Jesaiase 22 - Labrador Inuttitut Heritage Bible

Jerusalemut. Sêbnab erᴋartortauninganik, Eliâkib ᴋairᴋojauninganik.

¹ Tamadja oᴋauseᴋ inerterijutiksaᴋ naᴋsamut takkotitauviojomut. — Suvisê, tamapse iglut ᴋânginut majoarapse?

² Pervaluktoliksôjose, uimajârtunik iglugasaksoarmioᴋartose, serrijunik iglugasaksoarmioᴋartose! Toᴋotaumajut illipsingne saviksoamut toᴋotaungilat, unatadlarnikkullo toᴋolungilat.

³ Angajoᴋâse illũnatik ᴋemâᴋatigêkput; pittikseᴋaratik tigujauvut; illũnatik illipsingne naipitaujut tigujauvut attautsekut, ungasiktomut ᴋemâgalloaramik.

⁴ Taimaimat oᴋarpunga: Takkonârniarasinga; illungertornermut ᴋeajomavunga; pinasuarniarase manigoromavlunga inuᴋotima panningata nungutauninga pivlugo.

⁵ Uvlorme taipsomane aulajâdlartitsijoᴋarmat asserorsaijoᴋarlunelo ᴋoaᴋsârtitsijoᴋarlunelo Nâlekamit, ᴋilangmiugasaksuit Nâlegangannit pijomik naᴋsame takkotitauviojome. Avaloᴋsuit nakkapait, nippeᴋadlarput ᴋaᴋᴋanut.

⁶ Elame ᴋargjoᴋausijarpoᴋ, angutit ᴋemmuksertut iksivajullo horsit ᴋângine illagivait. Kiriblo sappûlutaᴋ saᴋᴋertipâ.

⁷ Imaitsomârporlo: Naᴋsaᴋotitit anerimajut ᴋammutingnik tatatsomârput, horsillo ᴋângine iksivajut upkuaᴋsuit sângine tangmârteromârput.

⁸ Tagva Jûda tâludjârtaujomârpoᴋ, illipselo nalliutome taipsomane ᴋeviaromârpose sakkoᴋsoarnut iglunẽtunut ᴋejutsiangojune.

⁹ Takkojomârpose, Dâvidib iglugasaksoangita avaloᴋsoangine killaᴋarmat unuktunik; tassiublo alliub imingit kôktitsomârpasse imeᴋtarvingmut.

¹⁰ Jerusalemib iglungit kittitsomârpasse, iglullo illangit serᴋomitsomârpasse, avaloᴋsuit âᴋigomavlugit.

¹¹ Kôgviksamiglo sanajomârpose avaloᴋsuit akkilerêt akkornganne tassiub nutaungitub iminganut. Sullele kamagingilasse tamattominga sullijoᴋ, opigingilasse tamattominga sivorngagut piniartoᴋ.

¹² Nalliutomelo taipsomane Nâlegaᴋ, ᴋilangmiugasaksuit Nâlegangat ᴋearᴋojijomârpoᴋ ogguarᴋojivlunelo, sallimajoᴋarᴋojijomârpoᴋ pôksajaniglo annorâᴋartoᴋarᴋojivlune.

¹³ Ahâgle, ᴋuviasukput serrivlutiglo. Tuktuvait saukkallo toᴋopait, nerᴋetorput vainetorlutiglo (imâglo oᴋarput): Nerriniarta imilutalo, ᴋaupat toᴋojuksaugapta.

¹⁴ Kilangmiugasaksuillo Nâlegangat nallonairpoᴋ siutîmnut: Ahammarik idluitullineᴋ tamanna issumagijaujungnairniatsangilaᴋ, toᴋorᴋârtinnase; taimak oᴋarpoᴋ Nâlegaᴋ, ᴋilangmiugasaksuit Nâlegangat.

¹⁵ Imâk oᴋarpoᴋ Nâlegaᴋ, ᴋilangmiugasaksuit Nâlegangat: Pimaklertomut tâpsomunga Sêbnamik attelingmut, angajoᴋaunerôjomut ailerit (oᴋautivlugolo):

¹⁶ Susiorᴋêt tamâne? kikkunut illingavêt, illuviksarnik tamâne sanagavit, poᴋtojome illuviksarnik sanavlutit, inniksarniglo âᴋiksoivlutit ᴋairtome?

¹⁷ Takkuit, Nâlekab egitsomârpâtit, egillutit pitsartudlartotut, immujomârpâtillo immuvlutit.

¹⁸ Aksapalloarivlutit aksapalloatitsomârpâtit aᴋsaujatut nunatojomut. Taikane toᴋojuksauvotit, taikanêtsomârpullo ᴋammutitit pinarnartut, kangusûtiksaujotit attanivit iglunganut.

¹⁹ Sullivingnit pingujaromârpagit innigijarnillo pêjarlutit.

²⁰ Taipsomane kivgara Eliâki, Hilkiab erninga, ᴋairᴋojomârpara.

²¹ Annorârijarnik attititsomârpara, tapserutigijarnik tapseruseromârpara, nâlegauvigijallo tunijomârpara agganginut, atâtaulerᴋovlugo Jerusalemiunut Jûdakkunullo.

²² Dâvidiblo iglungata pêrutânik illijijomârpunga tâpsoma tuîgingnut, pallangairutjârsijomârporlo nalliata pallangairungnangitanganik, pallangairsijomârporlo nalliata pallangairutjârungnangitanganik.

²³ Kikiaktullo katjugomârpara innemut aulataujungnangitomut, iksivautaᴋsoangojomârporlo opinartoᴋ atâtame inuᴋotinginut.

²⁴ Tâpsomungalo nivingatitsomârpait pinarnartut tamaita atâtangata iglunganẽtut, ᴋitorngarêt kinguvarêllo, illuleᴋutillo mikkijut tamaita pôgutallo publaujallo tamaita aglât.

²⁵ Kilangmiugasaksuit Nâlegangat oᴋarpoᴋ: Taipsomane kikiak katjuktaumajoᴋ innemut aulataujungnangitomut pêromarpoᴋ, naviklunelo kattagomârpoᴋ, nivingartaujullo tâpsomunga pêrtaujomârput; Nâlegaᴋ taimak oᴋarmat.