Jesaiase 26 - Labrador Inuttitut Heritage Bible

Kujalitiksanik. Makkiviksamik.

¹ Taipsomane imgertoᴋaromârpoᴋ imgerusermik imaitomik Jûdab nunangane: Iglugasaksoaᴋarpogut aulajungnangitunik, avalungit sappûlutangillo piulijauviksauvut.

² Upkuaᴋsuit angmarsigik, nunaᴋatigêt idluarsijut, nallâgôrnermik ivlersijut itterungnarᴋovlugit.

³ Omat aulajungnangertoᴋ ullapirsauteᴋartipat aulangitomik, tattigingmattit.

⁴ Nâlegaᴋ tattigisiuk soraijuidluse, Gûde Nâlegaᴋ ᴋairtôngmat aulangitoᴋ issoᴋangitomut.

⁵ Kotsingnerme nunaᴋartut piojorijungnairtipait iglugasaksuillo poᴋtojut naᴋiglitipait, naᴋiglitillugit nunamut, ochotillugit ivjomut.

⁶ Ittikkanut tullertauvut, illa aklujut ittiganginut, ajulertut ittiganginut.

⁷ Idluartuble apᴋutâ nallâgôrtotôvoᴋ, idluartub apᴋosininga idluarsitipat.

⁸ Illa, Nâlegaᴋ, erᴋartuijartoralloaruvit, nerriugivaptigit; atternut erᴋaumajauviksarnullo tarnivut kajungerpoᴋ.

⁹ Omatipkut ᴋillanârvigivagit unnuame, taimaktauᴋ anernipkut illumnẽtokut ᴋêmitigvigivagit. Erᴋartuijutaurᴋojatit attulerangatta nuname, tagva nunaᴋsoarmiut idluarnermik illiniarput.

¹⁰ Idluitut nâpkigijauveᴋaralloarunik, idluarnermik illinialungilat, idluitullivulle nallangaingitub nunangane Nâlekab ânanauninga takkunginamitsuk.

¹¹ Nâlegaᴋ, aggatit ᴋotsingmatta, takkungilait; takkojomârpulle illungertornernik inuᴋotitit pivlugit kangusuktitauvlutiglo; illa ikkomamut ômigijitit nungutaujomârput.

¹² Uvaptingnulle ullapirsaumik pititsijomârpotit, Nâlegaᴋ, sullijavullõnêt tamaita tunigangne uvaptingnut.

¹³ Nâlegaᴋ Gûdivut attanerit assitit attanerigalloarpavut, illikkut kissiane attit erᴋaumavavut.

¹⁴ Toᴋungajut inôjungnaimmarikput, timeᴋarungnairtut makkitsangilat, igvit pidlarangne nungutillugillo, erᴋaumajaujutingallo pêjarlugo.

¹⁵ Inuᴋotitille unuksitipattit, Nâlegaᴋ, inuᴋotitit unuksitipattit nâlengnarsivlutit, nunab issungit tamaita aglisitipattit.

¹⁶ Nâlegaᴋ, kappianartoᴋalerangat, ᴋennerpâtit; sugialerangangne, anersauminikut nipliavigivâtit.

¹⁷ Sôrlo singaijoᴋ, ernisukkune, kappiasulermat ãniadlarnermigullo nipliadlarmat, taimailingavogut kênavit sângane, Nâlegaᴋ.

¹⁸ Singaigapta, kappiasugapta ernivogut publainarnik sôrlo; nuna piulivlugo ajorpavut, nunaᴋsûblo inuksangit erniangolungilat.

¹⁹ Toᴋungajoᴋotitille ômaromârput, timivut anernangertut makkitsomârput. Tuppaleritse nertordlerluselo, ivjormiôjose! mitsuksoaᴋ illingnut (pijoᴋ) mitsuksoangongmat inûlinartoᴋ nuna toᴋungajunik saᴋᴋertitsijuksaugivoᴋ.

²⁰ Inukotikka, aileritse innipsingnut upkuarlo parngnanairlugo kingunapsigut anikitoarsungmik ijeriartoritse, ningaumajârneᴋ sorairsiarivlugo.

²¹ Ahâgle, Nâlegaᴋ inniminit annijomârpoᴋ, nunaᴋsûb inungit pidlariartorlugit kassẽningit pivlugit; nunablo auk ingminut kovijaumajoᴋ saᴋᴋertitsomârpâ, toᴋotaumajullo ingmine niparungnairtillugit.