Jeremia 52 - Labrador Inuttitut Heritage Bible

¹ Zedekia jâreᴋalauᴋpoᴋ 21nik ataningolerame, jârillo 11 nâvlugit ataniovoᴋ Jerusaleme; anânangalo atteᴋalauᴋpoᴋ Hamutalemik, Jeremiab Libnamiob paninganik.

² Idluitulilauᴋporlo Nâlakab takoane, Jojakimib piniarningit tamaita maliklugit.

³ Nâlakab ningarninga pitjutauvoᴋ Jerusalememe Judamelo, pingujarnerᴋârtinago tâpkoninga najukaminit. Zedekiablo Babilonib ataninga nâlagomajungnaipâ.

⁴ Atanioningata jâringita 9ingane, takkit 10ingane, takkiub uvlungita 10ingane, Nebukadnezarib Babilonib ataningata sorᴋsuktoᴋatigêksoamelo Jerusalem opaktoriartorpât, tangmarterpullo nalâne; taluliorpullo avatâne ilûnâne.

⁵ Taimaglo iglugasaksuit ilumajauvut Zedekiab atanioningata jâringita 11ingat tikidlugo.

⁶ Taᴋᴋit sittamangita uvlungita 9ingane kâksoaᴋ sugaludlarpoᴋ iglugasaksoarne, nerᴋiksaᴋangilarlo nunab inunginut.

⁷ Tâva iglugasaksuit itârtauvut, sorᴋsuktuksallo ᴋemâdlarput, unnuarmelo iglugasaksoarnit anilutik itertârvikut ᴋarmaᴋsoâk tapitarêk akorngangnêtokut, ataniub perorsêvingata apᴋutâgut; (Kaldêamiullo iglugasaksuit ilumavait,) anivullo naᴋsarsûb apᴋotinganut.

⁸ Kaldêamiulle sorᴋsuktoᴋatigêksoangita ataneᴋ udlapât, angulâllo Zedekia Jerikub naternangine; tâpsomalo sorᴋsuktuksangit ilûnatik siamangavut tâpsomangat.

⁹ Atanerlo tiguvât âlâllo Babilonib ataninganut Riblamêtomut Hâmatib nunangane; tâpsomalo erᴋartorpâ.

¹⁰ Babiloniblo ataningata Zedekiab erningit toᴋopait tâpsoma ijîkita sângangne; Judablo angajoᴋâᴋsoangit ilûnaita toᴋogivait Riblame.

¹¹ Zedekiablo ijîgik pêjarpak; Babiloniblo ataningata ᴋelaksorpâ ᴋelaumgujanut, aularutilugolo Babilonemut, parngnanairsimavingmêtipâlo toᴋovia tikidlugo.

¹² Takkillo tallimangita uvlungita 10ingane, tagva ataniub Nebukadnezarib Babilonib ataningata jâringita 19ingane, Nebuzaradan, ataniub udjertortingita angajoᴋâᴋsoanga, ataniub simmertinga, tikipoᴋ Jerusalemut;

¹³ Tâpsomalo Nâlakab iglunga, ataniublo iglunga, Jerusalemiblo iglungit ilûnaita, ila, angajoᴋâᴋsuit iglungit ilûnaita ikipait ikomamut.

¹⁴ Kaldêamiullo sorᴋsuktoᴋatigêksoangita, ataniub udjertortingita angajoᴋâᴋsoanganêtut, Jerusalemib avaloᴋsoangit igupterpait ilûnaita.

¹⁵ Nebuzaradaniblo, ataniub udjertortingita angajoᴋaᴋsoangata, inuit aklujungita ilangit, inuillo iglugasaksoânêtualauᴋtut amiakungit, ᴋemâsimalauᴋtullo Babilonib ataninganut, sanavaktullo amiakungit, aularutivait.

¹⁶ Nebuzaradanible, ataniub udjertortingita angajoᴋâᴋsoangata, inuit aklujungita ilangit amiakôtipait vaineᴋuteleriᴋovlugit perorsêvileriᴋovlugillo.

¹⁷ Napajulle ᴋaᴋorliojut Nâlakab iglunganêtut, ikkoggallo ᴋattaujaᴋsoarlo ᴋaᴋorleᴋ Nâlakab iglunganêtut Kaldêamiut serᴋomipait, ᴋaᴋorlingillo aularutivait Babilonemut.

¹⁸ Ukkusillo, poagitillo, taᴋᴋersûtillo, pogutaujallo, alupsautillo, tamaitalo perᴋutit ᴋaᴋorliojut kivgartornermut atortut, aularutivait.

¹⁹ Kajûtallo, aumaᴋautillo, pogutaujallo, ukkusillo, nanneroaᴋarvîllo, alupsautillo, ᴋalutallo; goldinaujut goldeovlutik, silberinaujut silbereovlutik, ataniub udjertortingita angajoᴋâᴋsoangata aularutivait.

²⁰ Napajûglo maggûk, ᴋattaujaᴋsoarlo, tuktuvangoallo 12 ᴋaᴋorliojut ikkoggat allerangit, ataniub Salomob sanalauᴋtangit Nâlakab iglunganut; perᴋutit makkoa ilûnatik ᴋaᴋorlingat kiktitautingnut ôktortaulaungilarlônêt.

²¹ Napajûglo imaipûk: aipâ talertut 18tut poᴋtotigivoᴋ, silingninga avatâgut ôktortauvlune talertut 12tut siliktigivoᴋ, ibjuningalo inugangoatitut sittamatut ibjutigivoᴋ; suvlôvoᴋ.

²² Kânganalo avaliaruteᴋarpoᴋ; avaliarutelo aipâ talertut tellimatut poᴋtotigivoᴋ, nuluangoaᴋarporlo paungangoaᴋarlarmelo avaliaruteme avatâgut, ilûnatik ᴋaᴋorliovut; napajûblo aipanga taimaitoᴋarivoᴋ, paungangoaniglotauᴋ.

²³ Paungangoaᴋarput 96nik avatâgut, anorinut sittamanut sangmijunik; paungangoat nuluangoanêtut avatâgut katilugit 100ovut.

²⁴ Ataniublo udjertortingita angajoᴋâᴋsoangata tiguvait Seraia ajoᴋertuinerojoᴋ, Zefanialo ajoᴋertuijoᴋ tugleᴋ, itertarvingmiglo udjertortut pingasut;

²⁵ Iglugasaksoarnillo tiguvait sorᴋsuktuksat angajoᴋângat, angutillo 7 ataniub kênanganik takonârtut, iglugasaksoarne naipitaujut; sorᴋsuktoᴋatigêksuillo angajoᴋâᴋsoangata aglaktinga, nunab inunginik sorᴋsungnermut katimaᴋojipaktoᴋ; nunablo inunginit angutit 60, iglugasaksoarne naipitaujut.

²⁶ Nebuzaradaniblo, ataniub udjertortingita angajoᴋâᴋsoangata, tiguvait tikiutilaitalo Babilonib ataninganut Riblamut.

²⁷ Babiloniblo ataningata anauvait toᴋolugillo Riblame Hâmatib nunangane. Taimak Judakut nunamingnit aularutijauvut.

²⁸ Tamadja inuit Nebukadnezarib aularutijangit, jâringita 7ingane Judit 3,023;

²⁹ Nebukadnezarib jâringita 18ingane inuit 832 aularutivait Jerusalemit;

³⁰ Nebukadnezarib jâringita 23ingane Nebuzaradanib, atanermik udjertortut angajoᴋâᴋsoangata, inuit Judiojut 745 aularutivait; inuit ilûnatik katilugit 4,600ovut.

³¹ Pijokarporlo Jojakinib, Judab ataningata aularutijauningata jâringita 37ingane, taᴋᴋit 12ingane, taᴋᴋiub uvlungita 25ingane, Evilmerodab, Babilonib ataningata, atanioningata jâringita sivorlerpângane, Jojakinib, Judab ataningata, niaᴋoa ᴋagvertingmago, anitilâllo parngnanairsimavingmit;

³² Ilanârnartomiglo oᴋarvigivâ, iksivautangalo poᴋtonersautipâ atanit tâpsomanêtut Babiloneme iksivautanginit.

³³ Annorângillo parngnanairsimaviksiutit assetârpait, nerriᴋatigitsainarpâlo inôsinga nâvlugo.

³⁴ Babiloniblo ataningata patangaititsainarpâ, ᴋaut tamât patangaijutiksanganik, toᴋovia tikidlugo, inôsingata uvlungit nâvlugit.