Jeremia 5 - Labrador Inuttitut Heritage Bible

¹ Jerusalemib apᴋosiningitigut utertariartoritse ulernairsileritselo, nautsertorluselo, ᴋeneritselo apᴋosiningine nerrotojune naipitsinajarmangâpse angutimik, idluartulijoᴋarmangât, mikseᴋârneᴋsiortoᴋarmangât; (taimaitoᴋarpat) issumagijungnaivigijomavara.

² Oᴋaraloaruniglo: Sorlo Nâlagaᴋ inôngmat; sulle nalâgôngitomik angerput.

³ Nâlagaᴋ, ijîkik takonâlungilâk mikseᴋârnermîk? Annaulauᴋpatit, kiksartitaulungilalle; siorniortilauᴋpatit, âᴋiktaujomalungilalle; kênatik sittinersautilauᴋpait ᴋairtomit, uteromangilallo.

⁴ Oᴋarpungale: Tâpkoa inukullôvut silaidlartut; ᴋaujimangilat Nâlakab apᴋutinganik, Gudiblônêt idluarsaininganik.

⁵ Ilisimanersanut aijomavunga, tâpkoalo oᴋaᴋatigilugit; tâpkoa ᴋaujimavalungmatta Nâlakab apᴋotinganik, Gudingatalo idluarsaininganik. Tâpkoale ilagêklutik nangmaut navisimavât, ᴋelarutillo kiktorarlugit.

⁶ Taimaimat loevib napârtunit pijûb aliktoromârpait, amarkublo sunaᴋajuitomit pijûb asseroromârpait, pûsevâlub iglugasaksoaᴋotingit terliaromârpait, ilûnatiglo anijut tagvangat aliktortaujomârput; tapaningit unuktôngmatta, kingupiartorningillo sugaluluarmatta.

⁷ ᴋanoᴋ issumagijungnaivigijungnarᴋagît? ᴋitorngavit ᴋemaksimavânga, angermarikpullo gudeungitut sâvigivlugit; aᴋᴋeartortigapkillo ajortulivut, katimgalutiglo katimavut anguniarpaktut iglungine.

⁸ Horsititut parngneᴋtitut aᴋᴋeartorsimajutitut pituksima ngitutitut iput; ilûnatik atunit inôᴋatime nulianga ikligivâ.

⁹ Sugiartuksaungilangâ tamakkoa pivlugît? Nâlagaᴋ oᴋarpoᴋ; tarnigalo akkiniartuksaungilâᴋ inôᴋatigêksoanik taimaitunîk?

¹⁰ Majoraritse ᴋarmaᴋsoanginut, asseroiluselo; nungumariniarasigigle; akkerungit (ᴋitorngangit) aularutisigik; pêrᴋutaungimatta Nâlakamut.

¹¹ Israêlib ᴋitorngangit Judablo ᴋitorngangit nalangaidlartomik piniarvigilaungmanga, Nâlagaᴋ oᴋarpoᴋ.

¹² Nâlagaᴋ missiarutigivât, oᴋarlutiglo: Tâmnaungilaᴋ; idluinerublo tikiniangilâtigut; takoniangilagullônêt saviksoarmik kângnartoᴋsoarmiglônêt;

¹³ Nalautaijullo anoringoromârput, oᴋauserlo tâpkonanêngilaᴋ; nangminerle taimailiorviolârput.

¹⁴ Taimaimat imâk oᴋarpoᴋ Nâlagaᴋ, Gude Zebaot: Oᴋauseᴋ tâmna oᴋauserigapsiuk, ahâk, oᴋausikka ᴋanernêtut ikomangortitsomavakka, inôᴋatigêksuillo ukkoa ᴋejungortitsomavlugit, tâpsomalo nungutsomârpait.

¹⁵ Ahâk, Ilipse Israêlib ᴋitorngangit, ilipsingnut tikiutjijomavunga inôᴋatigêksoarnik ungasidlartomit, inôᴋatigêksoarnik sôngojoᴋsoarnik, inôᴋatigêksoarnik itsarsoarnit inôᴋatigêngolauᴋtunik, inôᴋatigêksoarnik oᴋauseᴋartunik ᴋaujimangitarnik, tukkisijungnangitarniglônêt ᴋanoᴋ oᴋarmangâta.

¹⁶ Pitiksitangit iluveᴋtitut angmartutitun iput, angutingit ilûnatik ᴋoaᴋsânganeᴋangilat.

¹⁷ Nerrijomârpullo katersortarnik perorsêvingnit, niaᴋôjarniglo, ernivît panivîllo nerᴋiksanginik; nerrijomârput saugaᴋotingnik nergjutiᴋotingniglo; nerrijomârput vaineliksaᴋotivit paunganginik paungatannaᴋotingniglo, asseroijomârpullo iglugasaksoaᴋotingnik avaluliorsimajunik tatigijarnik, saviksoarmut.

¹⁸ Naliutomele tâpsomane nungumarigomângilapse, Nâlagaᴋ oᴋarpoᴋ.

¹⁹ Oᴋaraloarupselo: Suna pivlugo Nâlakab Gudipta tamakkoninga tamainik piniarvigivâtigût? kiojaksarivatit: Sorlo ᴋemakapsinga gudingoallo takorngartat kivgartorlugit nunapsingne, taimaluatsiaᴋ takorngartat kivgartoraksarivase nuname nunagingitapsingne.

²⁰ Tamanna oᴋâlautigisiuk Jakob iglungane, ᴋaujijautilugolo Judame, oᴋarluse:

²¹ Tusaritse tamattominga, inôᴋatigêksoangojose silaidlartose, silatuneᴋangitoselo; ijeᴋartose tautungitosele, siuteᴋartose tusangitosele;

²² Sivôragilungilapsingâ? Nâlagaᴋ oᴋarpoᴋ; sajugomangilasê sâmne, ilijilauᴋtunga siorᴋanik imarbiub kiglilervigijaksarijangane perᴋojamut soᴋosijuitomut ᴋângiutijungnarᴋonago tapsomingâ? Maliksoangillo aksapâkaloaleraloarpattalônêt suliniangilat; iktulijaraloarpattalônêt ᴋângiutilugo ajulerput.

²³ Inôᴋatigêksuille ukkoa ômateᴋarput nâlagomangitunik tapatojuniglo; nâlagomairput aularlutiglo.

²⁴ Oᴋangilallônêt ômatimingne: Sivôragilaulavut Nâlagaᴋ Gudivut, tunidjijoᴋ silalungmik sivorliojomik kingorliojomiglo, naliunîgingne; ᴋomiojorlo uvaptingnut vôgenik katersivingmut ilingatitaujunik.

²⁵ Idluitulinise sangutitsisimavut tâpkoninga ilipsingnit, ajorniselo tikitailititsivut ajungitunik ilipsingnut.

²⁶ Inuᴋotima akorngane idluitulijut nagvârtaungmatta; terliarsivut, sorlo tingmianiartit terliarsingmatta; mikigitjerput, inungniaromavlutik.

²⁷ Sorlo ᴋopanuaᴋaute tattangmat ᴋopanuanik, taimak iglungit tattedlarivut uivêriklernermik; taimaimat angijororsimavut akluivlutiglo.

²⁸ Koinisimavut, ᴋeblerpullo; ila, idluitulinerme pivaliavut; idluarsailungilat pitjutinik, iliarsûb pitjutinganiglônêt, sulitsiarᴋovlugo; ajoᴋsartûblo idluarᴋutiksanganik idluarsailungilat.

²⁹ Sugiartuksaungilangâ tamakkoa pivlugît? Nâlagaᴋ oᴋarpoᴋ; tarniga akkiniartuksaungilâᴋ inôᴋatigêksoarnik taimaitunîk?

³⁰ Makojungnadlartokarpok mamaitoâluᴋarpoᴋ nuname.

³¹ Nalautaijut nalâgôngitomik nalautaivut, ajokertuijullo aggangmingnut ataniolerput, inuᴋotimalo tamakkoa nâmagivait; ᴋanoᴋ ilingajomâlerᴋisê?