Jeremia 41 - Labrador Inuttitut Heritage Bible

¹ Pijoᴋarporlo taᴋᴋit 7ingane, Ismaêl, Netaniab, Elisamab erningata, erninga, ataniub ilangat, ataniub angajoᴋâᴋsoangita ilangat, angutinik 10nik ilaᴋarlune, tikingmat Gedaliamut, Ahikamib erninganut Mispamut; tagvanalo neriᴋatigêkput Mispame.

² Ismaêliblo, Netaniab erningata, angutillo 10it ilagijangita, nikovilutik, Gedalia, Ahikamib, Sêfanib erningata, erninga saviksoarmut annauvât toᴋodlugolo, tâmna Babilonib ataningata atanerusingortitanga nunamut.

³ Judillo ilûnaita tâpsomanêtut, Mispame Gedaliamêtut, Kaldêamiullo tagvane naipitaujut, aglat sorᴋsuktuksattauᴋ, Ismaêlib toᴋopait.

⁴ Uvluble aipangane Gedaliab toᴋotauningata kingorngane, sulle ᴋaujimajoᴋartinago,

⁵ Angutit 80 tikiput Sikememit, Silomillo, Samariamillo, kipimajunik umilit, aliktorsimajuniglo annorâlit, killersimalutiglo, tunergutigilutik nerᴋiksanik, tipigiksautigilutiglo, Gudib iglunganut âtsomavlugit.

⁶ Ismaêlelo, Netaniab erninga, anivoᴋ Mispamit pagreartorlugit, ᴋugviorlune ingerarame; pâgamigillo oᴋautivait: Kailauritse Gedaliamut, Ahikamib erninganut.

⁷ Pivorlo, tikingmatta iglugasaksuit ᴋerᴋânut, Ismaêlib, Netaniab erningata, toᴋongmagit, egilugillo itersaliarmut, tâpsoma, angutillo ilagijangita.

⁸ Tâpkoale akorngane angutit 10it naipitauvut Ismaêlemut oᴋartut: Toᴋoniaratigut; perorsevingme torᴋorsimajoᴋarapta sanaugaksamik, sanaugâluksamiglo, orᴋsumiglo, igupsaujârtullo orᴋsuanik. Taimaimat anajagivait, toᴋungilaillo ᴋatangutingita akorngane.

⁹ Itersaliarle Ismaêlib egitsivigijanga angutit toᴋotame timinginik tamainik, Gedaliamiglo, (tâmnauvoᴋ ataniub Asab sanajanga sivôranermut Baasamik Israêlib ataninganik,) tâmna Ismaêlib Netaniab erningata tatapâ toᴋotaumajunik.

¹⁰ Ismaêliblo aularutivait inuit amiakôjut Mispame tamaita, ataniublo paningittauᴋ, inuillo tamaita amiakôjut Mispame, Nebuzaradanib, ataniub udjertortingita angajoᴋângata pititangit Gedaliamut, Ahikamib erninganut; Ismaêliblo, Netaniab erningata, aularutivait, aularporlo ikâriartoromavlune Ammonib kinguvânginut.

¹¹ Johananele, Kareab erninga, sorᴋsuktoᴋatigêksuillo angajoᴋângit tâpsomanêtut ilûnatik tusarmatta Ismaêlib, Netaniab erningata, idluitulininginik tamainik piniarnerijanginik,

¹² Ilagivait angutit tamaita, Ismaêlelo, Netaniab erninga, sorᴋsugvigijartorpât, naipipâllo imaksoarne Gibeonemêtune.

¹³ Pijoᴋarporlo, inuit ilûnatik Ismaêlemêtut takolermatta Johananemik, Kareab erninganik, sorᴋsuktoᴋatigêksuillo angajoᴋânginik tamainik tâpsomanêtunik, ᴋuviasudlarput.

¹⁴ Inuillo ilûnatik Ismaêlib aularutijangit Mispamit sanguvut uterlutiglo, Johananemut, Kareab erninganut, ailutik.

¹⁵ Ismaêlele, Netaniab erninga, aularpoᴋ Johananemit, ilaᴋarlune angutinik 8nik, tâpkoalo Ammonib kinguvânginut aivut.

¹⁶ Johananiblo, Kareab erningata, sorᴋsuktoᴋatigêksuillo angajoᴋângita ilûnatik tâpsomanêtut ilagivait inuit amiakôjut tamaita piulijatik Ismaêlemit, Netaniab erninganit, Mispamit, toᴋotsilauᴋârmat Gedaliamik, Ahikamib erninganik, ila, angutit sorᴋsuktuksat, arnallo, sorutsillo, pimaklertullo utertitane Gebeonemut;

¹⁷ Aularpullo nunatârlutiglo Kimhamib siniktarviane, Betlehemib sanianêtome, Egiptenemut iteriartoromavlutik.

¹⁸ Kaldêamiut pitjutigivlugit, sivôragigamigit, Ismaêlib, Netaniab erningata, Gedalia, Ahikamib erninga, Babilonib ataningata atanerusingortitanga nunamut, toᴋosimalaungmago.