Jesaiase 3 - Labrador Inuttitut Heritage Bible

Israêlitit pidlartauningannik.

¹ Ahak, Nâlekab ᴋilangmiugasaksuit Nâlegangata Jerusalemit Jûdamillo pêromârpait ajaupiarijausût sukkarijausûllo: ᴋaᴋᴋôjat pitsartunartut illũnaita imerlo nakoᴋsinartoᴋ illũnat;

² Pitsartujoᴋsuit sorsuktuksallo erᴋartuijullo nallautaijullo pijomârtuksaniglo oᴋasôngojut angajoᴋaujullo,

³ Aulatsijullo ingmigut sorsuktuksanik 50 nik nertortaujullo ajoᴋertuijullo illisimajullo sanagiamik ajornartunik angakkôjullo.

⁴ Inôsuktullo attaningortitsomârpakka taipkonunga, tâpkoa sillaidlarlutik aulatsijomârput.

⁵ Inuillo pagvisârtigêgomârput nalliat illaminik nalliallo assiminik; inôsuktorlo akkerartuleromârpoᴋ itomut, nachonartorlo nertornartomut.

⁶ Angutit nalliata ᴋattangutine atâtame iglungane tigulerpago (oᴋarlune): Igvit annorâᴋarpotit, attaniolerit uvaptingnut, illinganerdluktullo tamakkoa illingnut kamagijaulit!

⁷ Tagva taimna oᴋaleromârpoᴋ imâk: Aniasiorteolungilanga, iglumnelo ᴋaᴋᴋôjaᴋangilaᴋ annorâᴋangilarlõnêt, attaningortiniarasinga inungnut!

⁸ Jerusaleme pâlasimavoᴋ, Jûdalo ochosimavoᴋ, oᴋangita piniarningitalo Nâlegaᴋ akkerartormatsuk, ijîgik nâlengnartoᴋsoâk kamaginagik.

⁹ Kênangita passivait idluitullinitiglo nallonaijarpait Sodomamiutitut angiarinagit. Kappianarmêk tarningit, piungitomik pititsingmatta ingmingnut.

¹⁰ Iduartut oᴋautigisigik, illingatsiarmatta, piniarnerijangita malliktingit inûtigijomâramigit.

¹¹ Kappianarmêgle idluitut; illingatsialungilat, aggangita sannajanginik akkiniartaujomâramik.

¹² Inuᴋotima aulatsijingit sorrusiovut, arnallo attaniovut tâpkonunga. Inuᴋotikka, tassiortise tammartitsisôngovut, apᴋullo arvertarvigijaksarijase asserorpât.

¹³ Nâlegarle akkerartoriartorpoᴋ, saᴋᴋerpoᴋ innugasaᴋsuit erᴋartoromavlugit.

¹⁴ Nâlegaᴋ aivoᴋ erᴋartuivingmut inuᴋotime angajoᴋângit attanerijangillo illagivlugit: Perorsêvik vaineliksatalik asserorpasse, aklujullo aᴋsârtaujutigijangit iglupsingnẽput.

¹⁵ Sôᴋ inuᴋotikka nungutipissigîk aklujullo asserorlugit? taimak oᴋarpoᴋ Nâlegaᴋ ᴋilangmiugasaksuit Nâlegangat.

¹⁶ Nâlegarlo oᴋarpoᴋ: Zionib panningit piojoridlarmatta pissungmattalo ᴋongasertusârlutik ijingmiklutiglo ablornekidlutiglo ittigamikkullo tajaujat sivanertillugit,

¹⁷ Tamanna pivlugo Nâlekab Zionib panningita kabjingit kallaᴋartitsomârpait avatingillo kangusûtiksarijangit ussingatitsomârpait.

¹⁸ Nalliutome taipsomane Nâlekab pêromarpait tajaujat ittigamiutat pivianartut ᴋaurutillo taᴋᴋingoallo,

¹⁹ Siummiutallo ᴋellaumgujangoallo kênailitallo,

²⁰ Niaᴋûtillo ᴋellaumgujangoallo ablornekititsijutiksat tapserutillo tippitsiariksauteᴋautillo arngoallo,

²¹ Ketterdlermîllo ᴋingarmiutallo,

²² Annorâtsiallo sillapâtsiallo ulliksuillo ikpiarsuillo,

²³ Tachartûtillo illupâllo nassaujârtullo ᴋungasêlitallo.

²⁴ Tagva tippitsiariksauteᴋarungnairlutik aunersungnitoᴋaromârput, tapseruteᴋarungnairlutik aklunâvineᴋaromârput, nujaᴋarungnairlutik âᴋiksimatsiartunik nujaᴋangitomik kabjeᴋaromârput, ulliksoaᴋarungnairlutik pôksajanik annorâᴋaromârput. Takkorannêtsomârput ânanaujungnairlutik.

²⁵ Anguteᴋotitit (Zione oᴋaudjauvoᴋ) saviksoarmut toᴋotaujomârput sorsuktuksaᴋotitillo unatadlarnermut.

²⁶ Zioniblo upkoaᴋsoangit kiksadlaromârput ogguarlutiglo, ᴋemaktauvlunelo (Zione) iksivajomârpoᴋ nuname.