Jesaiase 30 - Labrador Inuttitut Heritage Bible

Gûde kissiat tattigivlugo pijuksauniptingnik.

¹ Kappianarmek ᴋitorngat tappatojoᴋsuit, oᴋarpoᴋ Nâlegaᴋ, kajusilertut uvanga kamaginanga, anerneralo kamaginago serngnigijiksarsiortut, idluitunik ᴋallerêktitsivlutik.

² Egiptenemut attâlertut, ᴋanera appersorᴋârnago, Faraub pitsartuninga pitsartutigijomavlugo, Egipteniblo tachalininganut ᴋemâjomavlutik.

³ Kissianele Faraub pitsartuninga kangusûtiksaujomârpoᴋ illipsingnut, ᴋemâniselo Egiptenib tachalininganut mittautiksaujomârpoᴋ.

⁴ Angajoᴋângit Zoanemẽgalloarput, tillijangillo Hanêsemut tikkisimagalloarput,

⁵ Illũnatigle kangusûtigijomârpait nunaᴋatigêt taipkoa, attornalungimatta ikajoratiglo suksaunatiglo, kangusûtiksaungmatta nachogijaunarlutiglo.

⁶ Tamadja oᴋauseᴋ inerterijutiksaᴋ ômajunut ânẽtunut. — Nunakut kappianartokut siorniornartokullo, loevit arnait loevillo angutit, ᴋuglugiarâluillo kuglugiallo ᴋassilinartut sukkalidlartullo nunagijangatigut akjartorpait perᴋutitik, illivlugit sinterᴋortojut nochait ᴋemerdlunginut, perᴋutitiglo ivlernartut, ilivlugit kamêlit ᴋemerdlunginut, nunaᴋatigêt idluaᴋutiginiangitatik aivigivlugit.

⁷ Egiptenible ikajorninga suksaunane soᴋotaungimat, taimaimat oᴋarpunga taimna pivlugo imâk: Pimmariutertoᴋ ᴋikkartoᴋ.

⁸ Ailerit tagva, aglagvingmut aglaklugo sângine, pitillugolo aglangnut, illingarᴋovlugo uvluksat kingorlerpângannut, issoᴋangitomut aglât,

⁹ Nunaᴋatigêt tâpkoa tappatojoᴋsôngmatta, ᴋitorngauvlutiglo saeglojoᴋsôjut, ᴋitorngauvlutiglo tussaromangitut Nâlekab perᴋojanginik.

¹⁰ Takkotitjuteᴋartunut imâk oᴋartut: Takkojuksaungilase! — pijomârtuksaniglo oᴋartunut imâk: Oᴋartuksaungilase uvaptingnut pijomârtuksanik nallâgôrluse. Oᴋarvigitigut manigornartunik, uivêrinartunik pijomârtuksanik oᴋaritse uvaptingnut.

¹¹ Apᴋomit pêritse apᴋosinermillo sangutitse; ivlernartitoᴋ Israêlikkune pêrsiuk kênapta sângannit.

¹² Taimaimat ivlernartitoᴋ Israêlikkune oᴋarpoᴋ imâk: Oᴋausikka nachogigapsigik, idluiluktomiglo piungitomiglo tattiksaᴋarapse sungertûtiksaᴋarluselo,

¹³ Taimaimat idluitullineᴋ tamanna illingajomârpoᴋ illipsingnut, sôrlo ᴋoppaᴋ nakkalertoᴋ, ᴋarmarsoarme poᴋtojome saᴋᴋijâlertoᴋ; tâpsoma asserorviksanga nalliutiliaᴋivoᴋ tagvainaᴋ.

¹⁴ Asserortaujomârporlo, sôrlo machatsiaᴋ serᴋomitaungmat serᴋalijauvlune ivlerijaujungnairlune; serᴋomakungitalo akkornganne nagvartaujoᴋangilaᴋ machavinermik ikkomaitûtiksamik igavingmit ᴋallutiksamiglõnêt imeᴋtarvingmit.

¹⁵ Imâgle Nâlegaᴋ Gûde ivlernartitoᴋ Israêlikkune oᴋarmat: Utterluse utaᴋᴋikupse, piulijaunajarpose, uimajârungnairluse tatteᴋarupse, pitsartuneᴋarajarpose. Kissianele pijomangilase.

¹⁶ Oᴋauseᴋarposelo: Aukak, horsit attorlugit ᴋemâlauᴋta! tamanna pivlugo ᴋemâjuksauvose. Ammalo: Kamêlelijarta pangaliktunik! tamanna pivlugo unangmijise pangaligomârput.

¹⁷ Tausendiovluse ᴋemâjomârpose attausẽnaub suanganinganit, illa tallimat suanganinginit illũnase ᴋemâjomârpose, amiakuse illingatillugit napârutatut ᴋaᴋᴋab ᴋânganẽtotut, saimaserviktut ᴋaᴋᴋârulab ᴋanganẽtotut.

¹⁸ Taimaimat Nâlegaᴋ utaᴋᴋijomârpoᴋ saimarvigijomavluse, ᴋannitsomângilaᴋ nâpkigijomavluse, Nâlegaᴋ Gûdeongmat erᴋartuijoᴋ. Pillorikput illũnatik tâpsominga nerriuktut.

¹⁹ Illipse, Zionib inungit, Jerusaleme igloᴋartose, ᴋeajungnairitse! Niplialerupse nâpkigilarpâse, akkiolârpâse mãnakut, tussarunise.

²⁰ Nâlekab tunidsivigijomâralloarpâse ᴋaᴋᴋôjamik kappiasûtaujomik, imermiglo siorniorutaujomik, ajoᴋertortitille ijeromângilat kingorngane, ijikpit ajoᴋertortitit takkojomârpait.

²¹ Siutîkiglo tussaromârpuk oᴋauseᴋartomik tunnungnit imâk: Apᴋutiksaᴋ tagga; tâmna attorsiuk! — tallerpiata tungânut saumiatalõnêt tungânut pilerangapse.

²² Gûdingoat silbereojut sanajapse amingit Gûdingoallo goldeojut sanajapse annorângit sujuktitsomârpasse êgillugillo aktarlukutitut oᴋarvigivlugillo: Pêritse!

²³ Tagva sillalungmik pititsijomârpoᴋ karngasûtinut karngasortarnut perorsêvingmut nerᴋiksaᴋartitsivlunelo perorsêviub perortunginik nekoᴋsinartunik ânanâniglo; taipsomane nergjuteᴋotitit nerrinasugomârput iviksukatalingme angidlartome.

²⁴ Tuktuvait siuterᴋortojullo ivjomik makpiteraijut nerᴋiksanik tarrêrtitaumajunik nerrijomârput, sujungaititaumajunik poagitemut pôgutaujârtomullo.

²⁵ Kaᴋᴋanelo poᴋtojune tamaine ᴋaᴋᴋârulangnelo angijune tamaine kôᴋaromârpoᴋ imeᴋadlartunik unatadlarnerub angijovaksûb nalliuningane, nuvugusersuit ocholerpatta.

²⁶ Taᴋᴋiblo ᴋaumaninga seᴋinerub ᴋaumaningatut-itsomârpoᴋ, seᴋinerublo ᴋaumaninga sîbaulijomârpoᴋ, uvlut sîbat ᴋaumaningatut taipsomane, Nâlekab inuᴋotime killingit mangipsertoromârpagit inûlijomârlaitalo ikkingit.

²⁷ Ahâk, Nâlekab attinga ᴋaningitomit aggerpoᴋ, ningausinga ikkoalavoᴋ ikkoalaningalo aᴋtornarpoᴋ, ᴋangasinâgik ᴋanningajârnermik pitalîk, oᴋangalo ikkomatut-ipoᴋ nungutitsijotut.

²⁸ Anerningalo kôksoatut-ipoᴋ kutjertotut, inûb ᴋungasinganut tikkidlune, nallojut siamartillugit poagitemut asserornartomut, nunaᴋatigêksuillo erᴋimiutaᴋartillugit noᴋilautemik tammanartomik.

²⁹ Tagva imgeromârpose, sôrlo uvloᴋsiorviub unnuangane, õmamullo ᴋuviasugomârpose sôrlo nipjausijartut ailerpatta Nâlekab ᴋaᴋᴋanganut, Israêlib piulijauviksanganut.

³⁰ Nâlekablo nippine nâlengnartoᴋ tussaksautitsomârpâ, takkuksautillugolo talline issamijoᴋ ᴋanningaumajârnikut ikkomablo nungutitsijub ikkoaladlarningagut kallukullo sillaluksoakullo nattarᴋonnatigullo.

³¹ Assurib Nâlekab nippinga ᴋoaᴋsârutigijomârpâ, issaᴋautingmut annaudlarmago.

³² Tamâllo issaᴋautik attortoᴋ aulataulerangat, Nâlekab torârtitanga taipsomunga, ᴋillautit harfillo attortaujomârput. Unatadlarnikut erᴋsinartokut sorsugvigijomârpait.

³³ Ikkoalaviksoaᴋ itsaᴋsoarnit pijarêrsimavoᴋ, attanermuttauᴋ pijarêrsimavoᴋ, ittijôvlune nerrotovlunelo; ikkoalaviksoarlo ikkomaᴋarpoᴋ ikkomaksaᴋarlunelo amigangitunik. Nâlekab anerningata ikkitsomârpait, orᴋsorutitut kôktotut illingavlune.