Jeremia 48 - Labrador Inuttitut Heritage Bible

¹ Moabe pivlugo. Imâk oᴋarpoᴋ Nâlagaᴋ Zebaot, Israêlib Gudinga: Kapianarmêk Nebo! sunairutititaungmat; Kiriataim kangusuktitauvoᴋ, tigujauvlunalo; Misga kangusuktitauvoᴋ serᴋomitauvlunalo.

² Moabe nertornautiksairutivoᴋ; Hesboneme issumâlugutigivât, oᴋarlutik: Attê, inôᴋatigêksoangojungnaitilaulavut. Igvillotauᴋ Madmêna nipangertitaujuksauvotit; saviksoalijartomut ulatauniarpotit.

³ Nipliadlarnerub pervalungninga Horonaimemit, perajalungneᴋ asserorsainersoarlo!

⁴ Moabe asserortauvoᴋ; mikijungita nipliadlarneᴋ tusartautipât.

⁵ Lukitib majorᴋangagut ᴋeatsainarlutik majorarput; Horonaiblo sittorᴋangane tusartauvoᴋ asserortaunerub ᴋuggudlarninga ogguartoᴋ.

⁶ Kemâleritse, inôsise piulisigik, paungaᴋutitullo inuᴋangitomêtotut ileritse.

⁷ Suliarijatit pivianartoᴋutigijatillo sungertutigilaurangne, igvittauᴋ tigijauᴋataujomârpotit; Kêmoselo (gudingoaᴋ) aularutijaujomârpoᴋ, ajoᴋertuijungit angajoᴋângillo ilagilugit.

⁸ Asserorsaijorlo tikilârpoᴋ iglugasaksoarnut tamainut, iglugasaksoarnillo nalialônêt aularomângilaᴋ; naᴋsaᴋtauᴋ sujuktaujomârpoᴋ, naternarlo sunairutijaujamârpoᴋ; sorlo Nâlagaᴋ oᴋarsimangmat.

⁹ Moabe tunitjivigisiuk esarungnik, tingilune aularungnarᴋovlugo; iglugasaksoangillo inuêrutjaujomârput inuktaᴋarungnairlutik.

¹⁰ Ominarsile Nâlakab suliarijauᴋojanganik erᴋeasuklune piniartoᴋ, ôminarsilelo saviksoaminik noᴋartitsijoᴋ aungmik kovisijomairlune.

¹¹ Moabe inôsungnerminit siornioriaᴋalaungilaᴋ, ᴋikkatsainarpoᴋ kinganeᴋumine, kovijauᴋattalaungilaᴋ ᴋattaujamit ᴋattaujamut, aularutijaulaungilarlônêt; taimaimat mamarnine pigitsairnarpâ, tipingalo soᴋositsangilaᴋ.

¹² Tamanna pivlugo, ahâk, uvlut naliutijomârput, oᴋarpoᴋ Nâlagaᴋ, tilikleromârama uvertitsijunik tâpsomunga, tâpkoalo uvertitsomârpât; ᴋattaujangit imairutijomârpait, publaujangillo serᴋomilugit.

¹³ Moabiblo Kêmose kangusûtigijomârpâ, sorlo Israêlib kinguvângita Betele, sungertûtigilauᴋtangât, kangusûtigilaungmatsuk.

¹⁴ Sudluse oᴋarᴋisê: Angutauvogut pitsartudlartut, ᴋoaᴋsângalungitullo unatarnermê?

¹⁵ Moabe sunairutijauvoᴋ, iglugasaksoangit issingorsimavut, inôsuktungillo piloriktoᴋutaujut atersârsimavut toᴋotauvingmut, oᴋarpoᴋ Ataneᴋ, Nâlakamik Zebaotemik attelik.

¹⁶ Moabib piluᴋatauvinga naliutikassalerpoᴋ, siorniorningalo ᴋaglivaliasaraidlarpoᴋ.

¹⁷ Ilipse ilûnase avatânêtose oggorisiuk, ilipselo ilûnase attinganik ilitarᴋsijose, oᴋaritse: Atso ila, ajaupiaᴋ sôngojoᴋ napvaujimavoᴋ, ajaupiaᴋ piojoᴋ.

¹⁸ Igvit paniojotit, iksivajotit Diboneme, aᴋᴋarit ânanaunernit ingilutillo ᴋêlervingmut; Moabib asserorsaijinga majuarpoᴋ ilingnut, asserorpaillo sôngojoᴋsoaᴋotitit.

¹⁹ Igvillo ineᴋartotit Aroêreme, apᴋosiniub saniane nangerit kamalutillo; ᴋemâjoᴋ apertsoruk, aulartorlo apertsoruk, Suvât?

²⁰ Moabe kangusuktitauvoᴋ serᴋomitaungmat; ᴋaggudlaritse ᴋeavluselo; unipkautigisiuk Arnoneme, Moabe sunairutijaungmat.

²¹ Pidlaut tikipoᴋ nunamut naternamut; Hôlonemut, Jâsanemullo, Mefâtemullo;

²² Dibonemullo, Nebomullo, Bet-diblataimullo;

²³ Kiriataimullo, Bet-gâmulemullo, Bet-mêonemullo;

²⁴ Keriotemullo, Bosramullo, iglugasaksoanullo tamainut Moabib nunangane, ungasiktunullo ᴋanitunullo.

²⁵ Moabib nakjunga nakkartauvoᴋ, talinga navgortauvoᴋ, oᴋarpoᴋ Nâlagaᴋ.

²⁶ Talatisiuk, angijorortingmat nangminerminik Nâlakamut; Moabelo aksapalloajuksauvoᴋ meriartamine, mitautauniarlunalo.

²⁷ Israêle mitautiksaulaungimât ilingnût? Tigliktulle akorngane naipitaulauᴋâ? oᴋautigijarangangnele ileᴋetamârpotit.

²⁸ Ilipse Moabeme nunaᴋartose, iglugasaksuit ᴋemaksigik inetârluselo ᴋairtune; ileritselo tingmiatut ᴋairosûb pângata saniane auktotaᴋartotut.

²⁹ Moabib piojoridlarninga tusaumavavut, piojoridlarmat, ila; pingijainingalo, piojoriningalo, nâlangnarasuginingalo, ômatingatalo ᴋuksalaininga.

³⁰ Ningarninga ᴋaujimavara, Nâlagaᴋ oᴋarpoᴋ, sunautsangimat; nertôtiningillo sulilungilat.

³¹ Tamanna pivlugo Moabe âladlarutigijomavara; ila, Moabe ilûnât pivlugo nipliadlaromavunga; Kir-hêresib inungit pivlugit ogguadlarniarput.

³² Anginersamik Jâserib ᴋeaninganit, ᴋeajutigijomavagit, vaineliksaujotit Sibmame; akkeroᴋotivit siamangajut imâᴋ ikârpât, Jâserib imanganut tôᴋput; asserorsaijûb paungatit aujaᴋsiutit vaineliksatillo arᴋtautigivait.

³³ Serrinerlo ᴋuviasungnerlo aularutijauvuk perorsêvingmit paungaᴋtalingmit Moabiblo nunanganit; vainalo sorairtipara iptêjaivingne; nipliatsiartuniglo tukkarniktoᴋarniangilaᴋ; niplianeᴋ nipliatsiarnioniangilaᴋ.

³⁴ Hesboneme nipliagamik nippingit tusartauvut Eleale tikidlugo, Jâhaselo aglât tikidlugo, Zoaremit Horonaimut aglat, Kalingoaramik tuktuvaktut jâreliktut pingasunik; Nimrib puilavingit imeᴋarungnairmattatauᴋ.

³⁵ Sorairtitsomârpakkalo Moabeme, oᴋarpoᴋ Nâlagaᴋ, tunergusertoᴋ ᴋaᴋᴋane merᴋoᴋangitune, tipigiksautiniglo isserluanititsijoᴋ gudingoaminut.

³⁶ Tamanna pivlugo ômatiga nipliavoᴋ nipjautetut Moabe pivlugo, ômatigalo nipliavoᴋ nipjautetut Kir-hêresib angutingit pivlugit; akluinerit katersortangit nungutaungmatta.

³⁷ Niaᴋut ilûnatik nujairmatta, umillo ilûnatik salijaumangmatta; kileᴋarpoᴋ aggangne tamaine, makkiternalo pôᴋsajaᴋarpoᴋ.

³⁸ Moabib iglungita ᴋângine tamaine apᴋosininginalo ogguarneᴋarpoᴋ ilûnâne; Moabe serᴋomisimagapko maggaᴋtut ᴋuviasûtaungitotut, oᴋarpoᴋ Nâlagaᴋ.

³⁹ Kappê, serᴋomitaudlarpoᴋ! Kappê, ᴋorᴋsudlarput! Kappê, Moabib tunune sâtipâ kangusuklune! Taimaidlune Moabe mitautiksangorniarpoᴋ ᴋoaᴋsârutiksangorlunalo avaliminut tamainut.

⁴⁰ Imâk oᴋarmat Nâlagaᴋ: Ahâk, tingilârpoᴋ nektoraliktut, esaûngne issivilârpak Moabemut.

⁴¹ Keriot pijauvoᴋ, iglugasaksoangit sôngojut suingartauvut, Moabiblo pitsartujungita ômatingit ilingalârput naliutome tâpsomane arnab ernisuktûb ômatingatut.

⁴² Moabelo asserortaudlalârpoᴋ inôᴋatigêksoangojungnailutik, angijorortilaurame nangminerminik Nâlakamut.

⁴³ Erᴋsinartûb itersâlublo nigablo tikilârpâtit, Moabemiojotit oᴋarpoᴋ Nâlagaᴋ.

⁴⁴ Kemâjoᴋ erᴋsinartomit katagomârpoᴋ itersâlungmut, ᴋaᴋᴋijorlo itersâlungmit pijaulârpoᴋ nigamut; Moabemut tikiutjijomârama nalipsartauvingata jâringanik, oᴋarpoᴋ Nâlagaᴋ.

⁴⁵ Kemâsimajut nangerput Hesbonib taggaliningane nukkeᴋaratik; Hesbonemille ikoma anisimavoᴋ, ikoâlanerlo Sihonib ᴋerᴋânit, êsilutik Moabib terreᴋunginik, pikablajullo niaᴋungita kabjinginik.

⁴⁶ Kapianarmêk Moabe! Kêmosib inungit ajulerput; ernitit aularutijaungmatta, panitillo kipalungortitauvlutik.

⁴⁷ Uvlunele kingorliojune Moabib aularutijauningat utertitsomârpara, oᴋarpoᴋ Nâlagaᴋ. Moabib erᴋartortauninga kigleᴋarpoᴋ tamâne.