvanga tamanna itsaᴋsoame taimailingatilaurapko, itsaᴋsoarnit kajusimautigivlugo? Mãnale nalliutipara, iglugasaksuit sôngojut asserortaurᴋovlugit serᴋomakungortitauvlutik.

²⁷ Inungillo nukkingerutivut mungungavlutiglo kangusuklutiglo, iviksukatitut-ilerput naternamẽtutitut, perorsijatitullo tungujortatitut, iviksukatitullo iglut ᴋanginẽtutitut, iviksoatitullo ᴋunorlerêrtutitut innilerᴋârtinagit.

²⁸ Nunaᴋarnit itternillo anninillo ᴋaujimavakka, pikkablavigigamgalo.

²⁹ Tamanna pivlugo pikkablavigigamga, pingijainillo siutîmnut ᴋongmuarsimangmat, ᴋingarmiutaᴋartitsomavagit kingmiararlo illivlugo ᴋanernut uttertitsomavagillo apᴋutigilauᴋtakkut tamaunga.

³⁰ Tamannalo nallunaikutaksarivat (Hiskia oᴋaudjauvoᴋ): Jâreme tamattomane nerrijuksauvose ingminik perortunik jâriblo aipangane ingminik nuijomârtunik, jâriglo pingajuangne karngasoileritse kattersoivluselo, vaineliksaniglo illiorᴋaileritse nerrivluselo paunganginik.

³¹ Jûdakkullo piulijaumajut amiakôjullo amma amâᴋaromârivut attimikkut paungaᴋaromârlutiglo ᴋollimikkut.

³² Amiakôjut Jerusalemit annijomârmatta piulijaumajullo Zionib ᴋaᴋᴋanganit. Nâlekab ᴋilangmiugasaksuit Nâlegangata illungertorninga tamattominga piniaromârpoᴋ.

³³ Tamanna pivlugo Nâlegaᴋ oᴋarpoᴋ imâk Assiriamiut attaningat pivlugo: Iglugasaksoarnut tamakkonunga tikkituksaungilaᴋ, ᴋargjorlo attauserlõnêt pittiksautijaksaringilâ illuannut, sappûlutaksamiglo tikkitoᴋartuksaungilaᴋ tagvunga, talluliortoᴋartuksaungilarlo avatâtigut.

³⁴ Apᴋutigilauᴋtamigulle tamaunga uttertuksaugivoᴋ, iglugasaksoarnut tamakkonunga tikkinane, oᴋarpoᴋ Nâlegaᴋ.

³⁵ Iglugasaksuit tamakkoa serngnigijomagapkit piulijomavlugillo pivlunga kivgaralo Dâvide pivlugo.

³⁶ Tagva Nâlekab Engelinga aᴋᴋarpoᴋ, Assiriamiut tangmârvianne toᴋojartorlugit angutit 185,000 it. Uvlâkullo makkingmatta, ahâk, toᴋungajoᴋarpoᴋ illũnâne.

³⁷ Assiriamiullo attaningat Sanheri parngnailerpoᴋ, aularlunelo angeralerpoᴋ nûtsungnairlunelo Ninivemit.

³⁸ Pijoᴋarporlo imâk: Gûdime Nisrub iglungane tuksiarmat, ernîkita Adrammeleggib Sarêtseriblo toᴋopâk saviksoamut ᴋemâvlutiglo nunamut Araratemik attelingmut. Erningalo Assarhaddo attaningolerpoᴋ innangerlugo.