Jesaiase 10 - Labrador Inuttitut Heritage Bible

Idluitullijut sugiartauningannik. Assiriamiut nungutauningannik.

¹ Kappianarmek illusernik piungitunik illuseᴋarᴋojijut, aglangnik siorniûtiksaujunik aglakpaktut,

² Aklujut ajaktorlugit erᴋartuivingmit, ajoᴋsartullo inuᴋotima akkorngannẽtut idluarᴋutiksangit kamaginagit, uigarnerit perᴋutigijomavlugit illiarsuillo aᴋsâromavlugit.

³ Kanoᴋ illioromavisê sugiartauvingme, asserortauvingme ungasiktomit ᴋaglilertome? Kimut ᴋemâjomavisê piulijaujomavluse? Nertornautigijaselo nane torᴋoromavisigîk?

⁴ Imâtuinaᴋ illiorungnaromârput: parngnanairsortaujut akkornganne okkungavlutik, toᴋotaujut akkorngannut kattaklutik. Tamakkoale tamaita Nâlekab ningausingata sorairutigingilait, aggangillo issamivut sulle.

⁵ Kappianarmêk Assure, ningautsima issaᴋautigijanga, ningaumajârnera ajaupiauvoᴋ tâpkoa agganginut.

⁶ Tillijomavara nunaᴋatigênut nertornalungitunut, perᴋojomavaralo nunaᴋatigênut ningaumajutigijamnut, arᴋtaijaurᴋovlugit aᴋsârtaurᴋovlugillo tullerajartaurᴋovlugillo tâpsomunga aktalukutitut iglut akkornganne.

⁷ Taimnale taimak pijomangilaᴋ, õmatingalo taimaitunik issumaᴋalungilaᴋ, õmatingale kajusimavoᴋ, nunaᴋatigêt ikkitôlungitut nungutsomavlugit pêjaromavlugillo.

⁸ Imâk oᴋarmat: Angajoᴋângortitakka attaniongilât illũnatik?

⁹ Kalno Kargemisetut-ingilâᴋ? Hamat Arpadetut-ingilâᴋ? Samâria Damaskusetut-ingilâᴋ?

¹⁰ Sôrlo aggama Gûdingoat attaniovingit nagvarmagit, Gûdingoangit unurnersaugalloartillugit Jerusalemẽtunit Samâriamẽtunillo,

¹¹ Sôrlolo Samâria Gûdingoaᴋotingillo piniarvigigapkit, taimak piniartuksaunginivîk Jerusalemut Gûdingoaᴋotinginullo?

¹² Nâlekable piniaraksane tamaita Zionib ᴋaᴋᴋangane Jerusalemelo nãmaksilerunigit, tagva (Nâlegaᴋ oᴋarpoᴋ) Assiriamiut attaningata piojoridlartub õmatingata illiorningit sugiaromavakka pingijainingalo ijîkikkut saᴋᴋijârtoᴋ.

¹³ Taimna oᴋarmat: Aggama pitsartuninginut tamanna piniarpara illisimanimnullo, uvanga sillatogama. Nunaᴋatigêt kiglingit ablatsautipakka perᴋutingillo pêjarpakka, iksivautaᴋsoarmẽtullo ochotipakka parngnertut.

¹⁴ Aggamalo nunaᴋatigêt perᴋutingit nagvârpait, sôrlo auktortaᴋ (nagvârtaungmat), nunallo tamaita kattersorpakka, sôrlo manît ᴋemaktaumajut kattersortauvangmatta, puvitôrtomiglõnêt aitartartomiglõnêt niviortomiglõnêt peᴋartinnago.

¹⁵ Ullimaut nertorungnarᴋâ attortiminut? ubvalo kiblût nertorungnarᴋâ attortiminut? Taimailiorungnarpanik, tagva issaᴋautiub aulanajarivâ aulatine, ajaupiablo kivigajarivâ ᴋejûngitoᴋ (inuk).

¹⁶ Taimaimat Nâlegaᴋ, ᴋilangmiugasaksuit Nâlegangat pitsartuerutijaunartomik tillikleromârpoᴋ pitsartujoᴋsoaᴋotingita akkorngannut, nâlegauvingatalo attâne ikkoalajoᴋaromârpoᴋ ikkomab ikkoalaningatut.

¹⁷ Israêliblo ᴋaumanerijanga ikkomangolerpoᴋ, ivlernartitorlo Israêlikkune ikkoalajungolerpoᴋ, ukpigait perornerdluktullo kakkilautilît ikkidlugit nungudlugillo uvlorme attautseme.

¹⁸ Napârtoᴋotingillo perorsêviᴋotingillo ânanaujut nungutimmarigomârpait tarningillo timingillo; illingajomârput ᴋanimadlartotut nukkêrutivalliajotut.

¹⁹ Napârtullo amiakôjut napârtolivinerme kittitaujungnaromârput, nukappiab aglakpait.

²⁰ Taipsomane Israêlib amiakungita, Jâkokkut akkornganne pijausimangitut sugiartitik tattigijungnairomârpât, Nâlegarle ivlernartitoᴋ Israêlikkune tattigijomârpât nallâgôrlutik.

²¹ Amiakôjut sâgiaromârput, illa amiakôjut Jâkokkune sâgiaromârput Gûdemut pitsartujoᴋsôjomut.

²² Inuᴋotitit, Israêle, unuktôgalloarpatta siorᴋatitut imab sikjanganẽtutitut, amiakôjut tâpkonangat (kissimik) sâgiaromârput. Nungutaksauningat kajusimajutauvoᴋ, erᴋartuijoᴋ ᴋaglilerpoᴋ,

²³ Nâlegaᴋ, ᴋilangmiugasaksuit Nâlegangat nungutitsinermik kajusimajutigijaminik piniaromârmat nuname illũnâne.

²⁴ Taimaimat Nâlegaᴋ, ᴋilangmiugasaksuit Nâlegangat oᴋarpoᴋ: Inuᴋotikka, Zioneme nunaᴋartose, Assure sivoraginiarasiuk! Annautamut annaudlaromâralloarpâse ajaupiaᴋotinelo ᴋollangiutitillugo illipsingnut, sôrlo Egipteneme pijoᴋalaungmat.

²⁵ Mãnakasakut ningarnera nãmaksijomârpoᴋ, ningaumajârnimalo nungutinasuaromârpâ.

²⁶ Kilangmiugasaksuillo Nâlegangata issaᴋautik kivigomârpâ taipsomunga, sôrlo Midiane sugiaramiuk Orib ᴋairtungane, ajaupiaᴋotinelo imarbingmut issautijomârpâ sôrlo Egipteneme.

²⁷ Taipsomane nangmartaurᴋojanga tuipsingnit pêromârpoᴋ nangmautangalo ᴋungasipsingnit, nangmautâluk serᴋomitaujomârmat sôngodlartomut.

²⁸ Ajate tikkipâ, Mikerone apᴋutigivâ, Mikmaseme perᴋutine ᴋemakpait.

²⁹ Kôrukkut ingergavut. Gebame sinniktalauᴋta! (taimak oᴋarput.) Tagva Râmamiut ᴋoaᴋsârput, nunaᴋartut Gibeame Saulib nunagilauᴋtangane ᴋemâvut.

³⁰ Nipliadlarit, Gallib panninga; kamatsialerit, Laisa; naiperᴋonarpotit, Anatote!

³¹ Madmênamiut ᴋemâvut, Gîbimiut kattimalerput ᴋemâjomamut.

³² Uvlome sulle Nobemẽniarpoᴋ. Zionib panningata ᴋaᴋᴋanga issakpâ, Jerusalemib ᴋaᴋᴋârulanga.

³³ Ahâgle! Nâlekab, ᴋilangmiugasaksuit Nâlegangata napârtut nuvungit akkeruijarpait ᴋoaᴋsârnadlarlune; napârtullo poᴋtojoᴋsuit kippijauvut, poᴋtojullo pokitungortitauvut.

³⁴ Napârtoliksuillo ukpigangit ullimaumut kippijauvut, Libanonelo ochotitauvoᴋ ajugaᴋangitomut. Idluitullijut sugiartauningannik. Assiriamiut nungutauningannik.