Jesaiase 31 - Labrador Inuttitut Heritage Bible

Egiptenemiut tattiksaungilat, Assure nungutaksauvoᴋ.

¹ Kappianarmek attâlertut Egiptenemut ikajortaujomamut, horsit tattigivlugit, ᴋammutillo sungertûtigivlugit, unudlarmatta, sorsuktuksallo horselijartut, pitsartudlarmatta; ivlernartitorle Israêlikkune ârlorvigingilât Nâlegarlo apperᴋutiginago.

² Kissianele tâmnatauᴋ sillatuvoᴋ, ᴋanoetuniglo tikkerᴋojijoᴋ, oᴋautsinelo soᴋᴋosingilait, nikovitsomârporlo, idluitullijut iglungit nãmangitullijullo ikajortuksat pidlaromavlugit.

³ Egiptenemiut inutuinauvut Gûdeonatiglo, horseᴋotingillo nerᴋeovut anernionatiglo: Nâlekablo aggane issagomârpait, ikajortuksaᴋ taimna pãlaktillugo, ikajortaujorlo ochotillugo, illũnaitalo attautsekut nungutillugit.

⁴ Imâk Nâlegaᴋ oᴋarmat uvamnut: Sôrlo loeve loeviararlõnêt kallingollângmat alliktortame ᴋollâne, mianersijut unuktut oparᴋojaukpatta tâmna pivlugo, ᴋuᴋudlartut ᴋoaᴋsârutiginagit unurningillo erᴋsiginagit, taimaidlune ᴋilangmiugasaksuit Nâlegangat aᴋᴋaromârpoᴋ, sorsugiarlune Zionib ᴋaᴋᴋangane ᴋaᴋᴋârulanganelo.

⁵ Kilangmiugasaksuillo Nâlegangata Jerusaleme sapputijomârpa, sôrlo tingmitjat piniarmatta esaromingnut, sapputjivlune piuliklerlunelo nikkasuklunelo ikajorlunelo.

⁶ Uttervigisiuk tâmna angijomik tunnutase, Israêlikkut illipse.

⁷ Taipsomane illũnatik Gûdingoaᴋotitik silbereojut Gûdingoaᴋotitiglo goldeojut egitsomârpait, aggapse sanajangit idluiloᴋutiksapsingnut.

⁸ Assurelo ochojuksauvoᴋ saviksoamut angutib pigingitanganut, nungutaujomârporlo saviksoamut inûb pigingitanganut, saviksoamit ᴋemâjomârpoᴋ, inôsuktoᴋotingillo kivgangortitaujomârput.

⁹ Kairtorijangalo (attaninga) erᴋsinermut aulajomârpoᴋ, angajoᴋângitalo ᴋemâjutigijomarpât saimat, oᴋarpoᴋ Nâlegaᴋ, ikkomaᴋartoᴋ Zioneme, igaveᴋartoᴋ Jerusaleme.