Jeremia 7 - Labrador Inuttitut Heritage Bible

¹ Tamadja oᴋauseᴋ Jeremiamut tikitoᴋ Nâlakamit, oᴋarlune:

² Nangeriartorit Nâlakab iglungata itertarviane, oᴋauserlo tamanna oᴋâlautigiuk, oᴋarlutillo: Nâlakab oᴋausinga tusarsiuk, ilipse ilûnase Judamêtose, iterpaktose upkoaᴋsoatigut tamakkotiguna, Nâlagaᴋ tuksiarvigijomavlugo.

³ Imâk Nâlagaᴋ Zebaot, Israêlib Gudinga oᴋarpoᴋ: Arvertarnise piniarniselo âᴋiksorsigik, nunaᴋarᴋojomavapselo tagva tamâne.

⁴ Sagloᴋattarnerit tatiginiarasigik, oᴋartut: Tamadja Nâlakab tempelinga, Nâlakab tempelinga, Nâlakab tempelinga.

⁵ Arvertarnise piniarniselo âᴋiksomarigupsigik; idluartomik idluarsaijigêgupse;

⁶ Oᴋumaiksartitsilungikupse takorngartanik, iliarsungniglo, uigarnerniglo, kovisilungikupselo aungmik passijaksaungitomik tamâne, malilungikupselo Gudib assinginik idluiluᴋutiksapsingnut;

⁷ Inniksaᴋartitsomavapse tamâne, nuname tunilauᴋtamne atâtagijapsingnut, itsarsoarmit issoᴋangitomullo.

⁸ Ahâk, sungertuteᴋarpose oᴋautsinik saglûtaujunik, idluarᴋutaujungnangitunik.

⁹ Tigligomavisê, inuaromavluselô, nuliarêngnermiglo asseroijomavlusê, angeromavluselô soᴋoserungnangitomik saglovluse, isserluanititsijomavluselô Baalemut, maligomavluselô Gudib assinginik ilitarilaungitapsingnik,

¹⁰ Nangeriartoromavluselô sâmne iglome tamattomane, attimnut taijaujome, oᴋarluselô: Piulijaumavogut; tamakkoninga tamainik maᴋojungnartulijungnarᴋovluse sullê?

¹¹ Iglo tamanna, attimnut taijaumajoᴋ, igluksaunasugivisiûk arᴋtaijunût? Ahâk, takonâraloarpara tamanna, Nâlagaᴋ oᴋarpoᴋ.

¹² Aileritsele innigilauᴋtamnut Sîlomêtomut, inniksautilauᴋtamnut attimnut mattoma sivorngane, ullernairtuileritselo sumik piniarvigilaungmangâpko inuᴋotima Israêlib idluituliningit pivlugit.

¹³ Mânalo tamakkoa tamaita piniarnerilaurapsigik, oᴋarpoᴋ Nâlagaᴋ, oᴋâlavigilaurapselo, makisaraivlunga oᴋâlavlungalo, nâlalaungnapsele; ᴋaigarsugvigilaurapse kiolaunginapsele;

¹⁴ Tamanna pivlugo iglo manna, attimnut taijaumajoᴋ, sungertûtigijase, nunalo tunilauᴋtara ilipsingnut atâtagilauᴋtapsingnullo, piniarvigijomavâkka, sorlo Sîlo piniarvigilaurapko.

¹⁵ Ajaktoromavapselo kênama sânganit, sorlo ᴋatangutise ilûnaita, Efraimib kinguvângit tamaita, ajaktolaurapkit.

¹⁶ Taimaimat nugiartoᴋsuit ukkua tuksiarutijaksarilungilatit, ᴋongmuartitsijuksaungilatit ogguarnermik tuksiarnermiglônêt tâpkoa pivlugit, ᴋenujûtigijaksarilungilatillônêt uvamnut; tusaromanginapkit.

¹⁷ Tautulungilatît piniarnerijanginik Judab iglugasaksoangine Jerusalemiblo apᴋosineâlunginê?

¹⁸ Sorutsit ᴋejuktarput, atâtat ikoâlasaivut, arnallo akutsivut sanaugamik, ᴋaᴋᴋôjârsulioromavlutik tunergutiksanik ᴋilait ataningoanganut (tagva taᴋᴋermut, uvloriallônêt ilanganut), kovisijomavlutiglo tunergutiksanik imiksanik Gudeojub assinginut, uvanga ningarsârtauᴋovlunga.

¹⁹ Ningarsârpângale? Nâlagaᴋ oᴋarpoᴋ, nangmineᴋ kangusûtiksarijamingnik sanangilât?

²⁰ Taimaimat imâk oᴋarpoᴋ Nâlagaᴋ Gude: Ahâk, ningarnera ᴋaningaumajârneralo kovijaujomârpuk nunamut tamattomunga, inungnut, nergjutinullo, perorsêviublo napârtunginut, nunablo perortunginut; ikoalâjomârpoᴋ ᴋamitauniangilarlo.

²¹ Imâk oᴋarpoᴋ Nâlagaᴋ Zebaot, Israêlib Gudinga: Tunergutiksase ôtaksat tunergutiksapsingnut toᴋotaksanut pitisigik, nerᴋejamiglo nerridlaritse.

²² Oᴋalaunginama atâtagilauᴋtapsingnut, perᴋojaᴋartilaungilakkalo uvlorme aularutilaurapkit nunamit Egiptenemit tunergutiksat ôtaksat tunergutiksallo toᴋotaksat pivlugit;

²³ Imaitomigle perᴋolauᴋpakka, oᴋarlunga: Nippiga nâlaksiuk, Gudeojomavungalo ilipsingnut inuᴋotigijomavapselo; arvertaritselo apᴋutauᴋojamne, ᴋanoengitsiarᴋovluse.

²⁴ Nâlalaungilalle, siutimingniglônêt mannijilaungilat, arvertalauᴋpulle issumamingnik ômatimiglo idluitut ᴋepêserningat maliklugo, kingupiartorpullo sivumuarlugatik.

²⁵ Uvlormit taimangat atâtagilauᴋtase aulalaungmattanit Egiptenemit uvloᴋ tamanna tikidlugo, ataruilivlunga tiliklervigilauᴋpapse kivgaᴋotimnik nalautaijoᴋotimniglo;

²⁶ Tusaromalaungilângale, mannijilaungilallo siutimingnik, tatitojoᴋsôvulle; sugaluluartulivut atâtagijamingnit.

²⁷ Igville oᴋautsit tamakkoa tamaita oᴋautigijaksarivatit tâpkonunga; tusaromangilâtille; ᴋaigarsugvigijaksarivatit, kiojomangilâtille.

²⁸ Oᴋautijaksarivatillo: Tagga tamadja inôᴋatigêksuit nâlalungitut Nâlakab Gudingata nippinganik, ajoᴋertortaujomangitullo; nalâgôrneᴋ asserorsimavoᴋ kipijauvorlo ᴋaninginit.

²⁹ Nujatit sallikit, egilugillo ilingnit, ogguarillo ᴋaᴋᴋane merᴋuᴋangitune; Nâlakab ningarnermine kinguvârêt ukkua ajaktormagit pingujarlugillo.

³⁰ Judab ᴋitorngangit idluitulilaungmatta ijîngma sângangne, Nâlagaᴋ oᴋarpoᴋ; maᴋojungnartoᴋotitik ililaungmagit iglomut attimnut taijaujomut, ivsornartitsomavlugo.

³¹ Tunerguserviliolauᴋpullo Tôfeteme tamadja Hinnomib erningata naᴋsangane, ernitik panitiglo ikomame ikoâlajomavlugit; tamannale perᴋolaungilara issumagilaungilaralônêt.

³² Taimaimat, ahâk, naliutsomârpoᴋ, Nâlagaᴋ oᴋarpoᴋ, taijaujungnairomârmat Tôfetemik, Hinnomib erningata naᴋsanganiglônêt, taijaulârporle Naᴋsamik toᴋorartauvingmik; iluversijomârmatta Tôfeteme inniksaᴋarungnaiᴋârtinago.

³³ Inôᴋatigêllo tamakkoa timingit toᴋungajut nerᴋiksaujomârput silab tingmianginut, nunablo nergjutinginut ungumajoᴋarniangilarlo tâpkoninga.

³⁴ Judablo iglugasaksoangine Jerusalemiblo apᴋosineâlungine sorairtitsomavakka ᴋuviasuktut serrijullo nippingit, nulianiktublo uiniktublo nippîgingnik; nuna sunairutisimajungoromârmat.