Jesaiase 35 - Labrador Inuttitut Heritage Bible

Okpertôᴋatigêt pilloringningannik.

¹ Sunakajuitok perortoᴋangitorlo ᴋuviasugomârpuk, naternarlo serrijomârpoᴋ ânanausijauvlune paunaujaujârtutitut.

² Ananausivlune serrijomârpoᴋ ᴋuviasuklunelo iggiaᴋomijarlunelo. Libanonib ânanauninganik tunidsiviojomârpoᴋ, Karmelib Sâroniblo pinarnarningangnik. Nâlekab ânanauninga takkojomârpât, Gûdipta pinarnarninga.

³ Aggait nukkingertut pitsartutisigik, sêrᴋullo majangajut nekoᴋsitisigik.

⁴ Oᴋautisigik õmatimikkut kappiasuktut: Maksoatitse sivoraniaraselo! Ahâk, Gûdise tikkilerpoᴋ akkilêjartorlune Gûdib akkiliutânik. Tikkilerpoᴋ piulijomavluse.

⁵ Tagva tautungitut ijingit uititaujomârput, tussângitullo siutingit angmartitaujomârput.

⁶ Tagva tussiaktut pangaligomârput tuktotut, oᴋajuitullo oᴋangit iggiaᴋomijaromârput, imersuit puilajomârmatta puilaveᴋangitome kôksuillo natername.

⁷ Sioraliksoarnelo ᴋappialajoᴋ tassingoromârpoᴋ, nunamelo pannertome puilaveᴋaromârpoᴋ. Terrianiangajut innigilauᴋtangit tangmârvigijomârpait, iviksukaᴋaromârporlo tagvane ivingniglo iviksoarniglo suvlolingnik.

⁸ Tagvanelo apᴋosineᴋaromârpoᴋ apᴋutiksamik. Apᴋomik ivsornaitomik taijaujomârpoᴋ taimna. Ivsornartomut pissugviksaungilaᴋ, taipkonungale attoraksaujomârpoᴋ. Ingergajut tagvûna, sillaitut aglât tammaromângilat.

⁹ Tagvane loeveᴋaromângilaᴋ, ômajomiglo kêsuktoᴋsoamik tagvûna pissuktoᴋaromângilaᴋ tagvanẽtoᴋaranelo. Uttertitaujulle pissugomârput tagvane.

¹⁰ Nâlekab uttertitangit uttileromârput, Zionemullo tikkitsomârput iggiaᴋomijarlutik; ᴋuviasungnerub nâksaungitub ᴋollangiaromârpait, ᴋuviasungnerub serrinerublo tikkitsomârpait; kiksarnerlo anersauminerlo ᴋemâjomârpuk.