Jeremia 51 - Labrador Inuttitut Heritage Bible

¹ Imak oᴋarpoᴋ Nâlagaᴋ: Ahâk, anore asseroijoᴋ makititsomârpara opaktorᴋovlugo Babilonemik inunginiglo akkerartornermik uvamnik ômatelingnik.

² Babilonemullo tilikleromavunga ipsortûtelijartunik, ipsortuilârtunik tâpsominga; nunangalo sunairutijomârpât; kapianartoᴋarnerublo uvlungane opaktoromârpât avatânit ilûnainit.

³ Pitiksiliub pitiksine ᴋeluliuk pitiksilingmut, nikovitomullo pitigiaromavlune kikianik annorâlik; inôsuktungit nikaginiarasigik; sorᴋsuktungit ilûnaita nungumariksigik.

⁴ Ikkeᴋarlutik okpikaromârput Kaldêamiut nunangane, kapijaulutiglo apᴋosineâlungine.

⁵ Israêle ᴋemaktaulungimat Gudiminut, Judalônêt Nâlakamut Zebaotemut; nunangat tatadlaraloartilugo tapatonermik Israêlib ivsornaitoᴋsôjunganik.

⁶ Babilonemit ᴋemâtitse, ilûnase atunit inôsise piulisigik; kipijauᴋatauniarase idluituliningane; Nâlakab akkiniarviksanga naliutingmat; akkiniaromârpâ akkiniartaujuksauningatut.

⁷ Babilone ᴋajûtaulauᴋpoᴋ goldeojoᴋ Nâlakab aggangine, silaᴋsoarmiunik tamainik tallatitsijomik; inôᴋatigêksuit imilauᴋput vaininganik; taimaimat inôᴋatigêksuit issumairutivut.

⁸ Babilone okpikaliaᴋilauᴋpoᴋ asserortauvlunalo; ᴋeagisiuk; tigusileritse mangiptaksanik ânianganut, âᴋiktaunajangimangât.

⁹ Babilone âᴋiksoromalauᴋpavut, âᴋiktaulungilarle; ᴋemaksiuk, angeralertalo ilûnata nunagijaptingnut; erᴋartortauninga tôrmat ᴋilangmut, kiviktauvoᴋ nuvujanut.

¹⁰ Nâlakab idluarsijutiksavut saᴋᴋertipâ; ᴋaigitse, Nâlakablo Gudipta suliarijanga unipkautigilavut Zioneme.

¹¹ Kargjutit kênaksarsigik; sapulutat tigumiatsiarsigik; Nâlakab Mediamiut ataningita anerninga tupaktisimavâ; Babilone issumaginamiuk asseroromavlugo; tâmnaungmat Nâlakab akkiniarutinga, katimaviksoarne akkiniarutigingmago.

¹² Nulunaikusêgitse katimaᴋojijutiksamik Babilonib avaluᴋsoangine, udjertortuse sôngotisigik, kamajut âᴋiksorsigik, suingaijuksat atuinarusigik; Nâlakab issumaksarsiorutigilugolo nâmaksitingmago oᴋautigijane Babilone pivlugo.

¹³ Igvit ineᴋartotit kôᴋatsiartome, perᴋuteᴋadlartotillo, naggatiksat tikisimavoᴋ, pijomatudlarnivit ôktortauviksanga.

¹⁴ Nâlagaᴋ Zebaot ingminik taivlune angimarilauᴋpoᴋ, oᴋarlune: Ilumeromavagit inungnik ᴋuglugiatitut unuktigijunik; ᴋuggudlarvigijomârpâtillo.

¹⁵ Tâpsoma nuna pingortilauᴋpâ pitsartunerminut, silaᴋsoarlo tunganeᴋtâlauᴋpâ ilisimanerminut, silatunerminullo ᴋilait issivilauᴋpait.

¹⁶ Nippine tusartautikpago imeᴋavaksoadlarpoᴋ ᴋilaub ikkiangane, pujorarlo ᴋongmuartipâ nunab kiglinginit; ᴋaumalaliorpoᴋ silalungme, anorelo anitipâ ᴋematulivingminit.

¹⁷ Inuit ilûnatik silaitôvut ilisimaneᴋaratik, goldelerijut ilûnatik kangusuktitauvut gudingoaliarimajamingnut; gudingoaliarimajanga auktisimajoᴋ sagloniovoᴋ, anerneᴋangimat.

¹⁸ Sulinginiovut uiveriklerniovlutiglo, ôktortauvingmingne ajulermarilârput.

¹⁹ Jâkob kingormgutijanga taipkotitunaulungilak; tâpsoma tamaita pingortilaungmagit; Israêliblo kinguvângit kingormgutivait; atteᴋarporlo Nâlakamik Zebaotemik.

²⁰ Igvit kautarivagit sakkogilutillo unatarnerme; ilingnullo inôᴋatigêksuit katjorpakka; ilikkullo ataniovît asseroromavakka.

²¹ Ilingnullo horse ikimajingalo serᴋalitsomavakka; ilingnullo ᴋamutik aksaloalik ikimajingalo serᴋalitsomavakka.

²² Ilingnullo angut arnarlo serᴋalitsomavâkka; ilingnullo inuᴋoartoᴋ inôsuktorlo serᴋalitsomavâkka; ilingnullo nukappiaᴋ niviarsiarlo serᴋalitsomavâkka;

²³ Ilingnullo mianersijoᴋ mianerijangillo serᴋalitsomavakka; ilingnullo perorsêvilerijoᴋ tuktuvâgiglo tappiutilugik ᴋemuktuk serᴋalitsomavakka; ilingnullo atanerutsit angajoᴋâᴋsuillo serᴋalitsomavakka.

²⁴ Babilonalo Kaldêamiullo ilûnaita akkiniarvigijomavakka idluituliningit tamaita pinialauᴋtangit Zioneme maliklugit, oᴋarpoᴋ Nâlagaᴋ.

²⁵ Ahâk, ᴋaᴋᴋaᴋsoangojotit asseroijotit, silaᴋsoarmik ilûnânik asseroijotit, akkerartorpagit, oᴋarpoᴋ Nâlagaᴋ; aggakkalo issagomârpakka ilingnut; imnanillo aksakâtitsomârpagit, ᴋaᴋᴋaᴋsoangortitsômârpagillo ikisimajoᴋ.

²⁶ Ilingnillo tigusiniangilat ujarᴋamiᴋ terreᴋuksamik, ujarᴋamiglônêt tungaviksamik; inuêrniojuksauvotillo issoᴋangitomut, oᴋarpoᴋ Nâlagaᴋ.

²⁷ Nalunaikusêgitse katimaᴋojijutiksamik nuname, tiptulausijaritse inôᴋatigêksuit akorngane; inôᴋatigêksuit parngnaitisigik sorᴋsungnermut tâpsominga, ataniovît Ararâtelo, Minnilo, Askenâselo katimaᴋosigik tâpsomunga; opaktortuksat tâpsominga angajoᴋâᴋsoaksanganik ilijigitse; horsit takpaungartisigik ᴋuglugiatitut merᴋoliktitut ilivlutik.

²⁸ Parngnaitisigik tâpsominga opâktuiᴋovlugit inôᴋatigêksuit, Medenemiullo ataningit, atanerusingillo, angajoᴋâᴋsoangillo tamaita, ataniovingillo tamaita.

²⁹ Nunalo sajudlarpoᴋ âniadlarlunalo; Nâlakab kajusimanerijangit Babilon pitjitigilugo aulangimatta, Babilonib nunanga inuêrningortitsomavlugo.

³⁰ Babilonib pitsartujungit sorᴋsuktailivut, iglugasaksoamingnêtuarput sôngojune; maksuajungnaiput; arnatitut ilingavut; inigijangit ikitaumavut; itârtaugêkutingit naviksimavut.

³¹ Aᴋpasuktûb pâᴋsâlârpâ assine aᴋpasuktoᴋ, tilijaujûblo assine tilijaujoᴋ, Babilonib ataninga nalonaijaivigijomavlugo iglugasaksoangit sâlagijaungmatta avatânit ilûnânit;

³² Ikârtorvillo opaluijauvut, suvlolillo ikitauvut ikomamut, sorᴋsuktullo kapiasudlarput.

³³ Imâk oᴋarmat Nâlagaᴋ Zebaot, Israêlib Gudinga: Babilonib paninga katjugviktut tukkartorviub naliuningane ilingavoᴋ; mânakasakut katersoivik naliutilârpoᴋ tâpsomunga.

³⁴ Nebukadnezarib Babilonib ataningata nerrivânga sêmigârpângalo, pôgutautipânga sunataᴋangitoᴋ, ᴋuglugiaᴋsoarâluktut êvânga, aᴋeartorpoᴋ mamagijaptingnik; pingujarpânga.

³⁵ Idluitulinerit uvamnut uvinimnullo piniartaujut Babilonemut pilit; oᴋarpoᴋ Zionib inunga; augalo Kaldêamiunut pile, oᴋarpoᴋ Jerusalem.

³⁶ Taimaimat imâk oᴋarpoᴋ Nâlagaᴋ; Ahâk, iliortaunît idluarsaijutigijomavara akkiniaromavlungalo pivlutit; imangalo panertungortitsomavara, puailavingalo ipteᴋarungnaititsomavlugo.

³⁷ Babilonalo ᴋiggutuinaujomârpoᴋ, terrianiangojârtut iniksanga, tataminiarutaujok, mitautiksaujorlo, inuᴋatsangitorlo.

³⁸ Loevearaᴋtitut ᴋalingoaᴋatigêgomârput, loevit piarangititut erinaluaᴋijomârput.

³⁹ Onarᴋejalerpatta imiksangat akkutsomârpara, tallatitsomârpakkalo ᴋuviasudlarᴋovlugit, siniᴋovlugillo siningmik soraijuitomik, tupaniarungnailutiglo, oᴋarpoᴋ Nâlagaᴋ.

⁴⁰ Toᴋotsivingmut atersârtitsomârpakka saugâraᴋtitut, angusaluᴋtitut parngnit ilagilugit.

⁴¹ Kanoᴋ ilivlune Sesaᴋ pijauvâ, silaᴋsûblo ilûnangata nertugangat opaluijauvlunê? Kanoᴋ ilivlune Babilone tataminiarutiksangonerᴋâ inôᴋatigêksuit akornganê?

⁴² Imarbik majuarpoᴋ Babilonemut; uliktauvoᴋ malliksoangita unurninginut.

⁴³ Iglugasaksoangit asserorningorput, nuna panertoᴋ, inuêrnerlo, nuna inuktaᴋangitoᴋ, inublo erningata apᴋusâlungilâ.

⁴⁴ Belelo Babilonemêtoᴋ nalipsaromârpara, oᴋomiartangalo anititsomârpara ᴋaninganit; inôᴋatigêksuillo takpaungaᴋatigêtsungnairomârput tâpsomunga, ila, Babilonib ᴋarmanga oggojomârpoᴋ.

⁴⁵ Inukotikka, anititse tâpsomangat, ilûnaselo atunit piuligitse Nâlakab ningaumajârninganit ilungertortomit.

⁴⁶ Omatise ᴋuksalâdlarniaratik, mungudlarniaraselo unipkautsit pivlugit tusartaulârtut nuname; jârit ilangane unipkauseᴋaromârmat, kingornganalo jârib aipangane unipkauseᴋaromârivoᴋ, oᴋumaiksartitsinerlo nuname, atanerutsit akkerartûtijomârput.

⁴⁷ Taimaimat, ahâk, uvlut naliutijomârput idluarsaivigijomârtakka Babilonib gudingoanginik, nunangalo ilûnane kangusugomârpoᴋ; toᴋotaujungillo okpikâjomârput mânetuinaᴋ.

⁴⁸ Kilaglo nunalo tâpkonangnêtullo ilûnatik serridlaromârput Babilone pitjutigilugo; asseroijut tikitsomârmatsuk avangat, oᴋarpoᴋ Nâlagaᴋ.

⁴⁹ Sorlo Babilonib toᴋotaujut Israêleme oggotilaungmagit, taimak toᴋotaujut Babiloneme oggojomârivut nuname ilûnâne.

⁵⁰ Saviksoarmit aulartose, ingeradlaritse, ᴋikkarniarase; Nâlagaᴋ erᴋarsiuk ungasiktome, Jerusalemelo ômamiutarisiuk.

⁵¹ Kangusudlarpogut, mitautiksamik tusarapta, kangusungnerub kênavut ulikpait; takorngartat itersimangmatta Nâlakab iglungata ivsornaitovinginut.

⁵² Tamanna pivlugo, ahâk, uvlut naliutijomârput, oᴋarpoᴋ Nâlagaᴋ, idluarsaivigijomârtakka gudingoanginik, nunanganalo ilûnâne ikkelingit âlajomârput.

⁵³ Babilone ᴋongmuarajaraloarune ᴋilangmut, sôngosititsinajaraloarunelônêt pitsartunime poᴋtoninganik, sulle asseroijut uvamnit tikitaksarivât, oᴋarpoᴋ Nâlagaᴋ.

⁵⁴ Kôrᴋsudlartut nipliadlarningat tusaksauvoᴋ Babilonemit, nungutsinerublo pervalungninga Kaldêamiut nunanganit;

⁵⁵ Nâlakab Babilone sujudlarmago, asseroilunalo nippersoarmik tâpsomangat; malliksoangit iktulijadlarput imersoatitut unuktutitut; nippingita pervalungninga tusaksauvoᴋ;

⁵⁶ Asserorsaijûb tikidlarmago tâmna Babilone, pitsartujungit tigujaudlarput, pitiksingit navlorsimavut; Nâlagaᴋ Gudeongmat akkiniartoᴋ, nalonangitomik akkiniaromârpoᴋ.

⁵⁷ Angajoᴋâᴋsoangillo, ilisimajungillo, atanerusingit, aulatsijungillo, pitsartujungillo tallatitsomârpakka; sinigomârpullo siningnermik sorainiangitomik, tupaniarungnailutiglo, oᴋarpoᴋ Ataneᴋ, atteᴋartoᴋ Nâlakamik Zebaotemik.

⁵⁸ Imâk oᴋarpoᴋ Nâlagaᴋ Zebaot; Babilonib ᴋarmaᴋsoangit ibjujut oggotitaumarigomârput, upkoaᴋsoangillo poᴋtojut ikitaujomârput ikomamut; inugasaᴋsuillo sulingitomut sanajomârput, inôᴋatigêksuillo ikomamut; merngortudlaromârpullo.

⁵⁹ Oᴋausek Jeremiab nalautaijûb perᴋojarilauᴋtanga Seraiamut Neriab erninganut Masaiab erngutanganut, Zedekia Judab ataninga Babilonaliaᴋatigingmago, atanioningata jâringita sittamangane. Seraia tagva pimaklertit angajoᴋângat.

⁶⁰ Jeremiablo idluitut tamaita tikituksat Babilonemut aglakpait aglagvingmut atautsimut, oᴋautsit tamakkoa tamaita aglaksimajut Babilone pivlugo.

⁶¹ Jeremialo oᴋarpoᴋ Seraiamut: Babilonemut tikikuvit kamatsiarit oᴋautsillo tamakkoa tamaita atuarlugit,

⁶² Oᴋarillo: Nâlagaᴋ, oᴋarsimavotit nuna tamanna pitjutigilugo, kipigomavlugo, tagvane nunaᴋartoᴋarᴋonago, inungmiglônêt nergjutimiglônêt, ᴋemadlarauᴋovlugo issoᴋangitomut.

⁶³ Aglaillo makkoa nâvlugit atuarêrungne, tagva ujarᴋamik ᴋelaksorvigikit egilugillo kôb Farâtib ᴋerᴋânut;

⁶⁴ Oᴋalârpotillo: Taimak Babilon kivijuksauvok, ᴋaᴋiniarungnailune idluitoᴋ pivlugo tikiutijomajara tâpsomunga; merngortudlaromârpullo. Tagvane Jeremiab oᴋausingit kiglerᴋarput.