Jeremia 43 - Labrador Inuttitut Heritage Bible

¹ Pijoᴋarporlo Jeremiab inungnut tamainut oᴋautigijarêramigit Nâlakab Gudingata oᴋausingit tamaita, Nâlakab Gudingata tiliklerutigijangit tâpsominga tâpkonunga, ila, oᴋautsit makkoa tamaita;

² Tagva Asaria, Hosaiab erninga, Johananalo, Kareab erninga, angutillo iktoriktaitut ilûnatik oᴋarput Jeremiamut: Saglovotit, Nâlakab Gudipta tililungilâtit oᴋarᴋovlutit, Egiptenaliartuksaungilase taikane nunaᴋaromavluse;

³ Bârukible, Neriab erningata, ômisuktidlarpâtit uvaptingnik, pititsomavluta Kaldêamiut agganginut, tâpkoa toᴋotsiᴋovlugit uvaptingnik aularutilutalônêt Babilonemut.

⁴ Taimaimat Johanan, Kareab erninga, sorᴋsuktoᴋatigêksuillo angajoᴋângit ilûnatik, inuillo ilûnatik, nâlalungilat Nâlakab nippinganik, nuname Judeamêtuarᴋovlugit.

⁵ Johananible, Kareab erningata, sorᴋsuktoᴋatigêksuillo angajoᴋângita ilûnatik ilagivait amiakôjut Judamit, utersimajut inôᴋatigêksoarnit tamainit ajaktortauvigijanginit Judab nunangane nunaᴋarᴋovlugit;

⁶ Angutit, arnallo, sorutsillo, ataniublo paningit, inuillo ilûnamasiatik Nebuzaradanib, ataniub udjertortingita angajoᴋângata ᴋemaktaviningit Gedaliamut, Ahikamib, Sâfanib erningata, erninganut, Jeremialo nalautaijoᴋ, Bârukelo, Neriab erninga;

⁷ Tikipullo nunamut Egiptenemut; nâlaktailigamik Nâlakab nippinganik; tikipullo aglât Tapanêsemut.

⁸ Nâlakablo oᴋausinga tikipoᴋ Jeremiamut Tapanêseme, oᴋarlune:

⁹ Aggangnut tigusigit ujarᴋanik angijunik, maggarmiglo ilaᴋartilugit saulerkit ujarᴋanik natsetilingme, Faraub iglungata iterviata sivurâne Tapanêseme, angutit Judamit pijut takoane;

¹⁰ Oᴋautikillo: Imâk oᴋarpoᴋ Nâlagaᴋ Zebaot, Israêlib Gudinga: Ahâk, tilikleromavunga kivgaralo Nebukadnezar, Babilonib ataninga, tigujomavlugo, iksivautaᴋsoangalo ujarᴋat makkoa sausimajama ᴋânganut âᴋiksulârpara; tâpsomalo tupine pinnarnartoᴋ issivitaksarivâ ᴋolânut.

¹¹ Tikituksauvorlo nunalo Egipten sâlagilugo; toᴋomullo pijuksat tunijaujomârput toᴋomut, aularutijaunermut pijuksat aularutijaunermut, saviksoarmullo pijuksat saviksoarmut.

¹² Ikomamiglo ikitsijomârpunga Egiptenib gudingoangita iglungine; tâpsomalo ikitsomârpait aularutijomârlaitalo; nunalo Egipten atijomârpâ, sorlo mianersijûb annorâne atingmago; tagvangallo anijomârpoᴋ ulapirᴋsauteᴋarlune.

¹³ Napajoᴋsuit Betsêmeseme nuname Egipteneme naploromârpait; Egipteniblo gudingoangita iglungit ikitsomârpait.