Jesaiase 13 - Labrador Inuttitut Heritage Bible

Bâbelemut.

¹ Tamadja oᴋauseᴋ inerterijutiksaᴋ Bâbelemut, Jesaiasib, Amosib erningata takkojanga.

² Kattilerutiksamik saimaseritse ᴋaᴋᴋame merᴋoᴋangitome, nipliavigidlarsigik nullorarlugillo, iterᴋovlugit angajoᴋajat itertarvingitigut.

³ Ivsornaititakka perᴋovakka, pitsartutitakkalo ᴋairᴋovakka, ningaumajârnima kivgangit, ᴋuviasungnermut igiaᴋomijartut.

⁴ Unudlartut ᴋuᴋudlarningit tussaksauvut ᴋaᴋᴋane sôrlo nunaᴋatigêksoarnit pijut; pervaluktoᴋarpoᴋ nallojut attaniovingita inunginit kattisimajunit pijomik sôrlo. Kilangmiugasaksuit Nâlegangat sorsuktuksaᴋsoaᴋotiminik parngnailerᴋojivoᴋ.

⁵ Nunanit ungasiktunit, ᴋilaub issuanit tikkilerput Nâlegaᴋ ningaumajârningatalo sakkungit, nunaᴋsoaᴋ illũnât asseroriartorlugo.

⁶ Avâladlaritse, Nâlekab uvluksanga ᴋaglilermat; asseroijutiksatut ajugaᴋangitomit pijotut aggerpoᴋ.

⁷ Tamanna pivlugo, illũnatik aggangit nukkingeromârput, inuillo illũnatik õmatingit kakkillâromârput.

⁸ Koaᴋsâromârput, siorniornartomullo ãnianartomullo tikkitaujomârput, ernisuktotut kappiasugomârput, okkijiutigêgomârput, kênangillo ikkomatut aupallagomârput.

⁹ Ahâk, Nâlekab uvlunga aggerpoᴋ takopsoajuidlune ningaumajârnerlo ningauserlo illungertortoᴋ, nuna asserorlugo idluitullijullo tagvangat pêrlugit.

¹⁰ Kilaub uvloriangit siaktungillo ᴋaumanarungnairput, seᴋᴋinerlo târlune nuilerpoᴋ, taᴋᴋerlo ᴋaumangilaᴋ.

¹¹ Sillaᴋsoarmiullo sugiaromavakka idluitulliningit pivlugit, idluitullo sugiaromavakka piungitulliningit pivlugit, pingijaitullo piojoriningat nungutitsomavara pimmariutertullo pingijainingat serᴋomitsomavara.

¹² Inuit akkutonersautitsomârpakka goldemit ivlernartomit angutillo goldemit Ofiremit pijomit.

¹³ Tamanna pivlugo ᴋilak aulatitsomavara, nunalo sajukpilaklune nûtitaujomârpoᴋ inniminit ᴋilangmiugasaksuit Nâlegangata ᴋaningajâdlarninganut, ningausinga katsungailerpat.

¹⁴ Tuktungajotut unangmijaujotut, saugaᴋtitullo pairijeᴋangitutitut illingajomârput; illũnatik nunaᴋatimingnut angeraromârput, illũnatik nunaᴋotimingnut ᴋemâjomârput.

¹⁵ Tagvane naipitavinît attunit kappijaujomârput, illagijangillo saviksoarmut toᴋotaujomârput.

¹⁶ Kitorngangit serᴋomitaujomârput takkunârtillugit, iglungillo piksaerutijaujomârput, nulliangillo sujuktaujomârput.

¹⁷ Ahâk, Mêderit taipkonunga akkerartorᴋovakka, silberemik erᴋasungitut goldemiglõnêt kamangitut.

¹⁸ Inôsuktut pittiksimingnut pittigomârpait, timît singaingit nâpkinginagit, sorutsittauᴋ nâpkoarinagit.

¹⁹ Bâbelelo ânanaunerpâᴋ attaniovingnit tamainit, Kaldêarit nertûtigijangat, pinarnarnerpâᴋ illingajomârpoᴋ Sodomatut Gomorratullo Gûdib mumiktâktitut.

²⁰ Mattoma kingorngane nunaᴋartoᴋaromâtsengilaᴋ tagvane, igloᴋartoᴋaromâtsanginivoᴋ tagvane kinguvarêt kingorlinginut; Arâbiamiut tuppeᴋaromâtsengilat tagvane, sauganiglo mianersijut tangmârviksaᴋaromâtsanginivut tagvane.

²¹ Omajoâluille aᴋopijomârput tagvane, iglungillo ukbiksuit innigijomârpait, staraussillo tagvanẽtsomârput, assẽnallo oᴋigêseromârput tagvane.

²² Terrianiangajullo miugûromârput iglutsiangine ᴋingmillo nujuartut iglugasaksoangine allianartune. Piviksangat ᴋaglilerpoᴋ uvlungillo mullutsangilat.