Jesaiase 29 - Labrador Inuttitut Heritage Bible

Jerusalemut.

¹ Kappianarmek Ariêle, Ariêle (imaipoᴋ: Gûdib loeveᴋotinga), iglugasaksuit, Dâvidib tangmârvigijanga! Jâre illaᴋartisiuk jaremik, uvloᴋsiorviksase nalliutingmilit;

² Tagva Ariêle kappiasuktitsomârpara kiksartillugo siorniortillugolo, sullele Ariêletut-ituksauvoᴋ uvamnut.

³ Akkerartorlutit tangmâromârpunga avatingne, illumajaurᴋojomârpagit sorsuktuksanut tallutsoalioromârlungalo illingnut.

⁴ Tagva piojorijungnairtitauvlutit nunab illuanit sôrlo oᴋaromârpotit, ivjomillo sôrlo oᴋautsitit tussaksaujomârput; nippit timeᴋarungnairtub nippingatut, ivjomit pijotut illingajomârpoᴋ, oᴋautsitillo ivjomit nipjaromârput.

⁵ Omigijiville unurningit pujortut-itsomârput, attanersuillo unurningit saniktitut-itsomârput tiktausaraitutitut; taimailingatitaujomârpullo tagvainaᴋ, tagvainammarik.

⁶ Kilangmiugasaksuit Nâlegangata (Jerusaleme) tikkitsomârpâ kallidlartillugo, nuna sajukpiluktillugo, serᴋorpaluktillugo, anorersoaᴋartillugo aᴋᴋunaᴋsoamiglo ikkomaᴋsoamiglo nungutsijomik.

⁷ Sôrlo sinnaktômaneᴋ, takkotitjut unnuame illingangmat, taimailingajomârput nallojut illũnatik Ariêlib sorsugvigijingita unurningit illũnatiglo unatadlartut tâpsomunga, tallutsoaliortullo kappiasuktitsijullo tâpsominga.

⁸ Sôrlo kâktoᴋ, nerrivlune sinnaktomajoᴋ, tuppakunele tarninga kâdlarpoᴋ sulle; sôrlolo imeruktoᴋ, imerlune sinnaktômajoᴋ, tuppakunele sangêdlune tarninga ᴋêlerpoᴋ sulle, taimailingajomârput nallojut unurningit Zionib ᴋaᴋᴋanganut sorsugiartut.

⁹ Noᴋᴋangavluselo tattaminiaritse, ijise takpẽtikisigik tautugungnairluselo. Tallaput vainele pitjutiginago, kaibjaivut imiksarle tallanartoᴋ pitjutiginago.

¹⁰ Nâlekab anerneᴋ sinningnartoᴋ kovingmago illipsingnut, ijiselo (tagva:) nallautaijut mattulugit niaᴋoselo (tagva:) takkotitjuteᴋartut ulliklugit.

¹¹ Takkotitjutillo illũnatik illingajuksauvut illipsingnut aglait naᴋitjusertaumajut oᴋausingititut. Tamakkoa tunijaukpatta aglangnik atuarsijungnartomut, oᴋautivlugo imâk: Omât, tamakkoninga atuarsilaurit! — tagva oᴋalerpoᴋ: Sapperpakka, naᴋitjusertaumangmatta.

¹² Imâglõnêt: Aglait tunijaukpatta aglangnik atuarsijungnangitomut, oᴋautivlugo imâk: Omât, tamakkoninga atuarsilaurit! — tagva oᴋalerpoᴋ: Aglangnik atuarsijungnangitunga.

¹³ Nâlegarlo oᴋarpoᴋ: Imâk pivlugo: nunaᴋatigêt tâpkoa ᴋanermikkut najormanga, ᴋangasinâmikkullo opigingmanga, õmatingille ungasiktillugit uvamnit, erᴋsigingmangalo inutuinait perᴋojangit illiniartatik malligaksarivlugit,

¹⁴ Tamanna pivlugo mãnamit nunaᴋatigêt tâpkoa tattamnartomik piniarvigijomârpakka, illa tattamnartomik; sillatujoᴋotingita sillatuningat assiojomârpoᴋ, illisimajoᴋotingitalo illisimaningat saᴋᴋerungnairomârpoᴋ.

¹⁵ Kappianarmêk angigutsinasuartut kajusimanermingnik Nâlekamut piniarnermingniglo saᴋᴋertitsilungitut oᴋarlutiglo: Kia takkovâtigut? kialo illitarivâtigut?

¹⁶ Aijai, sillaidlartose! Machaᴋ adsigêktitaksauvâ machaliortemut? Sanajaujok sanajine pivlugo oᴋartuksauvâ: sanalungilânga? Macharlo machaliorte pivlugo oᴋartuksauvâ: illisimangilaᴋ?

¹⁷ Mãnakassakut Libanone perorsêviksangortitaulârpoᴋ, perorsêviksarlo napârtoliksoatut illingatitaulârpoᴋ.

¹⁸ Taipsomane tussângitut aglait oᴋausingit tussaromârpait, tautungitullo ijingit târmit tâᴋtomillo tautugomârput.

¹⁹ Ajulertullo ᴋuviasûteᴋaromârput Nâlekame, aklujullo inuit akkornganne serridlaromârput ivlernartitome Israêlikkune,

²⁰ Attanionerdluktut nungutaukpatta, mittauteᴋartoᴋarungnairpallo, piungitullijullo illũnatik pêjarsimakpatta,

²¹ Inungnik passiklertut idluiluktomik oᴋausetuinaᴋ pivlugo, inerterijunik ᴋaggimiovingme tammartitsijut, idluartomik asseroijut pitjuteᴋaratik.

²² Taimaimat Nâlegaᴋ, Abrahab piulijinga, oᴋarpoᴋ Jâkokkunut imâk: Jâko kangusuktuksaungilaᴋ mãna, kênangalo mãna ᴋattaktuksaunginivoᴋ.

²³ Kitorngangitale takkogunigit akkunermingne aggama sanajangit, tagva attera ivlerijomârpât, ivlernartitorlo Jâkokkune ivlerijomârpât, Israêliblo Gûdinga sivoragijomârpât.

²⁴ Tagvalo sillatuleromârput anernermikkut tammartut, akkerartortullo ajoᴋertûtsemik nâlegomârput.