Jeremia 8 - Labrador Inuttitut Heritage Bible

¹ Naliutome tâpsomane, Nâlagaᴋ oᴋarpoᴋ, anititsijomârput Judab ataningata sauninginik, aulatsijingitalo sauninginik, ajoᴋertuijullo sauninginik, Jerusalemiblo inungita sauninginik, iluvinginit;

² Siamartiniarpaillo seᴋiniub, taᴋᴋiublo, ᴋilangmiugasaksuillo (uvloritjat), ungagilauᴋtangita, kivgartulauᴋtangitalo, malilauᴋtangitalo, aperᴋutigilauᴋtangitalo, pamaktervigilauᴋtangitalo, sângine; katersortaujomângilat, iluvertaujomângilallônêt; aᴋtarnilukotuinaujomârput nuname.

³ Toᴋolo annerijaungâromârpoᴋ inôtsemit ᴋitorngarêt makkoa idluitut amiakunginut, amiakôjunut nunane tamaine ajaktortauvigijangine uvamnut, Nâlagaᴋ Zebaot oᴋarpoᴋ.

⁴ Okautijaksarivatillo sulle, Imâk Nâlagaᴋ oᴋarpoᴋ: Pâlalauᴋtoᴋ makitsungnairomârkâ? Tammalauᴋtoᴋ uterungnairomârᴋâ?

⁵ Suna pivlugole inugasaᴋsuit ukkua Jerusalemiut kingumut sittorsimavât kingupiartornermut soraijungnangitomût? Tammarsimatsainaromavut, uteromangilallo.

⁶ Nâlalauᴋpunga tusarlungalo, idluartomigle oᴋartoᴋangilaᴋ; ᴋaᴋᴋialertoᴋangilaᴋ idluitulinerminit, oᴋarlune: Sumik piniarsimavingâ? Ilûnatik aᴋpangerput aᴋpangervingmingne, horsetut kajusijotut sorᴋsungnermut.

⁷ Ila, tingmiaᴋ sigguᴋortojoᴋ ᴋilaub atâne ᴋaujimavoᴋ naliunerminik aulariamut, aᴋigiojârtoᴋ tullugarnarlo kannâᴋortojorlo naliunermingnik tikigiamut kamavut, inuᴋotikkale ᴋaujimangilat Nâlakab idluarijanganik.

⁸ Kanoᴋ oᴋarungnarᴋisê: Ilisimavogut, Nâlakab perᴋojangit uvaptingnêpût? Ahâk, aglaktingita aglaktangit sagluᴋitsiniovut.

⁹ Ilisimajut kangusudlartuksauvut, ᴋoaᴋsârtuksauvut, parngnanairsortaujuksauvullo; ahâk, Nâlakab oᴋausingit naggogivait; ᴋanoelingajomiglo ilisimaneᴋarᴋâ tâpkonanê?

¹⁰ Taimaimat nuliangit tunijomavakka takorngartanut, perorsêvingillo sâlagijinginut; ilûnamasiatik, mikinerpâmit anginerpâk tikidlugo, pijomatudlartôngmatta; nalautaijomillo ajoᴋertuijoᴋ tikidlugo nalâgôngitomik piniarmatta.

¹¹ Inuᴋotimalo paningata killingit ketatuinarmik inûlivait, sunaungitôjârtilugit, oᴋarlutik: Ulapirᴋsaumik, ulapirᴋsaumik; ulapirᴋsauteᴋangimariktilugo.

¹² Kangusulauᴋât piungitulilauramîk? Aukak, kangusulaungimarikput ketamiglônêt, auppalerungnangilallônêt; taimaimat pâlaᴋataujuksauvut pâlaktut ilagivlugit; nalipsarupkillo oggotitaujomârput, Nâlagaᴋ oᴋarpoᴋ.

¹³ Nungutsomamarikpakka, Nâlagaᴋ oᴋarpoᴋ; paungaᴋaromângilaᴋ napârtune vaineliksane, paungatannaᴋaromângilarlo napârtune paungatannaᴋarpaktune, milluᴋatangillo ᴋunuleromârput tâpkonangat.

¹⁴ Suna pivlugo ᴋikkartuinarᴋitâ? (oᴋaromârput): Katersulerta, aiᴋatigêktalo iglugasaksoarnut avaluliorsimajunut; tagvanalo nungutautilerta; Nâlakab Gudipta nungutautingmatigut, tunidjivigilutalo sungârnitomik imiksaptingnik, Nâlagaᴋ idluitulivigilauraptigo.

¹⁵ Nerriulauᴋpogut ulapirᴋsaumik, ajungitomigle tikitoᴋalaungilaᴋ; naliutomiglo inûlijaunartomik, sunaubvale, kapiasuktitauvogut.

¹⁶ Horsingita anersârkallaningit tusaksauvut Danemit; horsingita ᴋôrᴋsudlarningit tusaksaungmatta nuna ilûnane sajudlarpoᴋ; tikisimangmatta nuna tagvanêtullo ilûnaita nungulugit; iglugasaksuillo tâpkonanêtullo.

¹⁷ Ahâk, tilikleromadlarama ᴋuglugiaksoarnik ᴋuglugiarâlungniglo angakoktortaujungnangitunik akunapsingnut, tâpkoalo kêjomârpâse, Nâlagaᴋ oᴋarpoᴋ.

¹⁸ ᴋanoktôk manigorlanga uvamnik kiksarnimne! ômatiga nukkingêrutivoᴋ ilumne.

¹⁹ Ahâk, inuᴋotima paningata ᴋaigarsungningata nippinganik nunamit ungasiktomêtomit: Nâlagaᴋ Zionemêlungilâᴋ? Ataninga tâpsomanêngilâᴋ? Suna pivlugo ningaumajârtilauᴋângâ adsingoaliorlutik suksaungitunik takorngartaniglo?

²⁰ Katersoivik ᴋângersimavoᴋ, aujaᴋ nâsimavoᴋ, piulijaulungilagulle.

²¹ Inuᴋotima paningata pikaluktauninganut ânertauvunga; kiksadlarpunga; kakkilârnerub erᴋisimiarpânga.

²² Mangiptaksaᴋangilâᴋ Gileademê? Aniasiorteᴋangilâᴋ tagvanê? Suna pivlugo tagva inuᴋotima paningata ᴋanoeninga inûlijaungilâᴋ?