Jesaiase 28 - Labrador Inuttitut Heritage Bible

Israêlikkut Jûdakkullo inertertauvut.

¹ Kappianarmek Efraimikkut tallatut niaᴋôtingat ânanaudlartoᴋ, nuvugulângat ᴋunorlertoᴋ, ânanaudlartoᴋ allianartorlo, naᴋsab perorsijaᴋtaliub ᴋollânẽtoᴋ, vainemut tallatitaujut pingat!

² Ahâk, pitsartujoᴋ sôngojorlo Nâlekab pijigivâ; aᴋᴋunaᴋsoatut nattarᴋonnaliksoatut, aᴋᴋunaᴋsoatut asserorsaijotut, sillaluksoatut imersoarnik kattaktitsijotut illiorlune nunamut ochotitsomârpait.

³ Efraimikkut tallatut niaᴋôtingat ânanaudlartoᴋ ittikkanut tullertaujomârpoᴋ.

⁴ Nuvugulângallo ᴋunorlertoᴋ, ânanaudlartoᴋ allianartorlo, naᴋsab perorsijaᴋtaliub ᴋollânẽtoᴋ faigetut-itsomârpoᴋ innisaraitotut kattersoiviub sivorngane; takkojartortub taimna takkovâ, tigumiarlugolo nerrivâ tagvainaᴋ.

⁵ Taipsomane ᴋilangmiugasaksuit Nâlegangat niaᴋôtitut pinarnartoᴋsôjotut ᴋaurutitullo ânanaudlartotut illingajomârpoᴋ inuᴋotime amiakunginut.

⁶ Anerniojomârporlo idluarsaijoᴋ erᴋartuivingme iksivajomut, unatadlartuniglo uttertitsijut iglugasaksuit itterviannut pitsartutigijomârpât.

⁷ Ukkoaletauᴋ (Jûdakkut) vainetornermut tallatitauvut, imiksamullo tallanartomut kaibjaititauvut. Ajoᴋertuijullo nallautaijullo imiksamut tallanartomut tallatitauvut, vainetornermullo sãlagijauvut, imiksamullo tallanartomut kaibjaititauvut; takkotitjutinik tautuktitauvlutik tallaput, erᴋartuivingmêdlutik kaibjaivut.

⁸ Sângit illũnatik salumaiput meriartunut, inniksaᴋangilaᴋ salumajomik.

⁹ Kikkut ajoᴋertoromavagît illitarᴋsinermik? Kikkut tukkisititsomavagît ajoᴋertûtsemik? ipkoa sungiusimajungnairtut imungmik amâmagungnairtullo?

¹⁰ Imâk oᴋarmatta: Perᴋojaᴋ ammalo perᴋojaᴋ, perᴋojaᴋ ammalo perᴋojaᴋ; malligaksaᴋ ammalo malligaksaᴋ, malligaksaᴋ ammalo maligaksaᴋ; kêtatuinaᴋ ammalo kêtatuinaᴋ.

¹¹ Illa kutarᴋôrtub oᴋausinginik oᴋamiglo assianik (attorlune) nunaᴋatigêt tâpkoa oᴋarvigijomârpait oᴋaudjaujut imâk:

¹² Tamadja merngoerserviksaᴋ, merngortudlartut merngoersilit. Tamadja nekoᴋsijauviksaᴋ. — Tamakkoningale tussaromangilat.

¹³ Taimaimat Nâlekab oᴋausinginik imaitunik tussartuksaugivuttauᴋ: Perᴋojaᴋ ammalo perᴋojaᴋ, perᴋojaᴋ ammalo perᴋojaᴋ; malligaksaᴋ ammalo malligaksaᴋ, malligaksaᴋ ammalo malligaksaᴋ; kêtatuinaᴋ ammalo kêtatuinaᴋ — imaingmat: aulartuksauvut niverlutiglo asserorlutiglo nigartauvlutiglo pijauvlutiglo.

¹⁴ Tamanna pivlugo Nâlekab oᴋausingit tussarsigik mãna illipse mittauteᴋartose, attaniojose nunaᴋatigênut tâpkonunga Jerusalemẽtunut.

¹⁵ Imâk oᴋarapse: Toᴋo angeᴋatigivavut kappianartoviglo issumaᴋatigivavut; issaᴋautiksoaᴋ nungutsijoᴋ aulajâralloarpat, pijauniangilagut, saegloneᴋ ᴋemâvigigaptigo, uivêriklerneᴋ sappudjauvigigaptigo.

¹⁶ Tamanna pivlugo Nâlegaᴋ Gûde oᴋarpoᴋ: Ahâk, ujarᴋamik tunganartovingmik illijivunga Zioneme, ôktûtiksaujomik, iglub terreᴋuksanganik pivianartomik, tungavingmik aulajuitomik, nalliallo okpertoᴋ ᴋemâjariaᴋaromângilaᴋ.

¹⁷ Erᴋartuitsiarneᴋ torautigivlugolo idluarnek oktûtigijomavara; tagva nattarᴋonnâluit pêjaromârpât saegloneᴋ ᴋemâviojoᴋ, imaᴋsoarnullo sapputjauvik saptaujomârpoᴋ.

¹⁸ Angeᴋateᴋarnise toᴋomik nungutaujomârpoᴋ, issumaᴋateᴋarnise kappianartovingmik suksaujungnairomârpoᴋ. Issaᴋautiksoaᴋ nungutsijoᴋ aulajârpat, nungutaujomârpose tamattomunga.

¹⁹ Aulajâlerangat, pijaujomârpose tamât, ᴋaut tamât aulajâromârmat uvlôtillugo unnuangotillugolo; oᴋautsillo tamakkoa tussarlugit kuksanadlarpoᴋ.

²⁰ Sinnigvik mikkiluarmat inungmut nallajomut, ᴋebbiglo nailuarmat inuk ullitsiarlugo.

²¹ Nâlegaᴋ oppalungairomârmat, sôrlo taipsomane ᴋaᴋᴋame Parâtsime, ningaumajâromârporlo, sôrlo taipsomane Gibeonib naternangane, sullijaksane piniarlugo, sullijaksaᴋ takkorngartaᴋ, pijaksanelo piniarlugo, pijaksaᴋ tussarngartaᴋ.

²² Taimaimat mãna mittautiksaᴋarungnairitse, ᴋellarutigijase sugaluluarᴋonagit, nungutsiviksoaᴋ kajusimajutaujoᴋ tussaumagapko Nâlekamit, ᴋilangmiugasaksuit Nâlegangannit sillaᴋsoarmut illũnânut pijomârtuksaᴋ.

²³ Siuteᴋaleritse nippiga tussarniarlugo, kamatsialeritse oᴋausikka tussarniarlugit.

²⁴ Perorsêvilerijoᴋ poagijatsainarᴋâ karngasoivigijaksaminik, ivjunga âᴋitsainarlugo niksiᴋatautinut maniksautinullo?

²⁵ Imaingilaᴋ? Kânga maniksalerêruniuk karngasoivoᴋ tillenik kimeleniglo siamangatitsivlune, illijivlunelo vaitsenik ingmigut gêstaniglo inniksangannut sapeltaniglo (perorsêviub) sinninginut.

²⁶ Tagva illũnaita nãmaktomik piniarvigivait, ajoᴋertortangame Gûdiminut.

²⁷ Tillit ᴋammutinut paungaijartaungilat, taimaktauᴋ kimelit paungaijartaunginivut aksalloamut, kautamulle kissiane tillit katjuktauvut kimelillo kautârsungmut.

²⁸ Kaᴋᴋôjaksat tullertaugalloarput, kissianele soraijuitomik tullertaulunginivut; ᴋammutinut aksalloalingnut horsinullo ᴋângagôrviogalloarlutik serᴋalijaummarilungilat.

²⁹ Tamannatauᴋ pivoᴋ ᴋilangmiugasaksuit Nâlegangannit. Kajusimaninga tattamnarpoᴋ, illisimaningalo inornarpoᴋ.