Jesaiase 33 - Labrador Inuttitut Heritage Bible

Assiriamiut pidlartauvut, Zione piulijauvoᴋ.

¹ Kappianarmek igvit asserorsaijotit, nangmineᴋ asserortaulungigalloartotit sulle; igvillo aksorôtjijotit, nangmineᴋ aksorôtijaulungigalloartotit sulle. Asserorsainit pijarêrungne, igvittauᴋ asserortaujomârpotit; aksorôtjineᴋ nãmaksigungne, igvittauᴋ aksorôtijaujomârpotit.

² Nâlegaᴋ, nâpkigilaungmitigut, igvit nerriugigaptigit; tallerilaptigit ᴋaut tamât, ikajortigilaptigit kappianartoᴋartillugo.

³ Nunaᴋatigêksuit ᴋemâsârput nippevaksoarnit, nallojullo siamalerput, igvit nikovikuvit.

⁴ Aᴋsârnigarijase nungutaujomârput, sôrlo piglertaujârtut nungutsivangmatta, piglertatitut pangaliktutitut (akkerartortise) pangaligomârput tagvane.

⁵ Nâlegaᴋ ᴋotsikpoᴋ, ᴋotsiktome inneᴋartoᴋ. Zione pitatserpâ erᴋartuitsiarnermik idluarnermiglo.

⁶ Uvluksatillo terlingnaromârput, piulijaujutiksat, illisimanartullo, illitarsijutiksallo amigaromângimatta; nâlengneᴋ Nâlekamik pituarijomârpâ.

⁷ Ahâk, tillijangit nipliadlarput sillame, ullapirsaijartorᴋojaujut illungertorlutik ᴋeavut.

⁸ Apᴋosinit inuerutivut, pissuktoᴋangilaᴋ apᴋosinerme attautsemiglõnêt. Angerutigijane serᴋomikpâ (Assurib attaningata), iglugasaksuit nachogivait inuillo erᴋaginagit.

⁹ Nuna takkorannêdlune pannerpoᴋ, Libanone takkominaidlune erᴋivoᴋ, Sâronelo naternauvoᴋ perortoᴋangitoᴋ, Bâsanelo Karmelelo merᴋoᴋarungnairpuk.

¹⁰ Mãna parngnaililanga! oᴋarpoᴋ Nâlegaᴋ, mãna nikovilanga, mãna ᴋotsiktomut pilanga!

¹¹ Ivingnik singaijomârpose, iviksukavinerniglo ernijomârpose; anernipse ikkomatut nungutsomârpâse.

¹² Nunaᴋatigêksuit illiortaujomârput sôrlo machait ôtaksat, sôrlo ukpigait kakkilautiggit nakkataumajut, ikkomamut ikkitaksat.

¹³ Ungasiktomẽtose, tussaleritse, ᴋanoᴋ piniarama, ᴋanitomẽtoselo kamagilersiuk pitsartunera!

¹⁴ Idluitullijut Zioneme ᴋoaᴋsârput, piungitut sajungnermut tikkitauvut (oᴋarpullo): Nallipta ikkoma nungutsijoᴋ najorlugo ajungilâ? Nallipta ikkomaᴋsoaᴋ ᴋamisuitoᴋ najorlugo ajungilâ?

¹⁵ Idluartomik arvertartoᴋ, nallâgôrtomik oᴋauseᴋartoᴋ, aksorôtjijut illusinginik ômisuktoᴋ, aggangminik ipsortuijoᴋ pilliusianik tigusijomanane, siutîngminik simiksijoᴋ inuarnermik tussaromanane, ijîngminik mattujijoᴋ idluiluktomik takkojomanane.

¹⁶ Taimaitoᴋ ᴋotsiktome inneᴋaromârpoᴋ, igloᴋsuit imnanẽtut sappûlutarijomârpait. Nerᴋiksaminik tunidsiviojomârpoᴋ, imiksaminiglo ajoᴋsaromângilaᴋ.

¹⁷ Ijîkpit attaneᴋ takkojomârpâk ânanauningane, nunalo angijôvaksôjok takkojomârpâk.

¹⁸ Tagva õmatit erᴋaijomârpoᴋ kappiasûtigilauᴋtarnik (oᴋarlunelo): Aglakpaktut nanẽᴋât? ôktorsôngojut (tunergutiksanik) nanẽᴋât? nuvugusersoanik kititsijut nanẽᴋât?

¹⁹ Nunaᴋatigêksuit iktôriktaitut takkojungnairomârpattit, oᴋauseᴋartut nallonartunik, ajornartunik, kutaktutitut oᴋauseᴋartut tukkisinangitunik.

²⁰ Takkunârit Zionemik, iglugasaksoarnik, kattimaviksaptingnik; ijîkpit Jerusaleme takkojomârpâk, inniksaᴋ terlingnartoᴋ, tuppeᴋ nuktitaujomângitoᴋ; pauktûtingit nutsuktaujomâtsengilat aklunângillo kiktorartaujomâtsanginivut.

²¹ Nâlegarle tagvane pitsartujoᴋsôjomârpoᴋ uvaptingnut, kôksuit kôllo sillidlartut inninganne, umiaᴋsuit eputaujut ingergajomângilat tagvûna, umiaᴋsuillo manugât aijomângilat tagvûna.

²² Nâlegaᴋ erᴋartuijigivavut, Nâlegaᴋ ajoᴋertortigivavut, Nâlegaᴋ attanerivavut; tâpsoma piulivâtigut.

²³ Aklunâtit ᴋassugalloarput mãna, (Zione), napârutaᴋ aulajungnangertitsengilât, saimat issivitsialungilât. Tagvale aitortuijoᴋaromârpoᴋ perᴋutinik kitiksaungitunik, sibvẽtut aglât tigusijartoromârput.

²⁴ Inuᴋatigêllo nalliannik oᴋartoᴋaromângilaᴋ: Ajulerpunga, — nunaᴋatigêt tagvane nunaᴋartut issumagijungnaiviongmatta idluinermingnit.