Jeremia 50 - Labrador Inuttitut Heritage Bible

¹ Oᴋausek Nâlakab oᴋauserijanga Babilon pivlugo, Kaldêamiullo nunangat pivlugo, Jeremiakut nalautaijokut.

² Oᴋâlagitse ᴋaujititsileritselo inôᴋatigêksuit akorngane, nalunaikusêgitselo; ᴋaujititsileritse angigutjiniaraselo; oᴋaritse, Babilon tigujauvoᴋ, Bel kangusuktitauvoᴋ, Merôdak serᴋomitauvoᴋ; gudingoangit kangusuktitauvut, gudingoaliarimajangillo serᴋomitauvut.

³ Avangat inôᴋatigêksuit opaktoriartorpait, sunairutjijunik nunanganik, tagvane angerarveᴋartoᴋarᴋonago; ᴋemâsimavut, aularsimavut, inuillo nergjutillo.

⁴ Uvlune taipkonane, naliutomelo tâpsomane, oᴋarpoᴋ Nâlagaᴋ, Israêlib ᴋitorngangit tikilârput, tâpkoa Judablo ᴋitorngangit ilagêklutik; ingeraromârput ᴋeavlutik, ᴋeneromârpullo Nâlakamik Gudimingnik.

⁵ Zione aperᴋutigijomârpât, kênatik tagvunga sângavlugit, oᴋarlutik: Kaigitse, Nâlakamut ilagêngneᴋaleritse angeᴋatigêngnerme soᴋosijuitome puigortauniatsangitome.

⁶ Inukatikka saugangovut assiomajut; mianerijingita tamartisimavait, sangutilauᴋpait ᴋaᴋᴋane; arvertarput ᴋaᴋᴋamit ᴋaᴋᴋârsungmut, puigorput merngoêrservigijamingnik.

⁷ Naipitingita ilûnatik nerrilauᴋpait; akkerangillo oᴋarput: Pidlaraksautingilagut, Nâlakamut idluitulilaungmatta, idluarsainerub inigijanganut, ila, Nâlakamut, atâtagijangita nerriugijanganut.

⁸ Babilonemit ᴋemâtitse, Kaldêamiut nunanganit anigitse, ilingagitselo tuktungajutitut angusaluktitut saukat sivurâne.

⁹ Tagva ahâk, inôᴋatigêksoagasaksuit tupaksaromavakka nunamit taggardlermit, majuartitsomavlugillo Babilonemut; tâpkoalo siagomârput tâpsomane; tagvangallo tâmna tigujaujomârpoᴋ; ᴋargjungit angutitut annaingitotut ilingajomârput; sulinane uterniatsangitotut.

¹⁰ Kaldêalo aᴋsârnigaujomârpoᴋ; ilûnatik aᴋsârniktut tâpsominga nâmaksilârput, oᴋarpoᴋ Nâlagaᴋ.

¹¹ Kuviasudlarapse aliasudlarapse, ilipse aᴋsârniktose kingormgutijamnik, uimajâdlarapse tuktuvâraktut iviksukatalingme, ᴋôrᴋsudlarapse horsititut sôngojutitut;

¹² Anânase kangusudlaromârpoᴋ; ilipsingnik ernilauᴋtoᴋ iktôromârpoᴋ; ahâk, kingorlerpaujomârpoᴋ inôᴋatigêksoarnit, inuêrneᴋ, ipterilingajoᴋ, sunataᴋangitoᴋ.

¹³ Nâlakab ningarninga pitjutigilugo inuktaᴋartuksaungilaᴋ, pimariklune inuêromârpoᴋ; ilûnatik ᴋaninârtut Babilonemut tataminiaromârput mitauteᴋarlutiglo kapiasûtigijangit tamaita pivlugit.

¹⁴ Babilonemut siangmaritse avatânut pitiksertose; pitiktârsiuᴋ, ᴋargjutise ikinârnagit; Nâlagaᴋ idluitulivigilaungmago.

¹⁵ Avatânit nipliavigisiuk; iggisimavoᴋ nangminerminik; talungit imiksimavut, ᴋarmangit oggotitauvut; tamanna Nâlakab akkiniarutâ, akkiniarsiuk; sorlo tâmna iliormat, taimak iliorvigisiuk.

¹⁶ Karngasoijoᴋ pêjarsiuk Babilonemit, iviksukatautiniglo tigumiartut katersoiviub naliuningane; saviksoaᴋ takopsoajuitoᴋ pivlugo, ilûnatik atunit sangujomârput inôᴋatimingnut, ᴋemâjomârpullo nunamingnut.

¹⁷ Israêl saugaᴋtut apsimajotun-ipoᴋ; loevit ᴋemâtisimavât; sivorlermik Assiriab ataningata nerrivâ; kingornganalo Nebukadnezarib oma, Babilonib ataningata, sauningit navgor pait.

¹⁸ Taimaimat imâk oᴋarpoᴋ Nâlagaᴋ Zebaot. Israêlib Gudinga: Ahâk, Babilonib ataninga tâpsomalo nunanga pidlaromavâkka, sorlo Assiriab ataninga pidlalaurapko.

¹⁹ Israêlelo utertitsomârpara iniminut, nerrijuksaulârporlo Karmeleme Bâsanemelo, tarningalo nâmaksititaulârpoᴋ Efraimib ᴋaᴋᴋangine Gileademelo.

²⁰ Uvlune tâpkonane, naliutomelo tâpsomane, oᴋarpoᴋ Nâlagaᴋ, Israêlib idluininga ᴋenertaujomârpoᴋ, pitaᴋarniangilarle; Judablo idluiningit, naipitauniangilalle; amiakôtitakka issumagijungnaivigijomârapkit.

²¹ Majoarit nunalo Merataim opaktorlugo, Pekodemiullo opaktorlugit; toᴋotsilerit asseroimariklutillo tâpkoa kingorngane oᴋarpoᴋ Nâlagaᴋ, piniarillo perᴋojakka tamaita ilingnik maliklugit.

²² Unatarnerub ivulungninga tusaksauvoᴋ nuname, asserorsainersoarlo.

²³ Silaᴋsoarmut ilûnânut kautaᴋ ᴋanoᴋ ilivlune ᴋopivlune serᴋomitauvâ? Babilon ᴋanoᴋ ilivlune sunairutivâ inôᴋatigêksuit akornganê?

²⁴ Nigarniutservigilauᴋpagit, pijaulauᴋpotillo, Babilon, missigingilatille; naipitauvotit napertauvlutillo, Nâlagaᴋ akkerartulaurangne.

²⁵ Nâlakab sakkotaline upkoersimavâ, ningarnimelo sakkungit anilugit; Nâlagaᴋ, Nâlagaᴋ Zebaot suliaksaᴋarmat Kaldêamiut nunangane.

²⁶ Avatânit ilûnainit majoaritse opaktorlugo, ᴋematulivingit upkoersigik; atautsemut egiorᴋarsigik inuksutitut ilivlugit; nungumariklugillo amiakoᴋarungnaiᴋovlugo.

²⁷ Tuktuvaᴋotingit ilûnaita toᴋosigik, toᴋotsivingmut atersârtisigik; kapianarmêk tâpkoa, uvlungat tikisimangmat, nalipsartauviksangat.

²⁸ Kemâjut aulartullo nunamit Babilonemit nippingat, Zioneme unipkautigijomavlugo Nâlakab Gudipta akkiniarninga, katimaviksoarne akkiniarutigingmago.

²⁹ Pitiksilît katimaᴋolersigik Babiloneme, ilûnaita pitiksimik ᴋellusijungnartut; ilumavlugo tangmâritse avatâne; aulartoᴋarniarane; suliarijangit maliklugit akkiniarsiuk; piniarnerijangit maliklugit piniarvigisiuk; iktoriktaidlarmat Nâlakamut, Israêlib ivsornaitoᴋsôjunganut.

³⁰ Tamanna pivlugo inôsuktungit okpikartuksauvut apᴋosineâlungine, angutingillo sorᴋsuktuksat nipangertitaujomârput uvlorme tâpsomane, oᴋarpoᴋ Nâlagaᴋ.

³¹ Ahâk, akkerartorpagit, igvit piojoridlartotit, oᴋarpoᴋ Nâlagaᴋ, Nâlagaᴋ Zebaot, uvluksat tikisimangmat, nalipsartauviksat uvamnut.

³² Piojorijorlo naukiutilune oᴋpikaromârpoᴋ, makititsijoᴋarniangilarlo tâpsominga; ikomamiglo ikitsijomavunga iglugasaksoangine, avatânetunik tamainik nungutsijuksamik.

³³ Imâk oᴋarpoᴋ Nâlagaᴋ Zebaot: Israêlib ᴋitorngangit Judablo ᴋitorngangit oᴋumaiksartitauᴋatigêkput; aularutjingita ilûnatik sapkojomangilait; aulartailitipait.

³⁴ Piulijingalle sôngodlarpoᴋ; atteᴋarpoᴋ Nâlakamik Zebaotemik; tâpsoma iliortauningat idluarsaijutigijomârpâ, nuna ulapitaujungnaititsomavlugo, Babilonib inungit inilangavêrutilugit.

³⁵ Saviksûb Kaldêamiut ᴋolangiarpait, oᴋarpoᴋ Nâlagaᴋ, Babilonib inungit, angajoᴋâᴋsoangillo, ilisimajungillo.

³⁶ Saviksûb nertôtijut ᴋolangiarpait, tâpkoalo silatulungitomik piniaromârput; saviksûb pitsartujungit ᴋolangiarpait, tâpkoalo kuksaladlaromârput.

³⁷ Saviksûb horsingit ᴋamutingillo aksaloalit, inuillo tamakluartut tagvanêtut ilûnaita ᴋolangiarpait, arnatitullo tâpkoa ileromârput; saviksûb ᴋematulivingit ᴋolangiarpait, tâpkoalo tigligviojomârput.

³⁸ Panidlartoᴋsûb kôngit ᴋolangiarpait, tâpkoalo imaᴋarungnairomârput; nuna tâmna gudingoaliksôngmat, gudingoallo pivlugit issumairutivut.

³⁹ Taimaimat sunaᴋangitub ômajungit nujoartut terrianiangojârtullo ineᴋaromârput tagvane, tingmiaᴋsuillo Strausit inigijomârpât; nunagijaujomângilarlo issoᴋangitomut, inuktaᴋaromângilarlo kinguvângoᴋatigênit kinguvângoᴋatigênut.

⁴⁰ Sorlo ilingalaungmat taipsomane Gudib Sodome Gomorralo iglugasaksuillo tâpkoa sanilingit oggotilaungmagit, oᴋarpoᴋ Nâlagaᴋ; taimaktauᴋ tagvane inungmik nunaᴋartoᴋartuksaungilaᴋ, inublo erningata atausiublônêt angerarviginiatsangilât.

⁴¹ Ahâk, inugasaᴋsoarnik tikitoᴋaromârpoᴋ avangat, inôᴋatigêksuillo atanillo unuktut aulajârtitaudlaromârput nunaᴋsûb issunginit ungardlernerpânit.

⁴² Tigumiarput pitiksinik ᴋalugiaᴋsoarniglo; takopsoajuiput, nâpkiningneᴋangilallo; nippingit iktulijarput imarbiksoatut, horsine ablangavut; ilûnatik opalungaijarsimavut sorᴋsugomajutitut unatarvigijomavlutit, Babilonib paninga.

⁴³ Babilonib ataningata tusaumavât unipkautauningat, aggangillo nukingêrutivut; kapiasungnerub erᴋisimiarpâ, ânianerublo sorlo arnatut ernisuktotut.

⁴⁴ Ahâk, majuaromârpoᴋ loevetut Jordanib kutjerninganit iniksamut sôngojomut; erinesulungale ᴋemâtitsomârpakka tâpsomangat; annerijaujorlo angajoᴋângortitsomârpara tâpsomunga; kina uvaptun ingmât? Kia naliuneᴋarᴋojomavângâ? kinauvâlo mianersijoᴋ sâmne nangerungnartôᴋ?

⁴⁵ Taimaimat tusaritse Nâlakab atanertuinerijanganik Babilone pivlugo atanertuinerijanganik, kajusimanerijanganiglo Kaldêamiut nunangat pivlugo; saukat mikiningita uniaromârpait, tâpsomalo naternangit tataminiartitsomârpait tâpkoninga.

⁴⁶ Babilonib oggotitauningata pervalungninganut nuna sajukpiladlarpoᴋ, ᴋuggudlarnerlo tusaksauvoᴋ inôᴋatigêksuit akorngane.