Jeremia 46 - Labrador Inuttitut Heritage Bible

¹ Nalekab oᴋausinga tikilauᴋtoᴋ Jeremiamut nalautaijomut inôᴋatigêksuit pivlugit.

² Egipten pivlugo; Faraub Nekob, Egiptenib ataningata, sorᴋsuktoᴋatigêksoangit pivlugit, kôksub Frâtib sanianêtut Karkêmiseme, Nebukadnezarib, Babilonib ataningata, sâlagijangit Jojakimib, Josiab erningata, Judab ataningata jâringita sittamangane.

³ Talut supûlutallo pijarêrsârsigik, ᴋaglitileritselo unatarnermut.

⁴ Horsit anulersigik, ikileritselo, ilipse horselijartose, niaᴋoarêkutilijaritselo; ᴋalugiat kênaksârsigik, sillapâllo kikiangojut atilersigik.

⁵ Sôᴋ taimaitomik takovêk? Kuksalâdlarput utimuarlutiglo; sôngojungillo sâlauvut, ᴋemâdlarput ᴋeviarungnaratiglo; kapiasungneᴋ ilûnânêpoᴋ, oᴋarpoᴋ Nâlagaᴋ.

⁶ Sukalijoᴋ aularniarane, pitsartujorlo ᴋemâniarane; avane kôksub Frâtib saniane naukiutivut oggolutiglo, okpikâdlarlutik.

⁷ Kinaunâ kôksoatut Nîletut kutjertotut itôk, imangit iktulijarlutik kôksoatitût?

⁸ Egipten kutjerpoᴋ kôksoatut Nîletut, tâpsomalo imangit iktulijarput kôksoatitut; oᴋarporlo: Kutjeromavunga, nuna uligomavara; iglugasaksuit asseroromavakka, inungillo tapidlugit.

⁹ Majoraritse, ilipse horseojose; sukalidlaritselo, ᴋemuksertôjose; angutit pitsartujut anilît; Etiopiamiut, Puttimiullo, sapûlutanik tigumiarpaktut; Ludemiullo, pitiksinik tigumiarpaktut ᴋellumijullo.

¹⁰ Uvloᴋ tâmna tâmnauvoᴋ Nâlakab, Nâlakab Zebaotib uvlunga, uvloᴋ akkiniarvik, akkerartortiminik akkiniarᴋovlugo; saviksoaᴋ nungutsijomârmat nâmaksivlunalo; Nâlagaᴋ, Nâlagaᴋ Zebaot, tunergusermat nuname avanêtome kôksub Frâtib sinâne.

¹¹ Gileademut majuarit, mangiptaksarsilutillo, uigasôjotit Egiptenib pania; âniasiutit unuktut sulingitomik atorpatit; inûlijauviksaᴋangilatit.

¹² Inôᴋatigêᴋsuit kangusuktitaunît tusaumavât, nunalo nâmavoᴋ niplianernik; pitsartujoᴋ naukiutingmat pitsartujomut, ᴋallerêktilutiglo pâlaksimavut.

¹³ Oᴋauseᴋ Nâlakab oᴋauserijanga Jeremiamut nalautaijomut, Nebukadnezar, Babilonib ataninga, tikituksaungmat nunalo Egipten annaudlarlugo.

¹⁴ Egipteneme oᴋâlagitse, Migdoleme unipkâritse, Nofeme Tapanêsemelo tusartitsileritse; oᴋaritse, Sagvarit, opalungairsarit, avatingnêtut saviksûb nungulermagit.

¹⁵ Sôk pitsartujoᴋotitit sâptauvât? Nangerungnangilat, Nâlakab ajangmagit.

¹⁶ Unuktut nâklivait, ila, okpikâᴋatigêkput; oᴋarpullo, Makileritse, utermitalo inôᴋatiptingnut nunaptingnullo saviksoarmit takopsoajuitomit.

¹⁷ Tagvane ᴋaigarsukput: Farao, Egiptenib ataninga, pervalungnetuinauvoᴋ; naliuneᴋ piviksaujoᴋ ᴋângiutisimavâ.

¹⁸ Sorlo mikseᴋârtomik inôgama, oᴋarpoᴋ Ataneᴋ, Nâlakamik Zebaotemik attelik, sorlo Tabor ingmat ᴋaᴋᴋaᴋsuit akorngane, sorlolo Karmel ingmat imarbiksub sinâne, taimaidlune tikituksauvoᴋ.

¹⁹ Igvit ineᴋartotit Egiptenib paningane, opalungairsârit aularutijaugiamut; Nofe asserornilukkungortuksaungmat, ikitaujuksauvoᴋ, inuêrutjilune.

²⁰ Egipten noggauvoᴋ ᴋuvianartoᴋ, asseroijorle avangat ᴋaivoᴋ, ila, ᴋaivoᴋ.

²¹ Attartugangillo ᴋerᴋânêtut iput noggaktitut nerripkaivingmêtutitut; tâpkoatauᴋ sangusimavut, ᴋemâᴋatigêkput, nangilaungilat; uvloᴋ kapiasuktitauviksangat tikisimangmat tâpkonunga, uvloᴋ nalipsartauviksangat.

²² Pervalungningat ᴋuglugiaᴋsûb pâmgortûb pervalungningatut ipoᴋ; katimgajoᴋsôvlutik ingerarmatta, ulimautigilutik opaktorpât, sorlo ᴋejungnik nakkaterijut.

²³ Napârtungit nakkajomârpait, oᴋarpoᴋ Nâlagaᴋ, kititaujungnangimatta; unuluarmatta piglertaujanit, kititaksaungilallo.

²⁴ Egiptenib paninga kangusuktitaujomârpoᴋ; tunijaujomârpoᴋ taggamiut agganginut.

²⁵ Nâlagaᴋ Zebaot, Israêlib Gudinga oᴋarpoᴋ; Ahâk, sugiaromârpakka Amon, Nômêtoᴋ, Faraolo, Egiptenalo, gudingoangit ataningillo ilagilugit; ila, Farao, tâpsomingalo tateᴋartut;

²⁶ Tunijomârpakkalo inôsinginik pinasuartut agganginut, Nebukadnezariblo, Babilonib ataningata, agganginut, tâpsomalo kivgangita agganginut; kingornganalo nunagijaujomârpoᴋ sorlo itsaᴋsoarme, oᴋarpoᴋ Nâlagaᴋ.

²⁷ Igville, sivôraniarnak, Jâko kivgara, kapiasudlarnak, Israêle; ahâk, ᴋelujomârpagit ungasiktomit, kinguvâtillo nunamit aularutijauvingmingnit; Jâkolo uteromârpoᴋ inilangatsiarniarlunalo pagvisartaulugane, ᴋoaᴋsârtitsijoᴋarnialungilarlo tâpsominga.

²⁸ Sivôranak, Jâko kivgara, oᴋarpoᴋ Nâlagaᴋ, ilagigapkit; inôᴋatigêksuit ilûnaita ajaktortauvigijatit uvamnut nungumarigomârapkit, igville nungumarigomângilagit; sugiaromârpagille nâmatuinartomik, pidlartautailititsomângimarikpagille.