Jeremia 9 - Labrador Inuttitut Heritage Bible

¹ Kanoktok niaᴋora imetuinaulerle ijîkkalo puailaviovlutik ᴋugvingnik, uvloᴋ nâvlugo unnuarlo nâvlugo ᴋugviorᴋovlunga inuᴋotima paningita toᴋorartauningit pivlugit.

² Kanoᴋtôᴋ tujormiviksaᴋatuinarlanga sunaᴋajuitome, sorlo ingergajut piᴋattarmatta; ᴋemâjungnarᴋovlunga inôᴋatimnik aularlungalo tâpkonangat! ilûnatik assiniarteongmatta, tunganaitoᴋsôᴋatigêt.

³ Niungaivut oᴋamingnik sorlo pitiksimingnik saglonermut; sôngosisimavut nuname, mikseᴋârneᴋ pivlugo-ungitorle; aglivaliavut idluinermit idluinermut, ilitaringilângalo, Nâlagaᴋ oᴋarpoᴋ.

⁴ Ilimasugitse ilûnase inôᴋatipsingnik, ᴋatangutiselo sungertutiginiarasigik; ᴋatangut pititsijomangmat ᴋatangutiminik, inôᴋatelo arvertaromavoᴋ terliarᴋataivlune.

⁵ Ilûnatiglo atunit uivêrikleromavut inôᴋatimingnik, mikseᴋârtomiglo oᴋaromangilat; oᴋatik ilisavait saglonernik oᴋarᴋovlugit, merngortortipullo nangminermingnik idluitulijomavlutik.

⁶ Innigijat uivêriklernerub ᴋêrᴋanêpoᴋ; uivêriklerneᴋ pivlugo ilitarijomangilânga, Nâlagaᴋ oᴋarpoᴋ.

⁷ Taimaimat imâk oᴋarpoᴋ Nâlagaᴋ Zebaot: Ahâk, auksititsomavakka ôktoromalaitalo; sumik tamattoma assianik piniarungnarᴋingâ inuᴋotima paningat pivlugô?

⁸ Oᴋangit ᴋargjûvut toᴋonartut; uivêriklernermik oᴋartut; ilangata inôᴋatine ilanârnartomik oᴋaᴋatigivâ, ômatiminele terliarasuarpâ.

⁹ Nalipsaraksaringilakkâ tamakkoa pivlugît? Nâlagaᴋ oᴋarpoᴋ; tarniga akkiniartuksaungilâᴋ inôᴋatigêksoanik taimaitunîk?

¹⁰ Kaᴋᴋat ᴋeajomavakka kajumiutigivlugillo, nergjuteᴋarvillo iviksukatalit naternamêtut oggorijomavlugit, panidlarmatta, apᴋusârtaujungnailutik kimut, nergjutillo nippingit tusaksaujungnaipullônêt; silab tingmiangit nergjutillo ilûnatik ᴋemâsimavut; aularsimavut.

¹¹ Jerusalemelo ᴋiggungortitsomavara, inniksauvlune terianiangojârtunut; Judablo iglugasaksoangit asseroromavakka, inuᴋarungnaimariklutik.

¹² Kina silatovâ tamanna tukkisijungnarlugô? kinauvâlo oᴋarviojoᴋ Nâlakab ᴋaninganut, kigligiutsijungnarᴋovlugo tamattomingâ? Suna pivlugo nuna aserortaumavâ panertungordlunalo sunaᴋajuitotut, inungmut apᴋusârtaujungnaiᴋovlugô?

¹³ Nâlagarlo oᴋarpoᴋ: (Taimailingavoᴋ) ᴋemailaungmatta perᴋojamnik tunilauᴋtamnik tâpkonunga, nâlalaungimattalo nippimnik, arvertalaungimattalo tâpkoa maliklugit;

¹⁴ Arvertalaungmattale ômatimik mangaitoᴋsôningat maliklugo, Baalelo maliklugo, sorlo ajoᴋertortaulaungmatta atâtamingnut;

¹⁵ Taimaimat imâk oᴋarpoᴋ Nâlagaᴋ Zebaot, Israêlib Gudinga: Ahâk, inugasaᴋsuit tamakkoa mamaitoᴋsoarnik nerrititsomavakka, imermiglo sungârnitomik imertitsomavlugit.

¹⁶ Siamartitsomavakka inôᴋatigêksuit akornganut, tâpkoalônêt atâtangitalônêt ilitarilaungitanginut; udlartautitsomavakkalo saviksoarmut, nungutsiᴋârtinanga tâpkoninga.

¹⁷ Nâlagaᴋ Zebaot imâk oᴋarpoᴋ: Issumaksarsioritse, arnallo ogguarpaktut ᴋaiᴋolersigik tikiᴋovlugit; arnallo silatojut aᴋpârtauᴋolersigik tikiᴋovlugit;

¹⁸ Tuavidlarlîllo ogguarniarlutik uvaptingnik, ijivut ᴋugviudlarᴋovlugit, ᴋermeriavullo puailavioᴋovlugit imermik.

¹⁹ Nippe ogguadlartoᴋ tusartaungmat Zionemit: Adjai! asserortaumadlarpogut! Sunairudjaudlarpogut, nunab ajaktorpâtigut, iglupta pingujarpâtigut.

²⁰ Sullele Nâlakab oᴋausinga tusarsiuk, ilipse arnaujose, siutipse Nâlakab ᴋaningata oᴋausinga ilaliorlitsuk, paniselo ajoᴋertorsigik ᴋeanermik, silaliselo ogguarnermik.

²¹ Toᴋo itârsimangmat igalâptigut, itersimavoᴋ igloᴋsoarijaptingnut; sorutsit silamêtut kibloromavlugit, inôsuktullo apᴋosineâlungnêtut.

²² Oᴋarit: Imâk Nâlagaᴋ oᴋarpoᴋ: Inuit timingit toᴋungajut katagomârput aᴋtarnerlukutitut perorsêvingme, ᴋippitatitullo kibluijub tunuane, ᴋatersortaujomângilallo.

²³ Imâk Nâlagaᴋ oᴋarpoᴋ: Ilisimajoᴋ nertôtiniarane ilisimanerminik, pitsartujoᴋ nertôtiniarane pitsartunerminik, akluitoᴋ nertôtiniarane akluinerminik;

²⁴ Nertôtijomajuble imaitoᴋ nertûtigiliuk, tukkisigame ilitarᴋsigamelo uvamnik, Nâlagaugamalo piniarneᴋartunga pitsiarnermik, idluarsainermiglo, ajunginermiglo nuname; tamakkoa ᴋuviagigapkit, Nâlagaᴋ oᴋarpoᴋ.

²⁵ Ahâk, naliutsomârpoᴋ, Nâlagaᴋ oᴋarpoᴋ, pidlarnigomârama kipimajunik kipimangitut ilagilugit;

²⁶ Egipten, Judalo, Edomelo, Ammoniblo ᴋitorngangit, Moabelo, ilûnaitalo salimajunik nujalit ulloangmingne, sunaᴋajuitome nunaᴋarpaktut; inôᴋatigêksuit ilûnatik kipimangitôngmatta, Israêliblo ᴋitorngangit ilûnatik kipimangitongmatta ômatimikkut.