Jesaiase 23 - Labrador Inuttitut Heritage Bible

Tirusemut.

¹ Tamadja oᴋauseᴋ inerterijutiksaᴋ Tirusemut. — Alatitse, umiaᴋsuit Tarsiseliartose, (iglugasaksuit) asserortaungmatta, igloᴋarungnairmallo, taikungalo angerarviksaᴋatsangimat. Kittit nunangannit tamanna tussaumajomârpât.

² Kikkertab inungit, nippangeritse; tâmna niuverniartut Sidonemit imarbiksiortut tikkiᴋattarpât.

³ Tagvungalo imaᴋsoakut neksarpait Siggoreme karngasortaumajut kôngmelo kattersortaumajut, nunaᴋatigêllo niuverniarvigivât.

⁴ Kangusugit Sidone, imarbiksoaᴋ, illa iglugasaksuit sôngojut imarbingmẽtut oᴋauseᴋarmatta imâk: Singaijungnairpunga ernisugungnailarmalo, nukappitsat pairijungnairpakka niviarsiallo inugoijungnairlugit.

⁵ Egiptenemiut tamanna tussarunitsuk, tussartatik Tiruse pivlugo ᴋoaᴋsârutigijomârpât.

⁶ Tarsisemut umiaᴋtoritse; âlatitse ᴋikkertarmiôjose.

⁷ Taimailingajuksauvisê, ᴋuviasukpaktose (iglugasaksuit)? Tunganilijaumavut itsaᴋsoarme, ittigangita aulartipait ungasiktomut, takkorngartautillugit.

⁸ Kina taimak issumaᴋarᴋâ Tirusemut tunitjisôngojomut niaᴋôtenik? Niuverniartut tagvanẽtut attaniovut, pissiniarpaktullo nertortauvut nuname.

⁹ Kilangmiugasaksuit Nâlegangat taimak issumaᴋarpoᴋ, nertûtigijangit allianartut illũnaita nungutsomavlugit, nertortaujullo tamaita nuname nachogijautitsomavlugit.

¹⁰ Nunat ingergavigiuk, kôksoatut illingavlutit, igvit Tarsisib panninga, pitûtairpotit.

¹¹ Aggane issakpait imarbingmut, attanioviksuillo sajuktipait; Nâlegaᴋ perᴋojivoᴋ Kânaane pivlugo, iglugasaksoangit sôngojut nungutaurᴋovlugit.

¹² Oᴋarlunelo: Kuviasugungnairtuksauvotit, uigasuk nachonarsijoᴋ, Sidonib panninga; parngnailerit, Kitimullo aularit, tagvanelõnêt merngoerserviksaᴋangilatit.

¹³ Kaldêarit nunangat ᴋemergoleruk, — inugialungigalloarput tagvane, Assurib nunaᴋartipait inuerutijomik — taipkoale nuvugusersoamingnik napârtitsivut, igluᴋsoangit asserorlugit serᴋomimmariklugit.

¹⁴ Alatitse, umiaᴋsuit Tarsiseliartose, iglugasaksoaᴋotise sôngojut asserortaungmatta.

¹⁵ Taimangat Tiruse puigortaujomârpoᴋ jârit 70 it nâvlugit, attaniub attautsib jâringit nâvlugit. Jârille 70 it nâkpatta, Tiruse pivlugo oᴋartoᴋaromârpoᴋ, sôrlo oᴋartoᴋarmat tuksiaralauserme anguniarpaktoᴋ pivlugo:

¹⁶ Kellularaᴋ tigulauruk, iglugasaksoarnut ailerit, anguniarpaktotit puigortaumajotit! Noᴋaᴋseraggit attutsiarlugit pît, imgitsiarit, erᴋaumajaujomavlutit!

¹⁷ Jârillo 70 it nâkpatta, Nâlekab Tiruse nallipsaromârpâ, piksarsiorungnarᴋovlugo, amma nutâmik niuverniarᴋovlugolo attaniviksoarnut nunamẽtunut tamainut.

¹⁸ Niuviangille piksarsiangillo tunergutaujomârput Nâlekamut; ᴋematullivingmut illijaujomângilat torᴋortaunatiglo, Nâlekable sângane inôjut pijomârput niuvianginik, nerᴋiksaᴋarᴋovlugit nãmaktomik annorâtsiaᴋarᴋovlugillo.