Jeremia 44 - Labrador Inuttitut Heritage Bible

¹ Oᴋauseᴋ tikilauᴋtoᴋ Jeremiamut Judit tamaita nuname Egipteneme nunaᴋartut pitjutigilugit, nunaᴋartut Migdoleme, Tapanêsemelo, Nofemelo, Patrosiblo nunangane, oᴋarlune:

² Imâk oᴋarpoᴋ Nâlagaᴋ Zebaot, Israêlib Gudinga: Takosimavase idluineᴋ tamât tikiutijara Jerusalemut Judablo iglugasaksoanginut tamainut; ahâglo, uvlome asserorsimaniovut inuᴋarungnailutiglo;

³ Idluinitik piniarnerijatik ningarsârlunga pitjutigilugit, isserluanititsijartormatta tipigiksautinik, kivgartorlutiglo gudingoanik assimnik ilitaringitamingnik, tâpkoalônêt, ilipselônêt, atâtagilauᴋtapselônêt ilitaringitanginik.

⁴ Uvangale tiliklervigilauᴋpapse kivgamnik tamainik nalautaijunik, makisaraivlunga tililugillo, oᴋarᴋovlugit: Maᴋojungnartulineᴋ tamanna ômigijara piniarniarasiuk.

⁵ Nâlalaungilalle, siutitiglônêt manilaungilait sâgiaromavlutik idluinermingnit, tipigiksautinik isserluanititsijomairlutik gudingoanut assimnut.

⁶ Tamanna pivlugo ningaumajârnera ᴋaningaumajârneralo kovijauvuk, ikoâlalauᴋpuglo Judab iglugasaksoangine Jerusalemiblo apᴋosineâlungine; tâpkoalo asserortaumavut inuilangorlutiglo sorlo uvlome pingmatta.

⁷ Taimaimat mâna imâk oᴋarpoᴋ Nâlagaᴋ, Gude Zebaot, Israêlib Gudinga: Soᴋ taimak angitigijomik tarnise idluitulitipisigîk, nakatsiluse ilipsingnit angutiniglo arnaniglo sorutsiniglo amâmaktuniglo Judamit, amiakoᴋarungnaiᴋovlusê?

⁸ Taimaidluse ningarsârpapsinga aggapse sanajanginut, tipigiksautinik isserluanititsigapse gudingoanut assimnut nuname Egipteneme nunagijartortapsingne; nakartauᴋovluse, oᴋarnerlutauᴋovluselo mitautauᴋovluselo inôᴋatigêksuit nunamêtut tamaita akorngane.

⁹ Puigorᴋisê atâtapse idluitulininginik, Judablo ataningita idluitulininginik, tâpkoalo nuliangita idluitulininginik, ilipselo idluitulinipsingnik, nuliapselo idluitulininginik, piniarnerijanginik Judab nunangane Jerusalemiblo apᴋosiniâlunginê?

¹⁰ Nikanarsâlungilat uvlome tikidlugo aglât, sivôrangilallônêt, arvertalungilallônêt maligaksauᴋojamne perᴋojamnelônêt pititamne sâpsingnut atâtapselo sânginut.

¹¹ Taimaimat imâk oᴋarpoᴋ Nâlagaᴋ Zebaot, Israêlib Gudinga: Ahâk, kênara ilipsingnut sangutitsomavara idluitomut, Juda ilûnât nakatsomavlugo aglât.

¹² Judablo amiakungit, sangutitsisimajut kênamingnik aijomavlutik nunamut Egiptenemut taikane nunaᴋaromavlutik, tgujomârpakka nungutaujuksauvullo; nuname Egipteneme ioggotsomârput; nungutaujomârput saviksoarmut kângnartoᴋsoarmullo; toᴋojomârput, mikinerpâmit anginerpâk tikidlugo, saviksoarmut kângnartoᴋsoarmullo; ôminarsititaujomârpullo, tataminiarutiksaujomârlutiglo, oᴋarnerlûtiksaujomârlutiglo, mitautiksaujomârlutiglo.

¹³ Sugiaromârpakkalo nuname Egipteneme nunalît, sorlo Jerusalem sugailaurapko, saviksoarmut, kângnartoᴋsoarmullo, nusilingnartomullo;

¹⁴ Judab amiakunginit nunamut Egiptenemut aisimajunit taikane nunaᴋaromavlutik, aulartoᴋarᴋonago, amiakoᴋarᴋonagolo Judab nunanganut utertuksauvlutik, kajungilâraloarpatta tâvunga uteromavlutik nunagijomangmilugo; utertoᴋarniatsangimat ᴋemâjut kissimik.

¹⁵ Tagva angutit ilûnatik ᴋaujimajut nuliamik isserluanititsininginik tipigiksautinik Gudib assianut, arnallo ilûnatik najûtijut, katimajoᴋsuit, ila, inuit ilûnatik nuname Egipteneme nunalit, Patroseme, Jeremia akkivât, oᴋarlutik:

¹⁶ Oᴋauseᴋ oᴋautigijat uvaptingnut Nâlakab attingane pitjutigivlugo, nâlagomangilaptigit.

¹⁷ Oᴋautsille tamaita ᴋaniptingnit anitavut nâmaksititsomavavut; isserluanititsijomavluta tipigiksautinik ᴋilaub ataninganut arnamut, kovisijomavluta tunergutiksanik imiksanik tâpsomunga, sorlo piniarêrapta uvagut atâtavullo, atanivut angajoᴋâvullo, Judab iglugasaksoangine, Jerusalemiblo apᴋosineâlungine; taipsomane amigangitunik nerᴋiksaᴋalaurapta ᴋanoengitsialauᴋpogullo, idluitomiglo takolugata.

¹⁸ Taimangalle isserluanititsijungnairaptanit arnamut ᴋilaub ataninganut, kovisijungnairlutalo tunergutinik imiksanik tâpsomunga, ajoᴋsarpogut tamainik, nungutaulerlutalo saviksoarmut kângnartoᴋsoarmullo.

¹⁹ Isserluanititsilauraptalo arnamut ᴋilaub ataninganut, kovisigaptalo tunergutinik imiksanik tâpsomunga, ᴋaᴋᴋôjaliolauᴋitâ tâmna adsilivlugo, kovisilauᴋitâlo tunergutinik imiksanik tâpsomunga, uivut ᴋaujitinagît?

²⁰ Tagva Jeremia oᴋarpoᴋ inungnut tamainut, angutinut arnanullo, ila, inungnut tamainut akkiortiminut, oᴋarlune:

²¹ Tipigiksautit isserluanititsijutigilauᴋtase Judab iglugasaksoangine Jerusalemiblo apᴋosineâlungine, ilipse, atâtapselo, atanipse angajoᴋâpselo, nunablo inungita, ila, tâpkoa Nâlakab erᴋaumalaungilagît ômamiutarilaungilagîllo?

²² Nâlagarlo kamangitsertorungnaisinnarpoᴋ, piniarnipse idluiningit pitjutigilugit, maᴋojungnartulinerijaselo pitjutigilugit; tamanna pivlugo nunase asserorsimavok tataminiarutaularmelo, oᴋarnerlutjauvlunalo, inuᴋarungnaivlune, sorlo uvlome pingmat.

²³ Tipigiksautinik isserluanititsilaurapse, Nâlagarlo idluitulivigigapsiuk, nâlalunginapselo Nâlakab nippinganik, arvertalunginapselo tâpsoma maligaksauᴋojangit perᴋojangillo kigligiutsiningillo maliklugit; tamanna pivlugo idluitûb tamattoma nalaupâse, sorlo uvlome pingmat.

²⁴ Sullelo Jeremiab inuit ilûnaita, arnallo ilûnaita oᴋautivait: Nâlakab oᴋausinga tusarsiuk, Judakut tamapse nuname Egiptenemêtose;

²⁵ Imâk oᴋarpoᴋ Nâlagaᴋ Zebaot, Israêlib Gudinga, oᴋarlune: Ilipse nuliaselo oᴋarsimavose ᴋanipsingnut, aggapselo nâmaksitisimavât, oᴋarluse: Angernerijavut angerutigilauᴋtavut nâmaksititsomavavut, isserluanititsijomavluta tipigiksautinik arnamut ᴋilaub ataninganut kovisijomavlutalo tunergutinik imiksanik tâpsomunga; atte, angernerijase taimaitisiuk, angernerijase nâmaksitisigik.

²⁶ Tamanna pivlugole Nâlakab oᴋausinga tusarsiuk, ilipse ilûnase Judakut nuname Egipteneme nunaᴋartose; Ahâk, attera angijoᴋ taivlugo angersimamarikpunga, oᴋapoᴋ Nâlagaᴋ, attera ᴋanimiutaujungnaituksaungmat Judab inungita nalianut nunamêtomut Egipteneme ilûnâne, oᴋarlune: Sorlo Nâlagaᴋ Gude inôngmat.

²⁷ Ahak, kamagijomavakka idluitomut, ajungitomu-ungitorlo; Judablo inungit ilûnaita nuname Egipteneme nunaᴋartut nungutaujuksauvut saviksoarmut kângnartoᴋsoarmullo nungumariᴋârtinagit.

²⁸ Saviksoarmullo pijaungitut uteromârput nunamit Egiptenemit Judab nunanganut ikitôvlutik; Judablo inungit ilûnatik aisimajut nunamut Egiptenemut taikane nunaᴋaromavlutik ᴋaujijomârput kia oᴋausinga tagvanêngmangât, uvangalônêt tâpkoalônêt.

²⁹ Tamannalo Nalunaikutaksarivase, oᴋarpoᴋ Nâlagaᴋ, sugiaromagapse nuname tamattomane, ᴋaujiᴋovluse oᴋausima sâviginiarmase idluitomut:

³⁰ Imâk oᴋarpoᴋ Nâlagaᴋ: Ahâk, Farao Hofra, Egiptenib ataninga, tunijomavara ômigijime agganginut, pinasuartullo inôsinganik agganginut; sorlo Zedekia, Judab ataninga tunilaurapko Nebukadnezarib, Babilonib ataningata, ômigijingata, inôsinganiglo pinasualauᴋtûb agganginut.