Jesaiase 25 - Labrador Inuttitut Heritage Bible

Kujalitiksanik.

¹ Nalegak, Gudigivagit, nakorivagit; attit nertorpara, tattamnartulligavit, kajusimanitit itsaᴋsoarnit nallâgôrmatta mikseᴋârtôvlutiglo.

² Iglugasaksuit illingatipattit ujaraᴋtitut sittôrtovinertitut, iglugasaksuit sôngojut serᴋomakungortillugit, takkorngartallo igloᴋsoangat iglugasaksoaᴋarungnairtillugo, igluliortoᴋartailivlugo issoᴋangitomut.

³ Tamanna pivlugo nunaᴋatigêksuit pitsartudlartut opigivâtit, nallojut erᴋsinartut iglugasaksoangita sivoragivâtit.

⁴ Igvit sangẽtut pitsartutigivâtit, ajoᴋsartut sapputjauvigivâtit kappianartoᴋalerangat, ᴋemâvigivâtit sillarnerlukpat, tachalinerivâtit kiaᴋarpat, attanionerdluktut ᴋanningaumajârningat aᴋᴋunaᴋsoatut ᴋarmaᴋsoamut akkingmiktotut illingangmat.

⁵ Takkorngartat kanningaumajârningat sorairtipat, kiaktut illingatillugo nuname pannertome; sôrlo kiak ikpiginarungnairtitaungmat nuvujab tachanganut, taimak attanionerdluktut imgerutingit sâlaᴋarsiutit tussaksaujungnairtitauvut.

⁶ Kilangmiugasaksuillo Nâlegangat âᴋiksoijomârpoᴋ ᴋaᴋᴋame tamattomane nerrimârviksoamik orᴋsulingmik nunaᴋatigêksoarnut tamainut, nerrimârviksoamik vainelingmik issungitomik, orᴋsulingmiglo pattermik vainelingmiglo issungitomik sannêjarsimajomik.

⁷ Pêjaromârpâlo ᴋaᴋᴋame tamattomane tâlutaᴋ, nunaᴋatigêksuit illunamasiatik tâlutarijangat, ulliglo, nallojut illunamasiatik ulligijangat.

⁸ Toᴋo nungutitsomârpâ issoᴋangitomut, Nâlekablo Gûdib allarteromârpait ᴋugvit kênarnit tamainit, inuᴋotimelo nachonautingat pêjaromârpâ nunane tamaine, Nâlegaᴋ taimak oᴋarmat.

⁹ Taipsomane oᴋartoᴋaromârpoᴋ: Ahâk, tâmna Gûdigivavut, tâmna nerriugivavut, tâpsomalo piulivâtigut; tamnauvoᴋ Nâlegaᴋ nerriugijavut; kuviasukluta iggiaᴋomijarta piuliklerninga pivlugo!

¹⁰ Nâlekab aggangit ᴋaᴋᴋamik mattominga tupveᴋaromârput. Moabele tukkartaujomârpoᴋ attânut, sôrlo ivivinît tukkartauvangmatta annarvingmut.

¹¹ Tagva aggane issagomârpait, sôrlo puibjorartub aggane issangmagit puibjoraromamut, Nâlekable pimmariutertoᴋ kivititsomârpâ aggangillo pikkablajut.

¹² Avalůᴋsoapse nuvugusersoangillo poᴋtojut ochotitsomârpait naᴋiglitillugit kattaktillugillo nunab ivjunganut.