Jeremia 6 - Labrador Inuttitut Heritage Bible

¹ Jerusalemit ᴋemâleritse, ilipse Benjaminib ᴋitorngangit, tiptulausijaritselo Tekoame, Nalunaikusêgitselo Bethkerememe, idluitoᴋ aningmat avangat, asserornartoᴋsoarlo.

² Zionib paninga, takominartoᴋ inerᴋonartorlo, kipijomavara.

³ Mianersijut saugaᴋotitik ilagivlugit tikitsomârpât; tuperteromârput nalâne tâmna ilumavlugo; nerrijomârpullo ilûnatik atunit innimine.

⁴ Parngnaileritse unatarvigijartoromavlugo; attê, takpaungalerta uvlub ᴋetterarningane. Kapianarmêk uvagut! Uvloᴋ nâlarêrpoᴋ, unnusablo taggangit takijorolerput.

⁵ Attê, unnuangogaloartilugo takpaungarta, igloᴋsoangillo asserorlugit.

⁶ Imâk Nâlagaᴋ Zebaot oᴋarsimangmat: Napârtunik nakatsileritse, talulioritselo Jerusalemib avatâgut; tamadja iglugasaksuit sugiaraksat; tattedlarput oᴋumaiksartitsinermik iluane.

⁷ Sorlo puailaviub imangit puilangmatta, taimak idluitulineᴋ puilavoᴋ tâpsomangat; nâmangitulineᴋ asserorsainerlo tusartauvut tâpsomane; inuarneᴋ annauningnerlo sâmnetsainarput.

⁸ Aᴋilerit, Jerusalem, ômatiga allarᴋonago ilingnit; asserortauᴋonak nunaulerᴋonak inuêrutjausimajomik.

⁹ Nâlagak Zebaot imâk oᴋarpoᴋ: Katersoijomârput Israêlib amiakunginik sorlo paungat katersortaungmatta vaineliksab napârtunganit; aggatit utertartikit nuinvaumut nunivaktotut.

¹⁰ Kimut oᴋartuksauvingâ kigligiudjilungalo, tusarᴋovlugît? Takuitse, siutingit tusângitôvut tusarungnangilallo; ahâk, Nâlakab oᴋausinga mitautiksatuinaunasugivât, ᴋuviagilungilâllo.

¹¹ Taimaimat tattadlarpunga Nâlakab ᴋaningaumajârninganik; nunnomangudlarpunga; kovileruk sorutsinut apᴋosinernêtunut, inôsuktunullo katimgajunut; tagva angut nuliangalo tigujaujuksauvuk, inuᴋoartoᴋ uvloᴋartorlo unuktunik.

¹² Iglungillo tunijaujomârput assinginut, perorsêvingit nuliangillo ilagivlugit; aggakka issagomârapkit nunab inunginut, Nâlagaᴋ oᴋarpoᴋ.

¹³ Ilûnamasiatik mikinerpâmit anginerpâk tikidlugo pijomatudlartôvut; nalautaijomillo ajoᴋertuijoᴋ tikidlugo nalâgôngitomik piniarput.

¹⁴ Inuᴋotima paningata kilingit ketatuinarmik inûlivait, sunaungitôjârilugit, oᴋarlutik: Ulapirᴋsaumik, ulapirᴋsaumik; ulapirᴋsauteᴋangimariktilugo.

¹⁵ Kangusulaukât piungitulisimatilugît? Aukak, kangusulaungimarikput ketamiglônêt, auppalerungnangilallônêt; taimaimat pâlaᴋataujuksauvut pâlaktut ilagivlugit; nalipsarupkillo oggotitaujomârput, Nâlagaᴋ oᴋarpoᴋ.

¹⁶ Imâk Nâlagaᴋ oᴋarpoᴋ: Nangeriartoritse apᴋosinerne, takonârluselo, apᴋosineolauᴋtullo apertsûtigilugit, apᴋutit naliat idluarnerpaumangât, tâpsomanalo arvertaritse, merngoerserviksarsilârpose tagva tarnipsingnut; tâpkoale oᴋarput: Tâpsomane arvertaromangilagut.

¹⁷ Pigârtuksaᴋartilauᴋpapselo oᴋartuksanik: Nâlagitse tiptulautib nippinganik; tâpkoale oᴋarput: Nâlagomalungilagut.

¹⁸ Taimaimat tusaritse, ilipse inôᴋatigêksoangojose, kamatsiaritselo, ilipse ilagêngojose, sumut tikitaumangâta.

¹⁹ Igvillo nuna, nâlagit; ahâk, ogguarnartomik tikititsijomavunga inugasaᴋsoarnut ukkununga, issumangita kinguniksanginik, nâlalungimatta oᴋausimnik, naggomattalo perᴋojamnik.

²⁰ Suna pivlugo âtsivigivisingâ tipigiksautiksanik Sebamit, tauvlukutiksaniglo nunamit ungasiktomît? Tunergutiksase ôtaksat pijominalungilat uvamnut, tunergutiksaselo toᴋotaksat ᴋuviagingilakka.

²¹ Taimaimat imâk oᴋarpoᴋ Nâlagaᴋ: Ahâk, nâviksamik ilijijomavunga inôᴋatigêksuit ukkua sânginut; atâtallo erningillo naukiutijomârput tâpkonunga, silalerêllo asseroᴋatigêgomârput.

²² Imâk Nâlagaᴋ oᴋarpoᴋ: Ahâk, inugiartoᴋsoarnik tikitoᴋaromârpoᴋ nunamit taggardlermit, inôᴋatigêksuillo allakâromârput nunamit ungasingnerpângojomit.

²³ Pitiksinik ᴋalugianiglo tigumiarput; takopsoajuiput nâpkigosujuitôlarmiglo; nippingit pervaludlarput imarbiktut, horsine ablangavut; siakput sorᴋsugomajutitut unatarvigijomavlutit, Zionib pania.

²⁴ Unipkautauningat tusaraptigo aggavut nukkingêrutivut; kapiasudlarpogut âniavogullo sorlo arnatut ernisuktotut.

²⁵ Perorsêviliarniarnak, apᴋosinermelônêt pisugajarnak, ômigijib saviksoanga tagvanêngmat, kapianartullo ilûnânêput.

²⁶ Inuᴋotima paningat, attisilerit pôᴋsajavinernik, aksapalloalerillo arᴋjane; kiksalerit, sorlo ernetuaᴋ pivlugo, ogguarnermut sôngojomut; asserorsaijub tikiaᴋiniarmattigut.

²⁷ Nautsertortingortisimavagit inuᴋotima sittijoᴋsôjut akorngane, tâpkoa apᴋosininginik tukkisiᴋovlutit nautsertorlutillo.

²⁸ Ilûnatik tapatojoᴋsôvut, terliarᴋataiᴋattarlutik arvertarput; ᴋaᴋᴋorleovut kikiangovlutiglo; ilûnamasiatik nalâgôngitulivut.

²⁹ Sabviorviub supôruteâlua ikitaumavoᴋ, aᴋitorlo nungutauvoᴋ ikomamut; sulingitomik auksititsivut, idluitoᴋ pêjartaungimat.

³⁰ Inuit tainiarpait silberemik egitaumajomik, Nâlakab ajaktolaungmagit.