Jesaiase 18 - Labrador Inuttitut Heritage Bible

Etiopiamut.

¹ Kappianarmek nuna ômajoᴋtaliksoaᴋ esarolingnik, Etiopiab kôksoangita ungatât.

² Tagvangat imakut kivgartortunik tilliklerput umiaᴋtortunik iviksoangojunik imaᴋsuit ᴋângatigut. Illipse, tillijaujose, tuavidlartose, ainiaritse nunaᴋatigênut angijunut mingoarsimajunullo, nunaᴋatigênut erᴋsinartunut itsaᴋsoarnit mãnamut, nunaᴋatigênut aksorôdjijunut, asserorsaijunut, nunaᴋartunut kôksoaᴋtalingme.

³ Sillaᴋsoarmiôjose illũnase, nunaᴋatigêktoselo illũnase, saimasertoᴋarpat ᴋaᴋᴋane, takkunârsiuk! tiptulausijartoᴋarpat, tussarsiuk!

⁴ Nâlekab oᴋarvigingmanga imâk: Kikkaromavunga iksivautamnêdlungalo takkonâromavunga, sôrlo kiak (illingangmat) seᴋinerartillugo, sôrlolo nuvujaᴋ mitsuksoaᴋtalik (illingangmat) kattersoivingme kiaktalingme.

⁵ Kattersoivigle nalliuterᴋârtinago, nuvugulait innersimakpatta nuvugulaillo paungangorpatta innilerlutiglo, tagva akkerungit kiblortaujomârput savingnut, akkerungillo siamartut nungutaujomârput pêrtauvlutiglo.

⁶ Tamakkoa illũnatik ᴋemaktauvlutik inniksaujomârput tingmitjanut ᴋaᴋᴋanẽtunut nergjutinullo nunamẽtunut. Tingmitjat aujêviᴋaromârput tagvane, nergjutillo nunamẽtut okkêviᴋaromârput tagvane.

⁷ Tamanna nalliutilerpat, tunergutiksat ᴋaitaujomârput ᴋilangmiugasaksuit Nâlegangannut: nunaᴋatigêt angijut mingoarsimajullo, nunaᴋatigêt erᴋsinartut itsaᴋsoarnit mãnamut, nunaᴋatigêt aksorôdjijut asserorsaijut, nunaᴋartut kôksoaᴋtalingme — ᴋilangmiugasaksuit Nâlegangata attingata opigijauvianut, Zionib ᴋaᴋᴋanganut.