Jeremia 42 - Labrador Inuttitut Heritage Bible

¹ Tagva sorᴋsuktoᴋatigêksuit angajoᴋângit, Johananalo, Kareab erninga, Jesanialo, Hosaiab erninga, inuillo ilûnatik, mikinerpânit anginerpânut aglât, ᴋanilerput,

² Oᴋarpullo Jeremiamut nalautaijomut: Kenunivut tôklerletôᴋ kênavit sânganut, Nâlagarlo Gudit tuksiarvigilauruk pivluta, amiakôjullo makkoa tamaita pivlugit; unuktôlauᴋtogut ikitôlerapta amiakôjogut sorlo ijîkpit takungmatigut;

³ Nâlakab Gudivit unertutjiviginiarmatigut apᴋutiksarijaptingnik piniaraksarijaptingniglo.

⁴ Jeremiablo nalautaijub oᴋautivait: Tusarpapse; ahâk, Nâlakamut Gudipsingnut tuksiaromavunga sorlo oᴋarapse; nalonaijaivigijomavapselo ᴋanoᴋ Nâlakab akkilârmangâse; sumiglônêt angigutijomangilapse.

⁵ Tâpkoalo Jeremiamut oᴋarput: Nâlagaᴋ kigligiutjijôle nalâgôrtoᴋ okpernartorlo uvaptingnut, pinialungikupta oᴋautsit tamaita maliklugit Nâlakab tilikliutigijanganik ilingnik uvaptingnut.

⁶ Pijominarmangât pijominangimangâllônêt nâlagomavavut, Nâlakab Gudipta, ilingnik uvaptingnut tiliklertûb nippinga, ᴋanoengitsiarᴋovluta, Nâlakab Gudipta nippinga nâlakuptigo.

⁷ Pijoᴋarporlo uvlut 10it nângmatta, Nâlakab oᴋausinga tikingmat Jeremiamut.

⁸ Kaiᴋovaillo tagva Johanan, Kareab erninga, sorᴋsuktoᴋatigêksuillo angajoᴋângit ilûnaita, inuillo ilûnaita mikinerpânit anginerpânut aglât,

⁹ Oᴋautivaillo: Imâk oᴋarpoᴋ Nâlagaᴋ, Israêlib Gudinga, uvamnik tiliklilaurapse, âtsiᴋovlunga ᴋenunipsingnik tâpsoma sânganut;

¹⁰ Nuname tamattomanêgomagupse tamattomanêtuinaritse inersititsomârpapse igupteromanaselo, ilijomârpapselo nusugomanaselo; ajortoᴋ piniarnerisimajara ilipsingnut ᴋaᴋialerutigigapko.

¹¹ Babilonib ataninga sivôragijase, sivôraginiarasiuk; sivôraginiarasiuk, oᴋarpoᴋ Nâlagaᴋ; ilipsingnênama piulijomavluse, ᴋelujomavluselo tâpsoma agganginit.

¹² Nâpkigijomavapselo, tâmna nâpkiniᴋovlugo ilipsingnik, utertitsiᴋovlugolo ilipsingnik nunapsingnut.

¹³ Oᴋarupsele: Nuname tamattomane nunaᴋaromangilagut; nâlaktailiᴋovluse Nâlakab Gudipse nippinganik;

¹⁴ Oᴋarluse: Ila, nunamut Egiptenemut aijomavogut, tautugviginiangitaptingnut unatarnermik, tusarlugatalo tiptulautib nippinganik, ajoᴋsaratalo nerᴋiksanik; taikanalo nunaᴋaromavogut;

¹⁵ Tagva Nâlakab oᴋausinga tusarsiuk, ilipse amiakôjose Judamit; imâk oᴋarpoᴋ Nâlagaᴋ Zebaot, Israêlib Gudinga: Kênase torârtikupsigik Egiptenaliaromavluse, nunaᴋariartoromavluse taikunga;

¹⁶ Tagva saviksûb sivôragijapse angujomârpâse taikane nuname Egipteneme, kângnartoᴋsûblo kapiasûtigijapse udlalârpâse taikane Egipteneme; taikanalo toᴋojomârpose.

¹⁷ Taimailingalârput angutit ilûnatik torârtitsijut kênamingnik Egiptenaliaromavlutik taikane nunaᴋaromavlutik; toᴋolârput saviksoarmut kângnartoᴋsoarmullo nusilingnartomullo; atautsimiglônêt amiakoᴋaromângilaᴋ annatoᴋaromângilarlo idluitomit tikiutijomajamnit tâpkonunga.

¹⁸ Imâk oᴋarmat Nâlagaᴋ Zebaot, Israêlib Gudinga: Sorlo ningaumajârnera ᴋaningaumajârneralo kovijaumangmat Jerusalemib inunginut, taimaktauᴋ ᴋaningaumajârnera kovijaulârivoᴋ ilipsingnut Egiptenaliarupse; ôminarsitiksaujomârposelo, tataminiarutiksauvluselo, oᴋarnerlutjaujutiksauvluselo, mitautiksauvluselo; nunalo tamanna takoniarungnaipase kingorngane.

¹⁹ Nâlagaᴋ oᴋarsimavoᴋ pivluse, amiakôjose Judamit: Egiptenemut ainiarase; nalonangitomik ᴋaujimatsiaritse kigligiutjivigigapse uvlome.

²⁰ Tarnise terliarapsigik; tililaurapsinga Nâlakamut Gudipsingnut, oᴋarluse: Tuksiutilauᴋtigut Nâlakamut Gudiptingnut, Nâlakablo oᴋauserijangit tamaita maliklugit taimak nalonaijaivigitigut, taimailioromavogullo tagva.

²¹ Nalonaijarparalo ilipsingnut uvlome; Nâlakable Gudipse nippinga nâlalungilase tiliklerutigijanga uvamnik ilipsingnut.

²² Taimaimat nalonangitomik ᴋaujimaleritse mâna, toᴋolârapse saviksoarmut kângnartoᴋsoarmullo nusilingnartomullo nuname katjârvigijapsingne nunagijartoromavlugo.