Jesaiase 34 - Labrador Inuttitut Heritage Bible

Innugasaᴋsuit erᴋartortauningannik.

¹ Kaititse, illipse, nallojose tussarniarluse, nunaᴋatigêktoselo kamatsiaritse, nuna tussarmile tâpsomanẽtullo, sillaᴋsoaᴋ perortungillo illũnatik,

² Nâlekab nallojut illũnaita ningaumajârvigingmagit, kattimajoᴋotingillo tamaita ᴋanningajârvigingmagit; unertûtigijomârpait toᴋotaurᴋovlugit.

³ Toᴋotaujut egitaujomârput, toᴋungajullo tippelungningat ᴋongmuaromârpoᴋ, ᴋaᴋᴋallo aunginut auktitaujomârput.

⁴ Kilaub pitangit illunamasiatik auniojomârput, ᴋilaillo immujaujomârput aglaktitut, pitangillo illunamasiatik ᴋunnorleromârput, sôrlo napârtub vaineliksab millukatangit ᴋunnorlerpangmatta, millukataktullo pannertotut napârtome faigeliksame.

⁵ Saviksoara ᴋilangme tallatotut illingavoᴋ; takkuitse, aᴋᴋaromârpoᴋ Edomemut nunaᴋatigêksoarnullo unertûtigijamnut sugiartauviksamut.

⁶ Nâlekab saviksoanga auliksôvoᴋ, sallumaipoᴋ orᴋsumut saugârsuillo angusaluillo aunginut, tuktungajullo taᴋtorutinginut, Nâlekab tunergutiksaᴋ pijarêrmago Bosrame toᴋotsinersoarlo Edomib nunangane.

⁷ Tagva tuktuvaksuit nungutauvut taipkoa illagivlugit, tuktuvaillo angutingit tuktuvait ᴋuinijut illagivlugit. Nunangat tallasimajotut aungmut illingavoᴋ, ivjungalo orᴋsugasaulerpoᴋ.

⁸ Tâmnaungmat uvloᴋ Nâlekab sugiarviksanga, jâre akkiorviksaᴋ Zione pitjutigivlugo.

⁹ Kôngit kutsuâlungoromârput, ivjungalo orᴋsorutingoromârpoᴋ, illa nunangat ablatsaujomârpoᴋ kutsuâlungmut ikkitaumajomut.

¹⁰ Unnuakullõnêt uvlokullõnêt ᴋammitaksaungilaᴋ, issinga ᴋongmuaromârpoᴋ soraijuidlune, kinguvângita kingorlinginut inniksaujungnairomârpoᴋ, attautsemiglõnêt pissuktoᴋaromângilaᴋ tagvûna issoᴋangitomut.

¹¹ Nerlit puvialiksuit iblâᴋosingajullo innigijomârpât, ikkêtojullo tullukallo tagvane inniksarsioromârput. Nâlekablo noᴋaᴋservallaut attoromârpâ taipkonunga asserorniarlugit, naggosaullo nunguniarlugit.

¹² Attaningit taijaujariaᴋaromârput attaniojunik nunaᴋangitunik, attanersoangillo nungutaujomârput.

¹³ Iglutsianginelo ukpigaᴋaromârpoᴋ kakkilautilingnik, perornerdluktullo ônarnartut kakkilautiggillo iglunginẽtsomârput sanamatsiartune; terrianiangajut innigijomârpait, staraussillo tagvanêtsomârput.

¹⁴ Omajoâluit nujuartut amarᴋullo naipiutijomârput tagvane, angusaluillo auᴋtoromârput illamingnut, assẽnaᴋ unnuaᴋsiut tagvanetauᴋ inniksarsioromârpoᴋ innilangaviksarsiolarmelo.

¹⁵ Tagvane ᴋuglugiaᴋ sukkalisôᴋ sitteᴋaromârpoᴋ maniᴋarlunelo ivavlunelo piaraᴋarlunelo tachalininganne, nektoralîttauᴋ tagvane kattijomârput nalliat aipaminut.

¹⁶ Nâlekab aglangine ᴋenneritse atuarsivluselo; attautsemiglõnêt nallautsingitoᴋaromângilaᴋ attautsemiglõnêt aglaksimangitoᴋaromânginivoᴋ. Tâpsoma ᴋaningata tamanna perᴋovâ, tâpsomalo anerningata kattersorpait.

¹⁷ Tâmnalo immerarpoᴋ pivlugit, aggangitalo ôktûtemut illangiutitipait, kingormgujaksaᴋarᴋovlugit nungusuitomik, tagvangallo nûtsomângilat.