Jesaiase 27 - Labrador Inuttitut Heritage Bible

Nallojut pidlartauvut, Israêlikkut uttertitauvut.

¹ Taipsomane Nâlekab pidlariartoromârpak leviâta, ᴋuglugiaᴋsoangojoᴋ sukkalidlartoᴋ, leviâtalo, ᴋuglugiaᴋsoangojoᴋ niungajoᴋsoaᴋ, saviksoarmigut sittijokut, angijokut, sôngojokut, toᴋotsomârpâlo imarbiub ômajoâlua.

² Taipsomane imgeritse perorsêvik vaineliksatalik ᴋuvianartoᴋ pitjutigivlugo.

³ Uvanga Nâlegaujunga udjertorpara, mitsuktitsainarpara, sujuktitsijoᴋarᴋonago uvloᴋarninganelo unnuaᴋarninganelo udjertorpara.

⁴ Ningarneᴋ illumnẽngilaᴋ. Ukpigait perornerdluktullo kakkilautiggit akkerartulinga! Sorsuklugit tikkitsomârpakka, illũnaita ikkillugit.

⁵ Sapputjauviginasualingalõnêt, ullapirsauteᴋaᴋatigivlungalo, illa ullapirsauteᴋaᴋatigivlunga!

⁶ Uvlune pijomârtune Jâko amâᴋaleromârpoᴋ Israêlelo perortuksaᴋalerlune siggileromârpoᴋ, nunaᴋsûb ᴋânga perortunik ullipkillugo.

⁷ (Gûdib) taipkoa (Israêlikkut) sugiarᴋagît, sôrlo sugiartingit sugiaramigit? ubvalo taipkoa toᴋotauvât sôrlo toᴋorᴋojingit toᴋongmagit?

⁸ Nãmatuinartomik pidlarpattit taipsomane, avigavit taipkonangat. Nuktipait anorersoarmut, uarngnartillugo.

⁹ Taimaimat Jâkob idluitoᴋsôningit tamattomûnaluatsiaᴋ mattujauvut, tamadjalo ajortoerutijauningata malliktingit, tunerguservît ujaraᴋtangit tamaita illingatitsomârmagit ujarᴋatitut serᴋalimajutitut, Astartingoallo napajullo seᴋinermut tagvanẽtsungnairtillugit.

¹⁰ Iglugasaksuit sôngojoᴋsuit kisserngortauleromârput, iglutsiangillo kamagijaujungnairlutik ᴋemadlartaujomârput inuᴋajuitotut; tagvane nochait iviksukatoromârput, aᴋopivlutiglo tagvane ukpiganik nerrijomârput.

¹¹ Akkerᴋut pannilerunik navigomârput, arnallo pijartorlugit ikkomaksarivait, nunaᴋatigêt tâpkoa sillaitovaksôngmatta. Taimaimat sanajingata nâpkigijungnangilait pingortitingatalo ajungitullivigivlugit ajorpait.

¹² Taipsomane Nâlegaᴋ katjugomârpoᴋ sullugainernik kôksûb kiglinganit Egiptenib kôksoanga tikkidlugo; illipselo, Israêlikkut, nallekârluse kattititaujomârpose.

¹³ Taipsomane tiptulaut angijoᴋ attortaujomârpoᴋ, tagva assiomajut Assurib nunanganẽtut tikkitsomârput ajaktortaumajullo Egiptenib nunanganẽtut, Nâlegarlo tuksiarvigijartoromârpât ᴋaᴋᴋame ivsornaitome Jerusaleme.