Jesaiase 16 - Labrador Inuttitut Heritage Bible

Ammalo Moabemut.

¹ Nunab aulatsijoᴋotinganut tillikliutjititse saugârangnik Selamit ᴋairtoliksoarmit Zionib panningata ᴋaᴋᴋanganut.

² Tingmiatitullo niviortutitut, auktortamingnit ᴋemâtitaujutitut taimailingajomârput Moabib panningit Arnonib ikârtorvingine.

³ Attanertuileritse, erᴋartuileritse; unnuarmut adsigêktiuk tachalinît uvlub ᴋetterarningane; unangmijaujut ijertulaukit, ᴋemâjullo oᴋautiginagit.

⁴ Illingne inniksarsilit pikka, Moabiterit unangmijaujut saputikit asserorsaijomit! (tagva) unangmiklertoᴋ nungutaulerpoᴋ, asserorsainerlo sorairpoᴋ, aksorôdjijut pêrtauvut nunamit.

⁵ Saimanermulle iksivautaᴋsoarmik âᴋiksoijoᴋaromârpoᴋ, ᴋângane nallâgôrtomik iksivajoᴋaromârpoᴋ Dâvidib iglungane, erᴋartuijomik, erᴋartuitsiarnermik attortomik, idluarsainermik saᴋᴋertitsijomik.

⁶ Moabib piojoridlarninganik tussaumavogut, piojoridlarmat illa, pingijaininganiglo piojorininganiglo ningaumajârninganiglo saegloninginiglo sullingitunik.

⁷ Tamanna pivlugo Moabemiut nangminitik âladlarutigijomârpait, illunamasiatik âladlaromârput. Kirrâresib tungavingit pivlugit anersaumijomârpose kappiasummarikluse.

⁸ Hesbonib perorsêvingit panersimavut, napârtub vaineliksab Sibmamẽtub akkerungit, tôrtut Jaeseremut, inuᴋajuitokut perorpalliajut naviksimavut nallojut angajoᴋânginut, akkerungit siamartut imarbik ikkârlugo.

⁹ Tamanna pivlugo napârtoᴋ vaineliksaᴋ Sibmamẽtoᴋ ogguarutigijomavara, sôrlo Jaeserib ogguarutigingmago. Kugvimnut mitsuktitsomavaptik, Hesbone Elealelo; ᴋuᴋudlartut (sorsuktuksat) ittârmattik, kattersoiveᴋartillugo paunganik ᴋaᴋᴋôjaksaniglo.

¹⁰ Serrineᴋ ᴋuviasungnerlo sorairpuk perorsêvingme, ᴋaᴋᴋanelo vaineliksatalingne serrijoᴋangilaᴋ nipliajoᴋangilarlõnêt. Vainemik tukkarniktoᴋangilaᴋ iptêjaivingme, nipliadlarningat sorairtipara.

¹¹ Tamanna pivlugo õmatiga Harfetut nipliavoᴋ Moabe pivlugo, illugalo Kirrâresse pivlugo.

¹² Moabelo tagva saᴋᴋijâlerune ᴋaᴋᴋârulangne merngortortillune, tuksiariartorunelo kattimavingminut, sullijomângilaᴋ.

¹³ Tamadja oᴋauseᴋ Nâlekab oᴋauserijanga sivorngane Moabe pivlugo.

¹⁴ Mãnale Nâlegaᴋ oᴋauseᴋarivoᴋ imâk oᴋarlune: Jârit pingasut, kivgartortub jâringititut illingajut, nâkpatta, tagva Moabib ânanauninga miklilertitaujomârpoᴋ perᴋutingillo illũnatik, ikkitoarsungniglo amiakoᴋaromârpoᴋ unuktuniungitoᴋ.