Jeremia 49 - Labrador Inuttitut Heritage Bible

¹ Ammonib kinguvângit pivlugit. Imâk oᴋarpoᴋ Nâlagaᴋ: Israêle erneᴋangilâᴋ? Kingormgujijuksaᴋangilâᴋ? Suna pivlugo ataningata Gade perᴋutigivaûk, soᴋlo inungit ineᴋarᴋât iglugasaksoanginê?

² Taimaimat, ahâk, uvlut naliutijomârput, oᴋarpoᴋ Nâlagaᴋ, kamasârineᴋ unatarnermut Rabbamut Ammonib kinguvângita ilanganut tusartautitsomârapko; aᴋtarlukungoromârporlo sunaᴋangitoᴋ, paningillo ikitaujomârput ikomamut; Israêliblo tagva kingormgutijigilauᴋtane kingormgujiutigilârpait, oᴋarpoᴋ Nâlagaᴋ.

³ Keadlarit, Hesbone, Ai asserortaungmat, nipliadlaritse, Rabbab paningit, pôᴋsajavinerniglo attisileritse; ogguadlaritse, avalut akorngane utertarluse; atanise aularutijaujomârmat, ajoᴋertuijune angajoᴋânalo ilagivlugit.

⁴ Sôᴋ naᴋsatit piojorijutigivigît, naᴋsatit takoranidlartut, paniojotit kingorpiosartotît? tateᴋartotit perᴋutevaksoanik, oᴋarlutit: Kia tikiniarpângâ?

⁵ Ahâk, erᴋsinartoᴋ tikiutijomârpara ilingnut, oᴋarpoᴋ Nâlagaᴋ, Nâlagaᴋ Zebaot, avalingnit tamainit; ᴋemâtitaujomârposelo ilûnamasiase ingergainaᴋ, ᴋemâjuniglo katersoijoᴋaromângilaᴋ.

⁶ Kingornganele Ammonib kinguvângita aularutijauningat utertitsomârpara, oᴋarpoᴋ Nâlagaᴋ.

⁷ Edome pivlugo. Imâk oᴋarpoᴋ Nâlagaᴋ Zebaot: Têmaneme ilisimaneᴋarungnaiᴋâ? silatujut silatunêrutivât? ilisimaningat nipaᴋsimavâ?

⁸ Kemâtitse, sangugitse, pokitome ineᴋaritse, Dêdanemiojose. Esauib kapiasugviksanga tikiutitsomârapko tâpsomunga, uvamnut nalipsartauviksanga.

⁹ Vainiksanik katersijut tikinajarpatit amiakoᴋartitsinajangilât piksanik nâmaksiᴋâratîk? Tigliktut unnuarme tikinajarpatit, asseroinajangilât nâmaksiᴋârtinagît?

¹⁰ Uvangale Esaue ussingatipara, ijervigijangit mattoêrpakka, ijerlunalo ajulilârpoᴋ; kinguvângit asserortauvut, ᴋatangutingillo, inôᴋatingillo, tâmnalo itsungnairpoᴋ.

¹¹ Iliarsugijatit taimailingatuinartikit, uvanga pairijomavakka; uigarnerijavillo tatigilinga.

¹² Imâk oᴋarmat Nâlagaᴋ: Ahâk, ipkoa imertuksaulaungikaloartut ᴋajûtarmit imertuksaulârput; igvillo pidlartaujuksaungitotôvêt? pidlartaungilulângilatit, imidlartuksauvotille.

¹³ Uvamnik taivlunga angimarilaurama, oᴋarpoᴋ Nâlagaᴋ, Bosra tataminiarutiksangoromârmat, mitautiksangordlunalo, asserorningordlunalo, ôminarsitiksangordlunalo; iglugasaksoangillo ilûnatik asserorningortuksauvut soraijuitomik.

¹⁴ Oᴋautsinik tusalauᴋpunga Nâlakamit, aᴋpârtorlo tilijauvoᴋ inôᴋatigêksoarnut, oᴋarᴋovlugo: Katersoritse opaktorlugolo, atuinauleritselo unatarnermut.

¹⁵ Ahâk, mikijôtilauᴋpagit inôᴋatigêksuit akorngane, naggonartilutillo inuit akorngane.

¹⁶ Erᴋsinarnît issumagilugo, ômativit piojoriningata uivêrisimavâtit, igvit ineᴋartotit imnat ᴋongnângine, ᴋaᴋᴋallo poᴋtoningine nunaᴋartotit; ublolioraloaruvit nektoraliktut poᴋtojome, kataktitsomavagit takpikangat, oᴋarpoᴋ Nâlagaᴋ.

¹⁷ Edomelo tataminiarutiksangoromârpoᴋ; tâpsominga ᴋângertut ilûnatik tataminiaromârput, mitauteᴋarlutiglo kapiasûtigijangit tamaita pivlugit.

¹⁸ Taimailingalârpoᴋ sorlo Sodometut Gomorratullo iglugasaksoatitullo tâpkoa erᴋângnêtutitut oggotitauningine, oᴋarpoᴋ Nâlagaᴋ, inungmik nunaᴋartoᴋaromâtsangilaᴋ tagvane, inuillo erningita naliaᴋ tagvane angerarveᴋaromâtsangilaᴋ.

¹⁹ Ahâk, loevetut majuaromârpoᴋ Jordanib supininganit iniksamut aulatjairtomut; tuavitomigle ᴋemâtitsomârpara tâpsomangat; annerijaujorlo angajoᴋângortitsomârpara tâpsomunga; kina uvaptun ingmât? Kia naliuneᴋarᴋojomavângâ? Kinaunâlo mianersijoᴋ sâmne nangertuksâᴋ?

²⁰ Taimaimat tusaritse Nâlakab atanertuinerijanganik, Edome pivlugo atanertuinerijanganik, kajusimanerijanganiglo Tîmanemiut pivlugit; sauᴋat mikiningita uniaromârpait, tâpsoma naternangit tataminiartitsomârpait tâpkoninga.

²¹ Nuna sajukpilâdlarpoᴋ oggotitauningita ivlungninganut; ᴋuggudlartoᴋarpoᴋ, pervalungningalo tusaksauvoᴋ imarbingme suvlolingme.

²² Ahâk, paungaromârpoᴋ nektoraliktut tingilune, essarûgik issivilugik Bosra tikidlugo; uvlormelo tâpsomane Edomib pitsartujungita ômatingit ilingajomârput arnab ernisuktûb ômatingatut.

²³ Damaskus pivlugo. Hâmat kangusudlarpoᴋ, Arpadtauᴋ; unipkautsinik idluitunik tusaumavut, auksivullo; imarbingme nunaᴋartut kuksalâdlarput, inilangajungnangilat.

²⁴ Damaskus nukkingêrutivoᴋ, sanguvoᴋ ᴋemâjomavlune, sajungneruble tigumiarpâ, ânilakteradlarnerub kapiasungnerublo erᴋisimiarpâk, arnatut ernisuktotut.

²⁵ Ahâk, iglugasaksuit nertordlertotalit ᴋemaktaungilât, iglugasaksuit ᴋuviagijakkâ?

²⁶ Tamanna pivlugo inôsuktungit okpikâromârput apᴋosineâlungine, angutillo unatarpaktut ilunatik nipangertitaujomârput uvlorme tâpsomane, oᴋarpoᴋ Nâlagaᴋ Zebaot.

²⁷ Ikitsijomârpungalo ikomamik Damaskusib avaluksoangine, tâpsomalo Benhâdadib iglusoangit nungutsomârpait.

²⁸ Kedare pivlugo, Hâsoriblo ataniovingit, Nebukadnezarib Babilonib ataningata sâlagijangit pivlugit. Imâk oᴋarpoᴋ Nâlagaᴋ: Makititse, majuaritse Kêdaremut, Kittâmiullo ᴋitorngangit sunairutilugit.

²⁹ Tupingit nergjutingillo tigujomârpait, tâlutangillo perᴋutingillo kamêleᴋotingillo aᴋsârnigarijomârpait nangminerijomavlugit, ᴋaigarsugvigijomârpaillo: Erᴋsinartut avatipsingnêput ilûnâne.

³⁰ Kemâtitse, ᴋaningitoliaritse, poᴋitome iniksatâritse, Hâsoreme nunaᴋartose, oᴋarpoᴋ Nâlagaᴋ; Nebukadnezarib Babilonib ataningata ataniortigisimangmase kajusimajutigivluselo.

³¹ Makititse, majuaritselo inôᴋatigêksoarnut inilangatsiartunut, terliklutik inôjunut, oᴋarpoᴋ Nâlagaᴋ; upkoaᴋsoaᴋaratiglo itârtaugêkuteᴋangilat, apsimavlutik igloᴋarput.

³² Kamêleᴋotingit pijaksauvut taimaimat, nergjutegasaksoangillo aᴋsârnigaksauvut; siamartitsomavakkalo anorinut tamainut imingita issunginik kippisisimajut; avatanillo ilûnainit kapiasûtiksangit tikiutitsomavakka, oᴋarpoᴋ Nâlagaᴋ.

³³ Hâsorelo iniksaujomârpoᴋ terrianiangojârtunut, inuêrningorlune issoᴋangitomut; tagvane inungmik nunaᴋartoᴋaromângilaᴋ, inûblônêt erningata angerarviginiangilât.

³⁴ Nâlakab oᴋausinga tikilauᴋtoᴋ Jeremiamut nalautaijomut Elame pivlugo, Zedekiab, Judab ataningata atanioningata pigiarningane, oᴋarlune:

³⁵ Imâk oᴋarpoᴋ Nâlagaᴋ Zebaot: Ahâk, Elamib pitiksinga navigomavara, tâpkoa pitsartuningita anginerpaujungata.

³⁶ Elamemullo tikiutitsomavakka anorit sittamat ᴋilaub issunginit sittamanit, anorinullo tâpkonunga tamainut siamartitsomavakka; inôᴋatigêksoaᴋarniangilarlo tikitaulungitunik Elamemit ᴋemâtitaujunut.

³⁷ Elamemiullo kapiasuktitsomadlarpakka ômigijingita sângine, inôsinginiglo pinasuartut sângine, idluitomiglo tikiutjijomavunga tâpkonunga, ila, ningarnimnik ilungertortomik, oᴋarpoᴋ Nâlagaᴋ; saviksoarlo udlaniktitsomavara tâpkoninga, nungutsiᴋârtinanga tâpkoninga;

³⁸ Iksivautaᴋsoaralo Elamemut ilijomavara, tagvangallo ataneᴋ angajoᴋâᴋsuillo pêjaromavakka, oᴋarpoᴋ Nâlagaᴋ.

³⁹ Kissianele uvlune kingorlerne Elamib aularutijauningat utertitsomârpara, oᴋarpoᴋ Nâlagaᴋ.