Jesaiase 24 - Labrador Inuttitut Heritage Bible

Jûdamut sillaᴋsoarmullo.

¹ Ahak, Nâlekab nuna piksairutivlugo asserorpâ, ᴋânga mumiklugo inungillo siamartillugit.

² Illũnatiglo adsigêmik illingajomârput: inuillo ajoᴋertuijullo, kivgarlo nâlegangalo, arnaᴋ kivgaujoᴋ kivgartorvigijangalo arnaᴋ, pissiniartorlo niuverniartelo, attartortitsijorlo attartortorlo, akkiliksaᴋarviojorlo akkiliksaᴋartorlo.

³ Nuna piksairutijaujomârpoᴋ pêjaiviojomârlunelo, Nâlekab tamanna oᴋautigingmago.

⁴ Nuna kappiasuklune asserolerpoᴋ, sillaᴋsoaᴋ toᴋolerlune asserolerpoᴋ, attanionersat nunaᴋatigêt akkornganne toᴋolerput.

⁵ Nunalo ivsornarsivoᴋ inungme attânne, perᴋojat nâlalungimagit, inatsinerit tappagingmagit, angersimanerlo soᴋᴋosijuitoᴋ kamagijungnairlugo.

⁶ Taimaimat ominautiksab nuna nungutipâ, inungillo pidlartauniksamingnik attorput. Taimaimat nunab inungit ikkitauvut, inuillo amiakôjut ikkitôlerput.

⁷ Vaine nutâᴋ saᴋᴋijârungnairpoᴋ, vaineliksarlo ᴋunorlerpoᴋ, illũnatiglo serrivaktut anersaumilerput.

⁸ Killautilît ᴋuviasungningat sorairpoᴋ, iggiaᴋomijartunik pervaluktoᴋarungnairpoᴋ, ᴋellularalît ᴋuviasungningat sorairpoᴋ.

⁹ Vainetortoᴋangilaᴋ imgertunik, imiksarlo tallanartoᴋ mamaigijauvoᴋ tamattominga imertunut.

¹⁰ Iglugasaksuit inuerutijut asserorput, iglut illũnatik parngnanairsimavut ittertunut.

¹¹ Vaine ogguarutigivât iglut akkornganne, ᴋuvianartullo illũnatik pêjarsimavut, nunab allianarningit illũnatik nungutaumavut.

¹² Asserorsimajuinarnik amiakoᴋarpoᴋ iglugasaksoarne itterviksoangillo serᴋomitauvut suksaujungnairlutik.

¹³ Nuname nunaᴋatigêllo akkornganne pijoᴋaromârpoᴋ, sôrlo pijoᴋarmat napârtut orᴋsutalît paungaijartauvianne, sôrlolo pijoᴋarmat nunivagvingme vaineliksat paungangita kingorlinginik.

¹⁴ Tâpkoale nippitik tussaksautitsomârpait nertordleromârlutiglo, Nâlekab pitsartujoᴋsôninga pitjutigivlugo, imarbiksûb kiglinganit iggiaᴋomijaromârput.

¹⁵ Taimaimat Nâlegaᴋ nertorsiuk, kangiane nunaᴋartose; Nâlekab Israêlib Gûdingata attinga nakorisiuk, imarbiksûb ᴋikkertanginẽtose.

¹⁶ Nertordlerutiksanik tussarpogut nunaᴋsûb kiglinganit: Idluartotôjoᴋ opigijaule! Uvangale oᴋariaᴋarpunga: Aijai, aijai! kappianarmêk uvanga! Terliarsijut terliarsivut, terliarsijut terliarsivut angiluartomik.

¹⁷ Erᴋsinartub ittersâlublo nigablo tikkilise, nunaᴋatigêktose!

¹⁸ Imaitsomârporlo: Nalliat erᴋsinartomik serᴋorpalluktomik ᴋemâgalloarune, kattaktuksauvoᴋ ittersâlungmut; nalliat ittersâlungmit ᴋaᴋigalloarune, nigamut pijaujomârpoᴋ, igalât ᴋotsiktomẽtut angmarmatta nunaᴋsûblo tungavingit auladlarmatta.

¹⁹ Nuna serᴋomipoᴋ, nuna ᴋoplorpoᴋ, nuna sajukpilakpoᴋ.

²⁰ Nuna majangadlarpoᴋ tallatotut, aulajârpoᴋ ᴋângattaujarviktut, idluitulliningita nênermatsuk, ochojuksauvoᴋ makkitsungnarane.

²¹ Taipsomane Nâlekab pidlariartoromârpait ᴋotsiktub kattimgajoᴋsoangit ᴋotsiktomẽtut nunaᴋsûblo attanersoangit nunamẽtut.

²² Kattititaujomârpullo ᴋeppisimavlutik, pititauvlutik ittersâlungmut, parngnanairsortauvlutiglo parngnanairsimavingmut, uvlullo unuktut ᴋangerᴋârtillugit pidlartaujomârput.

²³ Taᴋᴋerlo kangusugomârpoᴋ, seᴋinerlo ᴋattagomârpoᴋ, ᴋilangmiugasaksuit Nâlegangat attanersoangongmat Zionib ᴋaᴋᴋangane Jerusalemelo, angajoᴋângortitangitalo ânanaunersoangat takkuksaulermat.