Jesaiase 21 - Labrador Inuttitut Heritage Bible

Bâbelemut Dûmamullo Arâbiamullo.

¹ Tamadja oᴋauseᴋ inerterijutiksaᴋ (nunamut) inuerutijomut kôksoarmẽtomut. — Sôrlo aᴋᴋunaᴋ ângat ᴋeaksungmat, taimak pijoᴋarpoᴋ inuᴋajuitomit, nunamit erᴋsinartolingmit.

² Takkotitjumik sivoranartomik takkotitauvunga: Arᴋtaijoᴋ arᴋtaivoᴋ, asserorsaijoᴋ asserorsaivoᴋ. Paungaleritse Elamiôjose, illumasiuk Mêdiamiôjose! anersaumititsiningit tamaita sorairtitsomavakka.

³ Tamanna pivlugo okpatîkka ãnilakteradlarpuk, siornionermullo tikkitauvunga ernisuktotut, ãnialuarnermut tussarungnairpunga, ᴋoaᴋsâluarnermut takkonârungnairpunga.

⁴ Omatiga sajukpoᴋ, sivoranartomut ᴋoaᴋsârtitauvunga. Unnuk kajungerijara (merngoerserviksaungmat) kuksanalerpoᴋ uvamnut.

⁵ Nerrimârvingmik âᴋiksoivut, pigârput pigârvingme, nerrivut imerlutiglo. Opalungaileritse angajoᴋaujose, sappûlutaᴋ mingoarsiuk!

⁶ Nâlekab oᴋautingmanga imâk: Pigârtuksaᴋartitsijartulerit, nallunaijairᴋovlugo takkojaminik.

⁷ Tâpsomalo takkovait kattimgajoᴋsuit horsine ablângajut, iglugêklutik ingergajut, siuterᴋortojullo kattimajoᴋsuit, kamêlillo kattimajoᴋsuit. Kamatsiarlunelo tussarasuarpoᴋ.

⁸ Nipliavorlo loevetut imâk: Nâlegara, nallipsartorvingmêtsainarpunga uvloᴋ nâvlugo pigârvingmêdlungalo unnuat tamaita.

⁹ Ahâk tagga, aggerput kattimgajoᴋsuit horsine ablângajut, iglugêklutik ingergajut. Kiovlunelo oᴋarpoᴋ: Bâbele ochosimavoᴋ, illa ochosimavoᴋ, Gûdingoaᴋotingillo illũnatik nakkasimavut nunamut.

¹⁰ Katjuktara, (sullugainernik) katjugvigijama pinga, tussartara ᴋilangmiugasaksuit Nâlegangannit, Israêlib Gûdinganit oᴋautigivara illipsingnut.

¹¹ Tamadja oᴋauseᴋ inerterijutiksaᴋ Dûmamut. — Seiremiut nipliavigivânga: Pigârte, unnuaᴋ ᴋanoelerᴋâ? Pigârte, unnuaᴋ ᴋanoelerᴋâ?

¹² Pigârtoᴋ oᴋarpoᴋ: Kauleralloartillugo unnuangolerivoᴋ. Apersoijomagupse, apersoituinaritse; utteritse tikkingmivluselo.

¹³ Tamadja oᴋauseᴋ inerterijutiksaᴋ Arâbiamut. — Arâbiame napârtut akkornganne siniktartômajomârpose, Dedanikkut ingergaᴋatigêktose.

¹⁴ Imeruktut pagrearlugit imermik ᴋaitsivigisigik, Têmab nunangane nunaᴋartose, ᴋaᴋᴋôjanik ᴋaitsititse ᴋemâjunut.

¹⁵ Saviksoamit ᴋemângmatta, illa saviksoamit kênariktomit, pittiksemit noᴋarsimajomit, unatadlartomit angijomit.

¹⁶ Imâk oᴋautingmanga Nâlekab: Jâre attauseᴋ, kivgartortub jâringatut illingajoᴋ nâlerpat, Kêdarib ânanauninga illũnane nungutaksauvoᴋ.

¹⁷ Pittiksertullo amiakôjut, Kêdarib pitsartujoᴋsoaᴋotingit, ikkitôjomârput; Nâlekab Israêlib Gûdingata tamanna oᴋautigingmago.