Jesaiase 14 - Labrador Inuttitut Heritage Bible

Bâbelemut Assuremullo Filisterit nunangannullo.

¹ Nalekab Jâko nâpkigijomârpâ, Israêle aneriluarlugo, âtillugik nunangangnut. Takkorngartallo tikkitsomârput, Jâkokkunut kattimgajomavlutik.

² Nunaᴋatigêksuillo tigujomârpait aitillugillo nunagijaksangannut, Israêlikkullo kivgarijomârpait taipkoa angutillo arnallo Nâlekab nunangane; pititigijatiglo parngnanairsimavingmut pititsomârpait parngnanairsimavingmut, attaniojomârpullo attanerijamingnut.

³ Pijoᴋaromârporlo, Nâlekab merngoerserviksarsitipattit ogguarnernit kiksarnernillo kippaludlarnernillo attortarnit taipsomane,

⁴ Imaitunik oᴋauseᴋaleromârpotit Bâbelib attaninga pivlugo oᴋarlutit: Ituᴋᴋê! ullapitsijoᴋ noᴋᴋarpoᴋ, siorniorvik sorairpoᴋ.

⁵ Nâlekab idluitut issaᴋautingat navikpâ, aulatsijut ajaupiangat,

⁶ Issaᴋautiojoᴋ nunaᴋatigêksoarnut, ᴋaningaumajârtub pinga, issaᴋaitsainartub sorairane, aulatsijutaujoᴋ inugiartoᴋsoarnut, ningartub pinga, unangmiklertub takopsoajuidlune.

⁷ Mãnale sillaᴋsoarmiut illũnatik merngoerserput ᴋikkarlutiglo; igiaᴋomijarput.

⁸ Keblariktut aglât zêderillo Libanonemẽtut ᴋuviasûtigivâtit oᴋarlutik: Ochosimagavit, ullimariartortomik majorartoᴋarungnairpoᴋ uvaptingnut.

⁹ Anernerit inningat takanna aulajârpoᴋ pivlutit pagrearlutit, tikkigavit. Timeᴋarungnairtut tupaktipait pivlutit, sillaᴋsoarmiut angajoᴋângit tamaita nunaᴋatigêksuillo attanersoangit niᴋovilerᴋovait iksivautanginit.

¹⁰ Illũnatik nipliavlutik oᴋarvigivâtit: Igvittauᴋ nukkingerutivotit uvaptitut, adsigivaptigit.

¹¹ Ananaunit kanungartitauvoᴋ anernerit inningannut harfeᴋotitillo nipliajut. Kopergut ᴋârivattit, ᴋuglugiallo ᴋebbigivattit.

¹² Aiai! kattakpotit ᴋilangmit, uvloriangojotit ᴋausiut! Nunamut ochotitauvotit, nunaᴋatigêksoarnik aksorôdjijotit.

¹³ Omatikkut issumaᴋaralloarpotit imâk: Kilangmut ᴋongmuaromavunga, iksivautaᴋsoaᴋotiga Gûdib uvloriangita ᴋollãne tungaviᴋartitsomavara ingidlungalo ᴋaᴋᴋamut kattimaviojomut apsoma ungatânut.

¹⁴ Kongmuaromavunga nuvujat ᴋotsiktut ᴋollãnut, ᴋotsingnerpângorjorlo adsigijomavara.

¹⁵ Kissianele kappianartovingmut pititauvotit, itersâlungmut ittinerpâmut.

¹⁶ Illingnik tautuktut takkonârpâtit ullernaigivlutillo: Tâmnauvâ angut imna nunaᴋsoarmiunik sajuktitsijoᴋ attaniovingniglo siorniortitsijoᴋ?

¹⁷ Nunaᴋsoarmik inuᴋarungnaititsijoᴋ, iglugasaksoanginiglo asserorsaijoᴋ, parngnanairsortaminiglo annerᴋojingitoᴋ iglunginut?

¹⁸ Nunaᴋatigêksuit attanersoangit illũnatik merngoerseralloarput opigijauvlutik attunit iglomingne.

¹⁹ Igville egitauvotit illuviksarnit akkerotut nachogijaujotut, mattujauvlutit toᴋotaumajunut, saviksoarmut kappijaumajunut, kannungartunut itersâlub nattinganut, ᴋellortut tullerartaumajotut.

²⁰ Illuveᴋaᴋatigingilattit, nunaᴋotit asserorangne, nunaᴋatitillo toᴋogangne. Idluitullijut kinguvâksangit erᴋaumajaksaungilat issoᴋangitomut.

²¹ Kitornganginut toᴋotauviksamik âᴋiksoileritse sivorlingita idluitulliningit pitjutigivlugit. Aglijuksaungilat, nuna perᴋutigivlugo nunablo ᴋânga nãmavlugo iglugasaksoarnik.

²² Uvangalo parngnaileromavunga tâpkonunga, oᴋarpoᴋ ᴋilangmiugasaksuit Nâlegangat, Bâbelemiut pêrmariklugit attingit amiakungillo, ᴋitorngangit kinguvângillo, oᴋarpoᴋ Nâlegaᴋ.

²³ Nunangallo iblâᴋosernut kingormgujaksautitsomavara imaᴋsungortillugolo sannerlugolo sanniutemut nungutitsijomut, oᴋarpoᴋ ᴋilaugmiugasaksuit Nâlegangat.

²⁴ Kilangmiugasaksuit Nâlegangat angermariklune oᴋarpoᴋ: Illa pijoᴋartuksauvoᴋ, sôrlo issumagama; illingajuksauvoᴋ, sôrlo kajusimagama.

²⁵ Assure asserorasuarpara nunaᴋotimne. Tulleraromârpara ᴋaᴋᴋamne, nangmautanga pêrlugo taipkonangat (Israêlitinit), nangmartaurᴋojangalo pêrlugo tuinginit.

²⁶ Tamadja kajusimaninga kajusimajutigijanga nunaᴋsoaᴋ illũnât pivlugo; tamadjalo aggait issaksimajut nunaᴋatigêksoarnut tamainut.

²⁷ Kilangmiugasaksuit Nâlegangata tamanna kajusimautigingmago, kia agviaromavaûk? Aggangillo issamijut kia uttertitsomavagît?

²⁸ Jâre taimna, attaneᴋ Ahase toᴋongmat, oᴋauseᴋ inerterijutiksaᴋ imailingavoᴋ:

²⁹ Filisterit nunangat, ᴋuviasungniarnak, issaᴋautik illingnut issaᴋautiojoᴋ naviksimangmat. Kuglugiab amânganit ᴋugligiarâluk saᴋᴋijâromârmat, kingorlerijangalo tagva ᴋuglugiaᴋ ᴋassilinartoᴋ sukkalidlartorlo.

³⁰ Ajoᴋsartut erniangoᴋârtungit nerᴋiksarsioromârput, aklujullo terliklutik merngoerseromârput; amârle illingnit pijoᴋ kângmut toᴋotsomavara, amiakôjullo ᴋimitaujomârput.

³¹ Itertarvik, avâladlarit! iglugasaksuit, nipliadlaritse! Filisterit nunangat illũnane kakkilârpoᴋ, avangat iserluᴋarmat, ingmikkôrtoᴋalungilarlo kattimgajoᴋsoaᴋotingine.

³² Kanorlo innugasaᴋsuit tillijangit kiojomârᴋagît? Imâk: Nâlekab Zione tunganelivâ, tagvanelo sapputjauviksaᴋaromârput inuᴋotingita ajulertoᴋotingit.