Jesaiase 15 - Labrador Inuttitut Heritage Bible

Moabemut.

¹ Tamadja oᴋauseᴋ inerterijutiksaᴋ Moabemut. — Unnuangotillugo Kirib Moabemẽtutub asserortauvia nalliutivoᴋ, tâva. Unnuangotillugo Kirib Moabemẽtub asserortauvia nalliutivoᴋ, tâva.

² Bajitemut Diboniblo ᴋaᴋᴋârulanginut majorarput ᴋeavlutik, Nêbo Medebalo Moabiterit ârosûtigivakik. Illũnatik nujangit sallimavut umeᴋarungnairtitauvlutiglo.

³ Iglut akkornganne pôksajanik ᴋetteruserput, iglut ᴋângine akkorngannelo illũnatik âladlarput ᴋeadlarlutiglo.

⁴ Hesbone Elealo nipliavuk, nipliadlarningak tussaksauvoᴋ aglât Jahatsemut. Tamanna pivlugo Moab sorsuktuksaᴋsoaᴋotingit ogguarput kappiasuktitauvlutik.

⁵ Omatiga nipliavoᴋ Moabe pivlugo; tagvangat ᴋemâjut Zoare tikkipât tuktuvaktut jareliktut pingasunik. Keavlutik Lukitib ᴋaᴋᴋanginut majorarput, apᴋosinermelo Horonaimut ogguarlutik ᴋuᴋudlarput.

⁶ Nimrib puilavingit imeᴋarungnairput, ivît pannilerput, iviksukallo ᴋunorlerput, tungujoᴋtaᴋarungnairpoᴋ.

⁷ Tamanna pivlugo perᴋutit kattititatik torᴋortatiglo aularutivait kôb ukpigataliub ungatânut.

⁸ Nippivaksuit tussaksauvut Moab erᴋâne illũnâne, âladlarput Eglaime tikkidlugo, âladlarput Beer-Elime tikkidlugo.

⁹ Imiᴋsuit Dimoneme auliksôvut; Dimon anginersamut tikkitaurᴋojomârpara sulle, loeve pititsomârpara Moabemit ᴋemâjunut amiakôjunullo nuname.