Jesaiase 2 - Labrador Inuttitut Heritage Bible

Gûdib nâlegauvianik pijomârtomik. Israêlitit inertertauningannik.

¹ Tamadja Jesaiasib, Amosib erningata takkotitaunerilauᴋtangit Jûda Jerusalemelo pivlugik.

² Uvluksat kingorlingine pijoᴋaromârpoᴋ imâk: Kaᴋᴋaᴋ, Nâlekab iglungata tungavia, ᴋaᴋᴋat ᴋângannẽtsomârpoᴋ poᴋtonersauvlune ᴋaᴋᴋârulangnit tamainit, nallojullo illunamasiatik akpangervigijomârpât.

³ Nunaᴋatigêksuillo unuktut aijomârput oᴋarlutiglo: Attê! Nâlekab ᴋaᴋᴋanganut majorarta, Jâkob Gûdingata iglunganut, tâpsoma apᴋutigijaksaurᴋojanginik ajoᴋertortaurᴋovluta tâpsomalo apᴋutigijaksaurᴋojangine arvertarᴋovluta. Zionemit perᴋojat annijomârmatta Nâlekablo oᴋausingit Jerusalemit.

⁴ Erᴋartuijomârporlo nallojut akkornganne nunaᴋatigêksuillo unuktut inerterlugit. Tagva saviksoaᴋotimingnik poagitelioromârput ᴋallugiaᴋotimingniglo iviksukatautelioromârput. Nunaᴋatigêt nellîllõnêt assimingnut saviksoarmik atorungnairomârput, unatadlarnermiglo illiniarungnairomârput.

⁵ Attê, Jâkokkut, arvertarta Nâlekab ᴋaumarningane!

⁶ Igville (Gûde), inuᴋotitit ᴋemakpattit, kangillimik illusinginik singomangmatta angakkôvlutiglo Filisterititut, takkorngartat ᴋitorngangit illagivlugit.

⁷ Nunangat silberemik goldemiglo tatapoᴋ, perᴋutingit kittiksaungilat; horsiniglo nunangat tatapoᴋ, ᴋamutingit kittiksaungilat.

⁸ Gûdingoarnik nunangat tatapoᴋ; tallermik piniartangit, aggamik sannajangit tugsiarvigivait.

⁹ Inuit (tamattomunga) suksaujungnairtitauvut, angutaujullo nallopᴋotijariaᴋartitauvut. Issumagijungnaiviginiatsangilattit.

¹⁰ Kairtomut morjulerit ijertorlutillo ivjomut Nâlekab sivoranarninganit pitsartujoᴋsôninganillo opinadlartomit.

¹¹ Inuit piojorijutitut tautusôngojut kattalungatitaujomârput, inuillo pimmariutertut suksaujungnairtitaujomârput, Nâlegarlo kissime angijôjomârpoᴋ nalliutome taipsomane.

¹² Kilangmiugasaksuit Nâlegangata uvlunga pijomârmat illũnainut piojorijunut pingijaitunullo angijunullo illũnainut, piojorijungnairtitaurᴋovlugit,

¹³ Zêderinullo tamainut Libanonemẽtunut angijunullo poᴋtojunullo, aiginullo tamainut Basanemẽtunut,

¹⁴ Kaᴋᴋanullo poᴋtudlartunut tamainut, ᴋaᴋᴋârulangnullo poᴋtujunut tamainut,

¹⁵ Nuvugusersoarnullo poᴋtojunut tamainut, ᴋarmanullo sanamatsiartunut tamainut,

¹⁶ Umiaᴋsoarnullo imarbiksiortunut tamainut, sanamatsiartunullo takkominartunut tamainut.

¹⁷ (Tagva) inuit piojoriningat suksaujungnairtitaujomârpoᴋ, inuillo pimmariuterningat serᴋomitaujomârpoᴋ, Nâlegarlo kissime angijôjomârpoᴋ nalliutome taipsomane.

¹⁸ Gûdingoalle illũnatik nungutaujomârput.

¹⁹ Kairtut ᴋairosunginut nunablo ittersanginut aijomârput, Nâlekab sivoranarninganit pitsartujoᴋsôninganillo opinadlartomit (ᴋemâvlutik), nikkovilerpat, nunaᴋsoaᴋ sajukpiluktitsomavlugo.

²⁰ Tamannale pilerpat, inuit Gûdingoaᴋotitik silbereojut goldeojullo, sannajatik tuksiarviorᴋovlugit, egitsomârpait terrianiangajunut inalukanullo,

²¹ Pullajomavlutiglo ᴋairtut ᴋongnânginut ᴋairosunginullo Nâlekab sivoranarninganit pitsartujoᴋsôninganillo opinadlartomit, nikkovilerpat, nunaᴋsoaᴋ sajukpiluktitsomavlugo.

²² Inuit allarsigik ᴋingamikkut annersartut, (nallonalungimat), ᴋanoᴋ angitigijomik ivlerijaksaumangâta.