Jesaiase 1 - Labrador Inuttitut Heritage Bible

Israêlitit ᴋaᴋᴋialerᴋojauningannik.

¹ Tamadja Jesaiasib, Amosib erningata takkotitaunerilauᴋtangit Jûda Jerusalemelo pivlugik, Usia Jôtamelo Ahaselo Hiskialo attaniotillugit Judame.

² Kilait tussaleritse! nunalo kamatsialerit! Nâlegaᴋ oᴋarmat: Kitornganik inugoigalloarpunga nertornartitsivlungalo, tâpkoale tunnupânga.

³ Tuktuvaub pairijine illitarivâ, siuterᴋortojublo perᴋutigijime nerrititsivia illitarivâ, Israêlitille illitarᴋsilungilat inuᴋotikkalo kamalungilat (uvamnik pairijimingnik).

⁴ Kappianarmêk nunaᴋatigêt idluitullijoᴋsuit, innugasaᴋsuit ajortoliksuit, kassẽtoᴋsuit kinguvângit, ᴋitorngat asserorsaijut, tâpkoa Nâlegaᴋ ᴋemangmatsuk ivlernartitorlo Israêlikkune oᴋarnerlûtigingmatsuk tunnulugo.

⁵ Naukut annaujaksauvisê sulle, idluitullinise unuksivalliatitsainarapsigik? Niaᴋoᴋ illũnane ãniavoᴋ, õmallo illũnane ᴋanimavoᴋ.

⁶ Allûgingnit niaᴋoanut ᴋanoengitoᴋangilaᴋ tâpsomane, ikkinigle killiniglo tiglûjarnerniglo nutânik maᴋitertaumangitunik mangiptaᴋangituniglo orᴋsumullo ânanausijaumangitunik.

⁷ Nunase sunaᴋarungnairpoᴋ, iglugasaksoase ikkomamut ikkitaumavut, takkorngartat perorsêvise nungupait ijipse sângine, pitaᴋarungnairlunelo sumiglõnêt (nunase) takkorngartarnut mumiksimajotut-ipoᴋ.

⁸ Zioniblo pannia amiakôvoᴋ igloarsuktut perorsêvingmẽtotut vaineliksatalingme, udjertorteojub innigijangatut perorsêvingme, iglugasaksoatitut illujaumajutitut.

⁹ Kilangmiugasaksuit Nâlegangata ikkitunik amiakoᴋartingipattigulle, Sodomatut-inajarpogut Gomorratullo illinganajarpogut.

¹⁰ Nâlekab oᴋausinga tussarsiuk, illipse attaniojose Sodomame, Gûdipta perᴋojangit õmamiutarisigik, illipse Gomorramiôjose!

¹¹ Tunergutipse unurningit suksauvât uvamnut? oᴋarpoᴋ Nâlegaᴋ. Angusalluit ikkoalajaksat ᴋuinijullo orᴋsungit arriupakka, tuktuvaillo saugârsuillo angusalluillo aungat ᴋuviagingilara.

¹² Itterangapse, sâmne saᴋᴋeromavluse, kina taimaitunik aggapsingnit pijomavâ, iglorusikka tullerarapsigik?

¹³ Tunergutinik nerᴋiksanik nallâgôngitunik ᴋaitsijungnairitse; tippegiksaut maᴋojugivara; taᴋᴋerub nutaulervingit (uvloᴋsiorutigijase) sabatillo kattimaniksallo pivlugit kamajomangilanga, uvloᴋsiortilluse idluitulligapse.

¹⁴ Taᴋᴋerub nutaulervingit (ivlerijase) uvloᴋsiorviselo tarnima ômigivait, tamakkoa oᴋumaigivakka, akkerartornagit merngortulerpunga.

¹⁵ Aggaselo uvamnut issagalloarapsigik, kênara ijerpara illipsingnut; tuksiaᴋattaralloarapse, tussangilapse, aggase auliksôngmatta.

¹⁶ Ubvaritse illipsingnik epᴋêjarluselo; idluitullinise pêjarsigik ijimnit idluitullijungniarluselo.

¹⁷ Ajungitullileritse idluarsaineᴋ pinasuarlugo, pimmariutertut inerterlugit, illiarsuit serngnigivlugit uigarnerillo illinganingine ikajorlugit.

¹⁸ Tagva ᴋaititse erᴋartortigêklutalo, Nâlegaᴋ oᴋarpoᴋ: Idluinise aupaluktotut-igalloarmatta, aputitut ᴋaᴋorsititaujomârput; aupaloriktotut aupalugalloarmatta, saukab merᴋungititut-itsomârput.

¹⁹ Kunulungikupse nâlekluselo, nunab perortungit nerrijomârpasse.

²⁰ Kunulerupsele tappatolerluselo, saviksoarmut nungutaujomârpose, Nâlekab ᴋanninga taimak oᴋarmat.

²¹ Ilâ iglugasaksuit nertornartut anguniarpaktotut illingatitaumavut. Idluarnermik illumertaulauᴋput, idluarsainerublo innigilauᴋpait, mãnale inuartut tagvanẽput.

²² Silbereᴋotit piunginerlukungorsimavoᴋ, vaineᴋotillo imermik akkusimavoᴋ.

²³ Attaneᴋotitit tapatovut tigliktoᴋsuillo illagivait, tâpkoa illũnatik akkiliusianik pijomadlarput, pilliusianiglo pinasuarput, illiarsuit serngnigilungilait, uigarnerillo illinganingit kamagingilait.

²⁴ Tamanna pivlugo Nâlegaᴋ, ᴋilangmiugasaksuit Nâlegangat, ajugautitoᴋ Israêlikkune oᴋarpoᴋ: Hai! ômigijikka saimautiksarijomârpakka akkerartortikkalo akkiniarlugit.

²⁵ Aggakkalo illingnut sâtitsomavakka, piunginerlukut pêrmariklugit illingnit sôrlo ubvautikut, kusseᴋsiarlo illũnât pêrlugo illingnit.

²⁶ Erᴋartuijuniglo tunidjivigijomârpagit sôrlo itsaᴋsoarme idluarsaijuniglo sôrlo sivorngane. Tagva iglugasaksoarnik idluartolingnik iglugasaksoarniglo nertornartunik taijaujomârpotit.

²⁷ Zione erkartuijomut piulijaujomârpoᴋ utertitaumajoᴋotingillo idluarsaijomut.

²⁸ Tapatojoᴋsuille idluitullijullo illunamasiatik asserortaujomârput, Nâlekamiglo ᴋemaijut toᴋotaujomârput,

²⁹ Kangusuktuksaugamik napârtut ᴋuviagijase pivlugit, illerasuktuksauvoselo perorsêvit annerijase pivlugit.

³⁰ Illipse napârtutitut-ileromârpose millukataᴋartutitut pannertunik, perorsêviktut imeᴋangitotut.

³¹ Pitsartujorlo simmiksatut illingatitaujomârpoᴋ sannajangalo ingnikpallaktut, tamarmiglo attautsekut ikkitaujomârpuk ᴋamitaujungnaratik.