Jesaiase 36 - Labrador Inuttitut Heritage Bible

Jerusalemib illumajauninganik Sanherimut.

¹ Attanerub Hiskiab jâringita 14 ninganne Sanheri Assiriamiut attaningat takpaungarpoᴋ, Jûdakkut iglugasaksoangit sôngojut illũnaita sorsugvigivlugit, aᴋsârnigarivaillo.

² Tagva Assiriamiut attaningata Rabsake (angajoᴋaunerôjoᴋ) Laggisemit tillivâ Jerusalemut attanermut Hiskiamut, sorsuktuksaᴋsoarnik illaᴋartillugo. Noᴋᴋangalerporlo tassiub ᴋolliub kôngane, errortuijut errortuivingata apᴋosinersoangane.

³ Tâpsomunga tagva annivut Eliaki, Hilkiab erninga, iglome angajoᴋaunerôjoᴋ Sêbnalo aglakpaktoᴋ Ioalo, Assafib erninga, aglalerijoᴋ erᴋaumajaksaujunik.

⁴ Rabsakiblo oᴋautivait: Hiskia oᴋarvigijartorsiuk: Attanersoaᴋ, Assiriamiut attaningat oᴋarpoᴋ imâk: Tetteᴋarvik tattigijat sunauvâ?

⁵ Oᴋarpunga: oᴋausetuinauvut sullingitut, issumaᴋarneraravit pitsartuneᴋarnerarlutillo sulle sorsungnermut. Kina sungertûtigiviûk, nâlegungnairamga?

⁶ Imaᴋâ ajaupiamik ipsominga suvlolingmik napvaujimajomik, Egiptenemik tattiksaᴋarpotit. Ajakpartoᴋalerangat taipsomunga, ittimanga kappivâ puttorlugolo. Taimailingavoᴋ Farao Egiptenemiut attaningat illũnainut tatteᴋartunut tâpsominga.

⁷ Oᴋautigupsingalo: Nâlegaᴋ Gûdivut tattigivavut! — (oᴋarpunga): Tâmnaungilâᴋ Hiskiab pêjaivigijanga opigijauvinginik ᴋaᴋᴋanêtunik tunerguserveᴋotinginiglo, oᴋarlune Jûdakkunut Jerusalemiunullo: Tunerguserviub ôma (Jerusalemẽtub, sângane tuksiartuksauvose?)

⁸ Attêle, angajoᴋâra Assiriamiut attaningat angunasuaruk! Horsinik 2,000 nik tunnidsivigijomavagit, ablângajoᴋartitsijungnarmangârpit taipkoninga.

⁹ Kanoᴋ tagva ᴋemâtitsungnarᴋiûk aulatsijoᴋ attauserlõnêt, angajoᴋâma kivgangita mikkinerpângita illangat? Igville Egiptenemiut tattigivattit ᴋammutit horselijartullo pivlugit.

¹⁰ Nâlegaᴋ illaginago takpaungarasugivingâ nunamut tamattomunga asseroriartorlugo? Nâlekab oᴋautivânga: Aularit nunamut tamattomunga asseroriartorlugo.

¹¹ Eliakile Sêbnalo Joalo oᴋarput Rabsakemut: Kivgatit oᴋarvigikit Siriamiut oᴋausingit attorlugit, tukkisitsiaraptigik, oᴋarviginata Jûdit oᴋausingit attorlugit, innugasaᴋsuit avaloᴋsuit ᴋânginẽtut tussarmatta.

¹² Tagva Rabsake oᴋarpoᴋ: Angajoᴋâma tillivângâ angajoᴋângnut illingnullõnêt, oᴋauseᴋarᴋovlunga taimaitunik? tillilungilângâtauᴋ angutinut avaloᴋsuit ᴋânginẽtunut, annarmingnik nerrerᴋovlugit itteromingniglo imerᴋovlugit illagivluse?

¹³ Tagva Rabsake nangerpoᴋ nipliavlunelo nipperᴋortojomik, Jûdit oᴋausingit attorlugit: Tussaleritse attanersûb, Assiriamiut attaningata oᴋausinginik!

¹⁴ Imâk attaneᴋ oᴋarpoᴋ: Uivêrijautailititse Hiskiamut, piulijungnangimasse.

¹⁵ Manigortautailititse Hiskiamut, Nâlekamik tatteᴋarᴋongmasse oᴋarlune: Nâlekab piuliniarpâtigut, iglugasaksuillo makkoa tunijauniangilat Assiriamiut attaningata agganginut.

¹⁶ Hiskia nâlengniarasiuk! Imâk Assiriamiut attaningat oᴋarmat: Ullapirsauteᴋaᴋatigisinga annivigivlungalo, tagva illũnase attunit nerrijuksauvose napârtoᴋotipsingnit vaineliksanit faigeliksanillo imertuksauvluselo imeᴋtarveᴋotipsingnit.

¹⁷ Tikkerᴋârtinanga ailuselo nunamut, nunapse adsinganut, nunamut pitalingmut ᴋaᴋᴋôjaksanik vainiksaniglo, nunamut pitalingmut ᴋaᴋᴋôjanik perorsêvingniglo vaineliksatalingnik.

¹⁸ Sâlagijauniarase Hiskiamut, oᴋarmat: Nâlekab piuliniarpâtigut. — Nallojut Gûdingita nunaᴋotitik piulivattigîk Assiriamiut attaningata agganginit?

¹⁹ Hâmatemiut Arpâdemiullo Gûdigijangit nanẽᴋât? Sefarfaimiullo Gûdigijangit nanẽᴋât? Samârialõnêt aggamnit piulivatsûk?

²⁰ Nunat tamakkoa Gûdigijangita illũnatik nallît piuliklermatta nunaᴋotimingnik, Nâlekab Jerusaleme piuliniarpaûk aggamnit?

²¹ Nippangerpulle kiolungilâllo sunamik, attaneᴋ perᴋojingmat oᴋarlune: Kioniarasiuk!

²² Tagva Eliaki, Hilkiab erninga iglome angajoᴋaunerôjoᴋ Sêbnalo aglakpaktoᴋ Joalo, Assafib erninga, aglalerijoᴋ erᴋaumajaksaujunik Hiskiamut tikkiput, annorâtik alliktorlugit, unipkautivâllo Rabsakib oᴋausinginik.