Jesaiase 17 - Labrador Inuttitut Heritage Bible

Damaskusemut Israêlemullo.

¹ Tamadja oᴋauseᴋ inerterijutiksaᴋ Damaskusemut. — Ahâk, Damaskuse iglugasaksoaᴋarungnairpoᴋ serᴋomakungordlune.

² Aroêrib iglugasaksoangit ᴋemaktauvut, nergjutit kattimajut tagvane pissugomârput, aᴋopijomârput agviartaunatik.

³ Efraimiblo iglugasaksoangit avaluᴋsoalît Damaskusiblo atttaniovinga nungutaujomârput, amiakôjullo Siriame adsigijomârpât Israêlikkut nertornarningat, oᴋarpoᴋ ᴋilangmiugasaksuit Nâlegangat.

⁴ Tamanna nalliutilerpat, Jâkob nertornarninga mikkijomârpoᴋ, uviningatalo ᴋuinininga sallulertitaujomârpoᴋ.

⁵ Imailingajoᴋaromârpoᴋ, sôrlo (illingajoᴋarmat), kibluijub iviksuit kattersorpagit tallingatalo sullugainerit kiblorpagit, sôrlolo (illingajoᴋarmat), kattersoijoᴋarpat sullugainernik kanganerlukunik Refait naternanganne.

⁶ Amiakoᴋaromârpoᴋ, sôrlo (amiakoᴋarmat) napârtome orᴋsutalingme, kattaktitsijoᴋartillugo ajaupiamut, paunganik maggungnik pingasuniglõnêt pappingane, sittamanik tallimaniglõnêt napârtub akkerungine, oᴋarpoᴋ Nâlegaᴋ, Israêlib Gûdinga.

⁷ Taipsomane inûb pingortitine tautugomârpâ, ijîkitalo ivlernartitoᴋ Israêlikkune takkonâromârpâk.

⁸ Tunerguservîllo aggame sannajangit tautugungnairomârpait, takkonârungnairlugillo aggame sannajangit: Astartingoat ᴋejuit napajullo seᴋinermut illingajut.

⁹ Taipsomane iglugasaksoangit pitsartuneliksuit illingajomârput ᴋemaktaumajotut napârtoliksoarme, ᴋaᴋᴋârulangnelo ᴋemaktaumajotut, Israêlikkut aggermatta; asserortaujomârpullo.

¹⁰ Gûde piulijiksarijat puigorangne, ᴋairtorlo sapudjauviksarijat erᴋaumanginangne, perorsêvingnik allianartunik sanavotit, illijivigivlugit takkorngartat karngasûtinginik.

¹¹ Uvlorme illijiviojome udjertuluaralloarpattit, uvlâkullo karngarsortatit perotsiartipattit, kissianele kattersoidlaromârpotit uvlorme kiksanartome, ãnianartolingme oᴋautaujungnangitomik.

¹² Kappianarmêk nunaᴋatigêt unuktovaksuit ukkoa! Iktullijârput, sôrlo imarbik iktullijârmat, inuillo ᴋuᴋudlarningat nipallâvoᴋ, sôrlo imaᴋsuit nipallângmatta.

¹³ Illa imaᴋsoatitut nipallâjutitut innugasaᴋsuit nipallâvut. Gûdible suangajomârpait; ungasiktomut ᴋemâjomârput tagva, tiktauvlutik sanniktitut ᴋaᴋᴋat ᴋângine, anoremut (tiktausaraitutitut), perᴋtotut aᴋunaᴋsoarmut (aulataujotut).

¹⁴ Unnulerpat, ahâk, ᴋoaᴋsârnartoᴋarpoᴋ, ᴋaulerᴋârtinagole saᴋᴋijârungnaipoᴋ. Tamadja arᴋtaijipta akkilertauningat, asserorsartipta nerriugijaksangat.