Jeremia 47 - Labrador Inuttitut Heritage Bible

¹ Nalekab oᴋausinga tikilauᴋtoᴋ Jeremiamut nalautaijomut Filisterit pivlugit, Farao annauniᴋârtinago Gasamik.

² Imâk oᴋarpoᴋ Nâlagaᴋ: Ahâk, inuit puilavut avangat, kôksoangoromârpullo kutjersimajoᴋ, nunalo tâpsomanêtullo tamaita ᴋâmervigijomârpait, iglugasaksuillo inungillo; inuillo ᴋeadlaromârput, nunamiullo ilûnatik ᴋuggudlaromârput.

³ Horsingita itigangita tukkartorningita ᴋiᴋᴋerganginut, ᴋamutingita aksaloalit ivulungninginut, aksaloangita kalerganginut, atâtat ᴋevialungilat ᴋitorngamingnut, aggangita sangêningit pivlugit;

⁴ Uvloᴋ naliutijomârmat Filisterit ilûnatik asserortauviksangat, pêjaiviksaᴋ ikajortunik tamainik amiakôjunik Tirusemit Sidonemillo, Nâlakab Filisterit asseroromârmagit, ᴋikertab Kaftorib amiakungit.

⁵ Nujairneᴋ tikipoᴋ Gâsamut; Askalon sunaungititauvoᴋ, naᴋsangata amiakungit; ᴋanoᴋ sivitutigijomik kileromavêt ilingnîk?

⁶ Igville, Nâlakab saviksoanga! ᴋanoᴋ akunertigilârᴋêt inilangatsiarᴋârtinâk? Pôlerit ilingnik kênailitarnut; merngoêrserit, ᴋikarlutillo.

⁷ Kanorle inilangajungnarᴋêt, Nâlakab perᴋosimangmatît? Askalonemut, imarbiksûblo sidjanganut, perᴋosimavâtit.