Jesaiase 19 - Labrador Inuttitut Heritage Bible

Egiptenemut.

¹ Tamadja oᴋauseᴋ inerterijutiksaᴋ Egiptenemut. — Ahâk, Nâlegaᴋ nuvujakut tuavitokut ingergaromârpoᴋ tikkidlunelo Egiptenemut. Gûdingoallo Egiptenemẽtut sajugomârput sângane, Egiptenemiullo õmatingit kakkillâromârput illungine.

² Egiptenemiullo sakkolitsomârpakka Egiptenemiôᴋatinginut, sorsugomârpullo nalliat ᴋattangutiminut nalliallo illannârijaminut, iglugasaksuit iglugasaksoarnut, attaniovik attaniovingmut.

³ Egiptenemiullo maksoaningat pêromârpoᴋ illunginit, kajusimaningillo nungutitsomavakka. Tagva Gûdingoat appertsoromârpait nallautainerluktullo angakkullo pijomârtuksaniglo oᴋasôngojut.

⁴ Egiptenemiullo pititsomavakka aulatsijut takkopsoajuitut agganginut, attanersoarlo sôngojoᴋ nâlegaksaujomârpoᴋ taipkonunga, taimak oᴋarpoᴋ Nâlegaᴋ, ᴋilangmiugasaksuit Nâlegangat.

⁵ Tassersoarnelo imeᴋarungnairomârpoᴋ, kôksoarlo ipteriliklune niparomârpoᴋ.

⁶ Kôksuillo tippelugomârput, kôllo ipteriliklutik niparomârput, perortullo suvlolît iviksuillo ᴋunorlersâromârput.

⁷ Naternat iviksukatalît kôngme, kôb sinânẽtut nungutaujomârput, perorsijallo kôb sinânẽtut ᴋunorlersâromârput asserorlutik nunguvlutiglo.

⁸ Aulasartullo âlajomarput, illũnatiglo ᴋargjusanik imânut pititsijut ogguaromârput, nulluaniglo illijivaktut imânut kiksaromârput.

⁹ Kangusuktitaujomârput uvineruksaijalerijut illaijartaumajunik annorâksaliortullo ᴋaᴋortanik.

¹⁰ Sukkarijangit serᴋomitaujomârput, akkiliutiksarsiortullo illũnatik kiksaromârput.

¹¹ Angajoᴋajat Zoaneme sillaitôvut. Fâraub ikkajortingita illisimadlartut attanertuiningat sillainarpoᴋ. Suvluse Fârao oᴋautijomavisiûk: Illisimajut ᴋitorngarivânga, attanersuit sivorlît kinguvârivânga?

¹² Illisimajoᴋotitit nanẽᴋât tagva? Tâpkoa ᴋaujijautitsilit tukkisilerlutiglo ᴋilangmiugasaksuit Nâlegangata kajusimaninganik Egiptene pivlugo.

¹³ Angajoᴋajat Zoanemẽtut sillaitungortitauvut, angajoᴋajat Nofemẽtut uivêrijauvut, ingmikkôrtartut angajoᴋângita Egiptenemiut tammartipait.

¹⁴ Issumanik tammarnartunik Nâlegaᴋ pititsivoᴋ illunginut, tagva Egiptemiunik tammartitsivut piniarningine tamaine, sôrlo tallatoᴋ kaibjaingmat, merialerangame.

¹⁵ Egiptenelo sullijaksaᴋaromângilaᴋ niaᴋublõnêt pamiublõnêt palmillõnêt iviksuillõnêt sullijaksanginik.

¹⁶ Taipsomane Egiptenemiut arnatut illingajomârput, sajuklutik erᴋsivlutiglo ᴋilangmiugasaksuit Nâlegangata aggangit issamijut pivlugit, issangmagit taipkonunga.

¹⁷ Jûdablo nunanga Egiptenemiunut erᴋsinaromârpoᴋ, illũnatik tamattominga erᴋailertut ᴋoaᴋsâromârput ᴋilangmiugasaksuit Nâlegangata kajusimaninga pivlugo, kajusimajutigijanga taipkonunga.

¹⁸ Taipsomane iglugasaksuit tallimat Egiptenemêtsomârput Kanaanemiut oᴋausinginik oᴋauselît, ᴋilangmiugasaksuillo Nâlegangat angervigijomârpât. Illangit taijaujomârput iglugasaksoarnik terlingnartunik.

¹⁹ Taipsomane tunerguserviᴋaromârpoᴋ Nâlekamut Egiptenib ᴋerᴋane napajoᴋsoaᴋarlunelo nunab kiglingane Nâlekamut.

²⁰ Tamadja ᴋilangmiugasaksuit Nâlegangata nallunaikutanga kigligiutigijingalo Egipteneme, Nâlegaᴋ nipliavigijomârmatsuk siorniortitsijut pitjutigivlugit, tâmnalo tillikleromârmat piulijiksamik pitsartujomiglo taipkonunga, piulijomârlugit.

²¹ Nâlegaᴋ Egiptenemiunut illitarijaujomârpoᴋ, Egiptenemiullo Nâlegaᴋ illitarijomârpât taipsomane, kivgartoromarpâllo (ᴋaitsivigivlugo) pilliutiksanik tunergutiksaniglo, Nâlegarlo angervigijomârpât angerutigijomajamingnik nãmaksivlugillo.

²² Nâlekablo Egiptenemiut sugiaromârpait sugiarlugit inûlingmivlugillo; tâpkoalo sâgiaromârput Nâlekamut, tâpsomalo tussaromârpait inûlivlugillo.

²³ Taipsomane apᴋosinersoaᴋaromârpoᴋ Egiptenemit Assiriamut; Assiriamiut tikkitsomârput Egiptenemut Egiptenemiullo tikkitsomârput Assiriamut; Egiptenemiullo Assiriamiullo illagêklutik Gûde kivgartoromârpât.

²⁴ Tagva Israêlitittauᴋ illagijomârpait Egiptenemiullo Assiriamiullo saimanaromârpullo nunab ᴋerᴋane,

²⁵ Kilangmiugasaksuit Nâlegangata saimartitsomârmagit oᴋautivlugillo: Saimartitauleritse illipse Egiptenemiôjose inuᴋotikka, illipselo Assiriamiôjose aggama sanajangit, illipselo Israêliteojose kingormgutijakka.